မြန်မာနိုင်ငံတော်ဗဟိုဘဏ် (CBM) က သဘာဝဓာတ်ငွေ့ရည် (LNG) တင်သွင်းသည့်ကုမ္ပဏီတစ်ခုသို့ အမေရိကန်ဒေါ်လာ ၄ သန်း ရောင်းချပေးခဲ့ကြောင်း သိရသည်။
ဧပြီလ ၂၃ ရက်နေ့တွင် ဗဟိုဘဏ်၊ AD လိုင်စင်ရဘဏ်များနှင့် ပို့ကုန်/သွင်းကုန်လုပ်ငန်းရှင်များပါဝင်သည့် FX Trading Platform မှတစ်ဆင့် CMP ကုမ္ပဏီများထံမှ ဝယ်ယူထားသည့် နိုင်ငံခြားငွေများအနက်မှ အမေရိကန်ဒေါ်လာ ၄ သန်းကို LNG တင်သွင်းရေးကုမ္ပဏီသို့ ထုတ်ရောင်းပေးခဲ့ခြင်းဖြစ်ကြောင်း ဗဟိုဘဏ်က ထုတ်ပြန်ထားသည်။
အဆိုပါနေ့တွင်ပင် စားသုံးဆီတင်သွင်းသည့်ကုမ္ပဏီများသို့ အမေရိကန်ဒေါ်လာ ၃.၇၆၅ သန်း၊ Non-Trade လုပ်ငန်းများအတွက် အမေရိကန်ဒေါ်လာ ၉၄၅,၈၃၁ နှင့် CMP ကုမ္ပဏီများသို့ အမေရိကန်ဒေါ်လာ ၅၃,၆၆၃ ကိုလည်း ရောင်းချပေးခဲ့ကြောင်း သိရသည်။
ထို့ပြင် နိုင်ငံခြားငွေဝယ်ယူရရှိမှုအနေဖြင့် စားသုံးဆီမှ ၁၁ ရာခိုင်နှုန်း၊ စက်သုံးဆီမှ ၅၄ ရာခိုင်နှုန်း၊ ဓာတ်မြေသြဇာမှ ၅ ရာခိုင်နှုန်း၊ ဆေးဝါးနှင့် ဆေးဝါးကုန်ကြမ်းမှ ၄ ရာခိုင်နှုန်း၊ စက်မှုကုန်ကြမ်းမှ ၃ ရာခိုင်နှုန်း၊ ကားနှင့်ဆိုင်ကယ်အပိုပစ္စည်းမှ ၁ ရာခိုင်နှုန်း၊ ဟင်းသီးဟင်းရွက်မျိုးစေ့မှ ၂ ရာခိုင်နှုန်း၊ ဂျုံမှ ၂ ရာခိုင်နှုန်း၊ အီလက်ထရောနစ်ပစ္စည်းများမှ ၁ ရာခိုင်နှုန်းနှင့် အခြားကုန်စည်များနှင့် Non-Trade Transaction များမှ ၁၁ ရာခိုင်နှုန်းဖြင့် ရရှိထားကြောင်း ဖော်ပြထားသည်။
ဧပြီလ ၂၃ ရက်နေ့ FX Trading Platform တွင် အမေရိကန်ဒေါ်လာလဲလှယ်နှုန်းကို ၁ ဒေါ်လာလျှင် ၃,၆၅၈ ကျပ်ဖြင့် သတ်မှတ်ရောင်းဝယ်ခဲ့ကြောင်း သိရသည်။