ရန်ကုန်-ပုသိမ်လမ်းတွင် လမ်းပိုင်းအလိုက် ကတ္တရာထပ်ပိုးလွှာခင်းခြင်းနှင့် ကွန်ကရစ်ခင်းခြင်းလုပ်ငန်းများ ၂၀၂၅-၂၀၂၆ ဘဏ္ဍာနှစ်အတွင်းက ရာနှုန်းပြည့်ပြီးစီးအောင် ဆောင်ရွက်နိုင်ခဲ့ကြောင်း ဧရာ၀တီတိုင်းဒေသကြီး၊ လမ်းဦးစီးဌာနမှ ညွှန်ကြားရေးမှူး ဦးရန်နိုင်ဇော်က ပေါ်ပြူလာနယူစ်းသို့ ပြောကြားခဲ့သည်။
ရန်ကုန်-ပုသိမ်လမ်းပိုင်းသည် ရန်ကုန်တိုင်းဒေသကြီးနှင့်ဧရာ၀တီတိုင်းဒေသကြီးအစပ်ဖြစ်သည့် မိုင်တိုင် ၁၇/၄ မှ ၁၁၃ မိုင် ၂ ဖာလုံ ပုသိမ်အထိ ၉၅ မိုင် ၆ဖာလုံ ရှည်လျားပြီး မိုင်တိုင် ၁၇/၄ မှ မိုင်တိုင် ၅၆/၀ အထိ အပိုင်းအား Oriental Highways Co.,Ltd က BOT စနစ်ဖြင့် တာဝန်ယူဆောင်ရွက်လျက်ရှိသည်။
ဗိုလ်မြတ်ထွန်းတံတားမှ မိုင်တိုင် ၅၆/၀ အထိကို Oriental Highways Co.,Ltd က လမ်းအဆင့်မြှင့်ခြင်းလုပ်ငန်းများ ဆောင်ရွက်နေကြောင်း သိရသည်။
“အဲဒီအပိုင်းမှာဆိုရင် Oriental Highways Co.,Ltd က သူတို့တာဝန်ယူထားတဲ့အပိုင်းမှာ လက်ရှိမှာ လမ်းပြင်ခင်းတဲ့အလုပ်တွေလုပ်နေပါတယ်။ ပြီးတော့ လမ်းချဲ့တာတွေလုပ်နေတယ်။ ဒီဘဏ္ဍာနှစ်ရဲ့ အစီအစဉ်အနေနဲ့ကတော့ ဗိုလ်မြတ်ထွန်းတံတားကနေ မိုင်တိုင် ၅၆ ကြားမှာ သူတို့တာဝန်ယူထားတာ ၁၅ မိုင်လောက်ရှိတယ်၊ ၁၅ မိုင်အတွင်းမှာ ၃မိုင်လောက်တော့ ကွန်ကရစ်လမ်းအဖြစ် ဆောင်ရွက်ဖို့ ဒီနှစ်မှာ သူတို့plan ရှိထားရှိရာ လက်ရှိအချိန် အထိ (၁) မိုင်ကျော် ဆောင်ရွက်ပြီးစီးပြီဖြစ်ပါတယ်” ဧရာ၀တီတိုင်းဒေသကြီး၊ လမ်းဦးစီးဌာနမှ ညွှန်ကြားရေးမှူးဦးရန်နိုင်ဇော်က ပေါ်ပြူလာနယူစ်းသို့ ပြောပြခဲ့သည်။
မိုင်တိုင် ၅၆ မှ မိုင်တိုင် ၁၁၃/၂ အထိကို လမ်းဦးစီးဌာနမှ တာဝန်ယူဆောင်ရွက်နေခြင်းဖြစ်သည်။ ၅၆/၀ မိုင်မှ ကျောင်းကုန်နှင့်ပန်းတနော်မြို့နယ် နယ်စပ်ဖြစ်သည့် မိုင်တိုင် ၆၃/၀ အတွင်းတွင် ၆ မိုင်ခန့်ကို အကျယ်ပေ ၃၀ ကွန်ကရစ်လမ်းအဖြစ် အဆင့်မြှင့်တင်ခြင်းလုပ်ငန်းအားလုံးဆောင်ရွက်ပြီးစီးသွားပြီဖြစ်ကြောင်း သိရှိရသည်။
“မိုင်တိုင် ၇၄ နဲ့ မိုင်တိုင် ၁၁၃/၂ ကြားမှာ ကတ္တရာထပ်ပိုးလွှာခင်းခြင်း လုပ်ငန်း စုစုပေါင်းက ၅ မိုင်ဆောင်ရွက်ရန်ရှိရာ လုပ်ငန်းအားလုံးဆောင်ရွက်ပြီးစီးပြီ ဖြစ်ပါတယ်။ မူလက အကျယ် ၁၈ ပေသာရှိတဲ့ ကတ္တရာလမ်းကို အကျယ် ၂၄ သို့ တိုးချဲ့ခြင်းလုပ်ငန်းကို ၄ ဒသမ ၅ ဖာလုံ ချဲ့ရန်မှာ အားလုံးပြီးစီးပြီ ဖြစ်ပါတယ်။ အဲဒါက ဒါးကမြို့နှင့် ကန်ကြီးထောင့်ကြား၊ မိုင်တိုင်ဆိုရင် မိုင်တိုင် ၉၃၊ ၉၄ လောက်မှာဖြစ်ပါတယ်” ဟု ၎င်းက ဆိုသည်။
ထို့ပြင် ပုသိမ်မြို့အဝင် မိုင်တိုင် ၁၀၅/၅ မှာ (၃) ဖါလုံ အရှည် ပေ (၃၀) အကျယ် ကွန်ကရစ်ခင်းခြင်းလုပ်ငန်းများ ၊ လမ်းပုခုံး လုပ်ငန်းများ အားလုံးဆောင်ရွက်ပြီးစီးပြီဖြစ်ကြောင်း သိရသည်။
ပုသိမ်နှင့် ငွေဆောင်အကြား လတ်တလောတွင် လမ်းအဆင့်မြှင့်တင်ခြင်းလုပ်ငန်းများမရှိသေးသော်လည်း လမ်းထိန်းသိမ်းပြုပြင်ခြင်းလုပ်ငန်းများ ဆောင်ရွက်နေကြောင်း သိရသည်။
ဓာတ်ပုံ-လမ်းဦးစီးဌာန
ကွန်ကရစ်လမ်းခင်းလုပ်ငန်းပြီးစီးမှုအခြေအနေအား တွေ့ရစဉ်(ဓာတ်ပုံ-လမ်းဦးစီးဌာန)