ကယ်ဆယ်ရေးလုပ်ငန်းများပူးပေါင်းဆောင်ရွက်ရန် မြန်မာနိုင်ငံလူမှုကယ်ဆယ်ရေးအဖွဲ့(ဗဟိုကော်မတီ)နှင့် တရုတ်နိုင်ငံ ChangShu Volunteer Association တို့ကြား နားလည်မှုစာချွန်လွှာကို စက်တင်ဘာ ၁၁ ရက်က တရုတ်နိုင်ငံ၊ ဟူးဟော့မြို့၌လက်မှတ်ရေးထိုးခဲ့ကြသည်။
မြန်မာနိုင်ငံလူမှုကယ်ဆယ်ရေးအဖွဲ့(ဗဟိုကော်မတီ) ဒု-ဥက္ကဋ္ဌဦးလှိုင်မင်းဦးနှင့် ChangShu Volunteer Association ၊ Blue Sky Rescue – International Team မှတာဝန်ရှိသူတစ်ဦးဖြစ်သည့် မစ္စတာ လျိုဝေတို့က စက်တင်ဘာ ၉ ရက်မှ ၁၁ ရက်ထိ ဟူးဟော့မြို့တွင် ကျင်းပခဲ့သည့်”ကမ္ဘာလုံးဆိုင်ရာ ဖွံ့ဖြိုးတိုးတက်မှု ပဏာမခြေလှမ်း – ဒုတိယအကြိမ် နိုင်ငံတကာအရပ်ဘက်လူမှုအဖွဲ့အစည်းများ ပူးပေါင်းဆောင်ရွက်ရေး ညီလာခံ”၌ လက်မှတ်ရေးထိုးခဲ့ကြခြင်းဖြစ်သည်။
နားလည်မှုစာချွန်လွှာတွင် ကယ်ဆယ်ရေးဆိုင်ရာအဆင့်မြင့်နည်းပညာများမျှဝေရန်၊ ကယ်ဆယ်ရေးဆိုင် ရာသုတေသနများ၌ ပူးပေါင်းဆောင်ရွက်ရန်၊ ကယ်ဆယ်ရေးဆိုင်ရာ သင်တန်းများလေ့ကျင့်ဆောင်ရွက်ရန်၊ ကယ်ဆယ်ရေးဆိုင်ရာပညာတော်သင်များစေလွှတ်နိုင်ရန်နှင့် ကယ်ဆယ်ရေးဆိုင်ရာလုပ်ငန်းများ ပူးတွဲဆောင်ရွက်ရန်တို့ ပါဝင်သည်။