တရုတ်နိုင်ငံကအိမ်ရှင်အဖြစ်လက်ခံကျင်းပမည့် ၂၀၂၆ ခုနှစ် အာရှယူ-၁၇ အမျိုးသမီးပြိုင်ပွဲတွင်ဝင်ရောက်ယှဉ်ပြိုင်မည့် မြန်မာယူ-၁၇ အမျိုးသမီးအသင်းသည် ယနေ့ ဧပြီ ၁၈ ရက်က တရုတ်နိုင်ငံသို့ထွက်ခွာသွားခဲ့သည်။
တရုတ်နိုင်ငံ၏ ရာသီဥတုနှင့် ကွင်းအနေအထားအသား ကျစေရန် ပြိုင်ပွဲမစတင်မီ (၁၀)ရက်ကျော်ကြိုတင်သွား ရောက်လေ့ကျင့်နိုင်ရေးအတွက် မြန်မာနိုင်ငံဘောလုံးအဖွဲ့ချုပ်၏အစီအစဥ်ဖြင့် ကြိုတင်ထွက်ခွာခဲ့ခြင်းဖြစ်ကာ ဂျပန်လူမျိုးနည်းပြချုပ် Ms. Kumiko Tashiro ဦးဆောင်၍ မြန်မာယူ-၁၇ အမျိုးသမီးကစားသမား (၂၃) ဦးလိုက်ပါသွားခဲ့သည်။
ထို့ပြင် မြန်မာယူ-၁၇ အမျိုးသမီးအသင်းသည် တရုတ်ဒေသခံ အမျိုးသမီးယူ-၁၇ အသင်း၊ ဖိလစ်ပိုင်ယူ-၁၇ အမျိုးသမီးအသင်းတို့နှင့် ခြေစမ်းပွဲများကစားရန်စီစဉ်ထားကာ ရန်ကုန်မြို့၌ စခန်းသွင်းလေ့ကျင့်နေစဉ်ကလည်း အိန္ဒိယယူ-၁၇ အသင်းနှင့် နိုင်ငံတကာ ခြေစမ်း ပွဲနှစ်ပွဲအပါအဝင် မြန်မာအမျိုးသမီးလိဂ်ပြိုင်ပွဲဝင် အသင်းများနှင့် အပတ်စဉ်ခြေစမ်းပွဲများယှဥ်ပြိုင်ကစားခဲ့သည်။
မြန်မာယူ-၁၇ အမျိုးသမီးအသင်းသည် အာရှအဆင့်ပြိုင်ပွဲ၌ အုပ်စု(က)တွင် တရုတ်၊ ထိုင်း၊ ဗီယက်နမ်တို့နှင့်တစ်အုပ်စုတည်းကျရောက်နေပြီး မေ ၂ ရက်ည ၆ နာရီတွင် တရုတ်အသင်း၊ မေ ၄ ရက်မွန်းလွဲ ၂ နာရီတွင် ထိုင်းအသင်း၊ မေ ၇ ရက်ည ၆ နာရီတွင် ဗီယက်နမ်အသင်းတို့နှင့် ယှဥ်ပြိုင်ကစားရမည်ဖြစ်သည်။
ပြိုင်ပွဲတွင် အုပ်စုတစ်ခုချင်းစီမှ ထိပ်ဆုံး(၂)သင်းစီအပြင် အကောင်းဆုံးအုပ်စုတတိယရရှိသည့် (၂)သင်း ကွာတားဖိုင်နယ်အဆင့်တက်ရောက်ခွင့်ရရှိမည်ဖြစ်သည်။