ယနေ့ ဖေဖော်ဝါရီ (၂၆)ရက်၊ နံနက် အစောပိုင်းက မန္တလေးတိုင်းဒေသကြီး၊ မဟာအောင်မြေခရိုင်၊ ပြည်ကြီးတံခွန်မြို့ နယ်၊ (ဂ)ရပ်ကွက်၊ (၁၁၈)လမ်းနှင့် (၆၂) လမ်းဒေါင့်ရှိ နေအိမ် မီးလောင်မှုဖြစ်ပွားရာ သက်ဆိုင်ရာ နယ်မြေခံ မီးသတ်စခန်းများမှ မီးငြှိမ်းသတ်ယာဉ်များဖြင့် ထွက်ခွာငြှိမ်းသတ်ခဲ့ရကြောင်း သိရသည်။
အဆိုပါ မီးလောင်မှု ဖြစ်ပွားရာနေရာသို့ မဟာအောင်မြေခရိုင် မီးသတ်စခန်း၊ ပြည်ကြီးတံခွန်မြို့နယ်မီးသတ်စခန်း၊ ယာတော်အရန် မီးသတ်စခန်း၊ (ဃ)အရန်မီးသတ်စခန်း၊ လောကပါလအရန် မီးသတ်စခန်း၊ သင်ပန်းကုန်းအရန်မီးသတ်စခန်းများမှ သန္ဓေမီးသတ်တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များမှ မီးငြှိမ်းသတ်ယာဉ်များဖြင့် ထွက်ခွာငြှိမ်းသတ်ခဲ့ရကြောင်း သိရသည်။
ထိုသို့ ထွက်ခွာငြှိမ်းသတ်ခဲ့ရာ နံနက် (၄)နာရီ (၄၉)မိနစ်အချိန်တွင် မီးငြှိမ်းသတ်နိုင်ခဲ့ကြောင်းနှင့် ဖြစ်စဉ်နှင့် ပတ်သက်၍ ထိခိုက်ပျက်စီးဆုံးရှုံးမှု တန်ဖိုးနှင့် မီးလောင်မှုအကြောင်းအရင်း အသေးစိတ်ကို မီးသတ်တပ်ဖွဲ့မှ ဆက်လက်စစ်ဆေးသွားမည်ဖြစ်ကြောင်း သိရသည်။
ဖေဖော်ဝါရီ (၂၄)ရက်၊ နံနက် (၉)နာရီအချိန်ခန့်ကလည်း ပြည်ကြီးတံခွန်မြို့နယ် ၆၈ A/ ၁၃၂ လမ်းနှင့် ၁၃၃ လမ်းကြားရှိ “ရှင်းသန့်” ဟိုတယ်နှင့် ဘူဖေးထမင်းဆိုင်တွင် မီးလောင်မှု တစ်ခု ဖြစ်ပွားခဲ့သေးကြောင်းလည်း မီးသတ်တပ်ဖွဲ့သတင်းများအရ သိရသည်။
ထိုပြင် ဖေဖော်ဝါရီ(၂၀)ရက်၊နံနက်အစောပိုင်း (၄)နာရီကျော် အချိန်ခန့်ကလည်း ချမ်းအေးသာစံမြို့နယ်၊ လမ်း(၃၀) နှင့် (၃၁)လမ်း (၈၆)လမ်းနှင့် (၈၇)ကြားရှိ နေအိမ် မီးလောင်မှုဖြစ်ပွားရာမှ မီးကူးစက်လောင်ကျွမ်းမှုဖြစ်ပွားခဲ့ပြီး နေအိမ် (၆) အိမ်ခန့် မီးလောင်ပျက်စီးဆုံးရှုံးခဲ့ရကြောင်း မီးသတ်တပ်ဖွဲနှင့် ဒေသခံတို့ထံမှ သိရသည်။