အစိုးရအဖွဲ့၏ ရက် ၁၀၀ အတွင်းဆောင်ရွက်မည့်အစီအစဉ်များအရ တောင်သူများအတွက် စိုက်ပျိုးစရိတ်ချေးငွေနှုန်းထား တိုးမြှင့်သတ်မှတ်

အတိုးနှုန်းပြောင်းလဲမှုမရှိဘဲ ယခင်အတိုင်း တစ်နှစ်လျှင် ငါးရာခိုင်နှုန်းဖြင့်ပင် စပါး၊ ဂျုံနှင့်ချည်မျှင်ရှည်ဝါအတွက် တစ်ဧကလျှင် ကျပ်သုံးသိန်း၊ အခြားသီးနှံ ၁၈ မျိုးအတွက် ကျပ်နှစ်သိန်းခွဲအထိ ထုတ်ချေးမည်

အစိုးရအဖွဲ့ ၏ ရက်ပေါင်း ၁၀၀ အတွင်း Quick Win ရရှိစေမည့် အစီအစဉ်များတွင် ဘဏ္ဍာရေးနှင့်အခွန်ဝန်ကြီးဌာနက တောင်သူများသို့ စိုက်ပျိုးစရိတ်ချေးငွေတိုးမြှင့်မည့်အစီအစဉ်လည်း ပါဝင်ရာ တစ်ဧကလျှင် တိုးမြှင့်ထုတ်ချေးမည့် စိုက်ပျိုးစရိတ်ချေးငွေနှုန်းထားများကို ယနေ့တွင် အသိပေးထုတ်ပြန်ထားသည်။

အတိုးနှုန်းပြောင်းလဲမှုမရှိဘဲ ယခင်အတိုင်း တစ်နှစ်လျှင် ငါးရာခိုင်နှုန်းဖြင့်ပင် သီးနှံအမျိုးအစားအလိုက် တစ်ဧကလျှင် စပါး၊ ဂျုံ နှင့် ချည်မျှင်ရှည်ဝါ (မျိုးစေ့ထုတ်) အတွက် ယခင် တစ်ဧက ကျပ်တစ်သိန်းခွဲမှ ယခု ကျပ်သုံးသိန်းအထိ တိုးမြှင့်ထုတ်ချေးပေးမည်ဖြစ်သည်။

အခြားသီးနှံ (၁၈) မျိုးကိုလည်း ယခင်တစ်ဧက ကျပ်တစ်သိန်းမှ ယခု ကျပ်နှစ်သိန်းခွဲ၊ ပန်းနှမ်း၊ ဆီမုန်ညင်း၊ ဂုန်လျှော်တို့ကိုလည်း ယခင် တစ်ဧက ကျပ်တစ်သိန်းမှ ယခု ကျပ်တစ်သိန်းခွဲအထိ တိုးမြှင့်ထုတ်ချေးပေးမည်ဖြစ်ကြောင်း သိရသည်။

ထို့ပြင် လယ်ယာစိုက်ပျိုးရေးနှင့်မွေးမြူရေးကို အခြေခံသည် စက်မှုလုပ်ငန်းတည်ဆောက်ရာတွင် အထောက်ကူပြုနိုင်ရန်အတွက် လယ်ယာသုံးစက်ကိရိယာများကို သက်သာသော အတိုးနှုန်းဖြင့် ဝယ်ယူနိုင်စေရန် တန်ဖိုးနည်းလက်တွန်းထွန်စက်၊ ရေစုပ်စက်၊ ရေတင်စက်မှအစ တန်ဖိုးမြင့်မားသော အခြောက်ခံစက် (Dryer)၊ သိုလှောင်ရုံ (Silo)၊ ဆန်စက်များစသည့်လယ်ယာသုံးစက်ကိရိယာများကို အတိုးနှုန်း ၆ ရာခိုင်နှုန်း၊ ချေးငွေပမာဏ ကျပ်သိန်း ၃၀၀၀ အထိတစ်ကဏ္ဍ၊ ကျပ်သိန်း ၃၀၀၀ အထက်တစ်ကဏ္ဍ တိုးမြှင့်ထုတ်ချေးပေးမည်ဖြစ်သည်။

၂၀၂၆ မိုးရာသီစိုက်ပျိုးစရိတ်ချေးငွေများအား မိုးရာသီစိုက်ပျိုးချိန်အမီ ၂၀၂၆ ခုနှစ် မေ ၁၂ ရက်နေ့မှ စတင်၍ ထုတ်ချေးမည်ဖြစ်ရာ ယခင်ချေးငွေများပြေကျေစွာပေးဆပ်ပြီးသည့် တောင်သူလယ်သမားဦးကြီး များအနေဖြင့် ၂၀၂၆ မိုးရာသီစိုက်ပျိုးစရိတ်ချေးငွေများအချိန်မီရရှိနိုင်ရေးနှင့် လယ်ယာသုံးစက်ကိရိယာ ချေးငွေများရယူလိုသော တောင်သူများနှင့် စိုက်ပျိုးရေးလုပ်ငန်းရှင်များအနေဖြင့် မြန်မာ့လယ်ယာ ဖွံဖြိုးရေးဘဏ်သက်ဆိုင်ရာ ခရိုင်/မြို့နယ်ဘဏ်ခွဲများသို အမြန်ဆုံး ဆက်သွယ်ကြပါရန် ထုတ်ပြန်ချက်တွင် ဖော်ပြထားသည်။