ထိုင်းနိုင်ငံတွင် အကြောင်းအမျိုးမျိုးကြောင့် ပြစ်ဒဏ်ကျခံပြီးသည့် မြန်မာနိုင်ငံသား (၂၀၀) ဦးကို ယမန်နေ့ ဖေဖော်ဝါရီ(၂၅)ရက် မွန်းလွဲပိုင်းအချိန်၌ ထိုင်းနိုင်ငံ ရနောင်းမြို့မှ မြန်မာနိုင်ငံ ကော့သောင်းမြို့သို့ ပြန်လည်ပို့ဆောင်ပေးခဲ့ကြောင်း သိရသည်။
ပြန်လည် ပို့ဆောင်ခံရသည့် နိုင်ငံသားဦးရေ (၂၀၀) အနက် အမျိုးသမီး(၂)ဦးသာပါဝင်ပြီး အမျိုးသား (၁၉၈) ဦးပါဝင်ခဲ့ကြောင်း ကော့သောင်း လူဝင်မှုကြီးကြပ်ရေးနှင့် နီးစပ်သူ တစ်ဦးထံက သိရသည်။
“ဒီလုပ်ငန်းစဉ်က ပုံမှန်ရှိပါတယ်။ နှစ်နိုင်ငံ စနစ်တကျ လွှဲပြောင်းယူပြီး၊ နေရပ်ပြန်ပို့မှာပါ။ ဒီထဲကမှ တရားခံပြေးတွေကိုတော့ တိုက်ဆိုင်စစ်ဆေးတာတွေရှိတာပေါ့”ဟု ၎င်းက ပြောသည်။
ပြစ်ဒဏ်လွတ်၍ ပြန်လည်လွတ်မြောက်လာသူများကို စက်လှေ(၁၀)စီးကျော်ဖြင့် ကော့သောင်းမြို့၊ အမှတ်(၂) ဘုရင့်နောင်ဆိပ်ခံတံတားသို့ ပြန်လည်ပို့ဆောင်လာခြင်းဖြစ်ကြောင်း ဆိုသည်။
မြန်မာနိုင်ငံအတွင်းသို့ ပြန်လည်ရောက်ရှိလာသည့် နိုင်ငံသားများကို ကျန်းမာရေးစစ်ဆေးခြင်း၊ ကိုယ်ရေးအချက်အလက်ကောက်ယူခြင်း၊ ၎င်းတို့ထဲမှ PDFများ၊ CDM ဝန်ထမ်းများ၊ အမည်မည်းစာရင်း အသွင်းခံထားရသူများ၊ လူကုန်ကူးမှုဖြင့် အလိုရှိသူများ၊ လူကုန်ကူးခံရသူများနှင့် တရားခံပြေးများ ပါဝင်လာခြင်းရှိ၊ မရှိ စစ်ဆေးပြီးပါက နေရပ်အသီးသီးသို့ ပြန်နိုင်ရန် စီစဉ်ထားကြောင်း သိရသည်။
ရနောင်းထိန်းသိမ်းရေးစခန်းမှ ကော့သောင်းသို့ ပြီးခဲ့သည့် ၂၀၂၄ ခုနှစ် ဇန်နဝါရီလ (၁၀) ရက်တွင် (၁၁၈) ဦး၊ ဖေဖော်ဝါရီလ (၁၄) ရက်တွင် (၁၉၇) ဦး၊ မတ်လ (၂၅) ရက်တွင် (၁၃၄) ဦး၊ ဇွန်လ (၁၀) ရက်တွင် (၁၂၀) ဦး၊ (၁၇) ရက်တွင် (၁၂၀) ဦး၊ (၂၁) ရက်တွင် (၈၅) ဦး၊ ဇူလိုင် (၃၀) ရက်တွင် (၁၅၂) ဦး၊ သြဂုတ်လ (၇) ရက်တွင် (၁၂၆) ဦး၊ (၂၆) ရက်တွင် (၁၀၈) ဦး၊ စက်တင်ဘာလ (၆) ရက်တွင် (၁၃၀) ဦး၊ (၂ ၆) ရက်တွင် (၁၂၇) ဦး၊ နိုဝင်ဘာ (၁၃) ရက်တွင် (၁၈၆) ဦး၊ (၂၈) ရက်တွင် (၁၈၃) ဦးနှင့် ဒီဇင်ဘာလ (၁၈) ရက်တွင် (၂၁ ၉) ဦး နေရပ်ပြန်လည်ပို့ဆောင်ခဲ့သည်ဟု FE5 Tanintharyi မှ ဖော်ပြထားသည်။
ထို့ပြင် ၂၀၂၅ ခုနှစ် ဇန်နဝါရီလ (၂၂) ရက်တွင်လည်း ရနောင်းခရိုင်မှ မြန်မာရွေ့ပြောင်းလုပ်သားများကို ကော့သောင်းမြို့သို့ (၁)ကြိမ်ပို့ဆောင်ခဲ့ပြီး မြန်မာရွေ့ပြောင်းလုပ်သား(၁၄၉) ဦး ပါဝင်ကြောင်း FE5 Tanintharyi မှ ဖော်ပြထားသည်။