ASEAN Mitsubishi Electric Cup 2024 ပြိုင်ပွဲ၌ ယှဥ်ပြိုင်ကစားခဲ့ပြီးဖြစ်သော ပွဲစဥ်နှစ်ခုတွင် လိုချင်သည့်ရလဒ်မရရှိခဲ့သော်လည်း မည်သည့်အချိန်ဖြစ်ဖြစ် ကြိုးစားအားထုတ်မှုလျော့ကျမသွားဟု မြန်မာ့လက်ရွေးစင်အသင်းခေါင်းဆောင်သီဟဇော်က ပြောသည်။
ယနေ့ ဒီဇင်ဘာ ၁၇ ရက်ည ၆ နာရီက သုဝဏ္ဏဘောလုံးကွင်း၌ ASEAN Mitsubishi Electric Cup 2024 ပြိုင်ပွဲ မြန်မာ့လက်ရွေးစင်ဘောလုံးအသင်းနှင့် လာအိုဘောလုံးအသင်းတို့၏ ပွဲစဥ်မတိုင်မီပြုလုပ်သည့် သတင်းစာရှင်းလင်းပွဲတွင် ပြောကြားခဲ့ခြင်းဖြစ်သည်။
“ ရှေ့ကနှစ်ပွဲမှာလိုချင်တဲ့ရလဒ် မရခဲ့တာရှိတယ်။ ဒါပေမယ့် ဘယ်အချိန်ပဲဖြစ်ဖြစ် ကျွန်တော်တို့ရဲ့ကြိုးစားအားထုတ်မှုက လျော့ကျမသွားပါဘူး။ ကျွန်တော်တို့ပရိသတ်တွေအတွက် အမြဲတမ်းကြိုးစားနေမှာပါ”ဟု သီဟဇော်က ပြောသည်။
ထို့ပြင် မြန်မာ့လက်ရွေးစင်အသင်းနည်းပြချုပ်ဦးမျိုးလှိုင်ဝင်းမှလည်း ဖိလစ်ပိုင်အသင်းနှင့်ပွဲပြီးချိန်မှစတင်ကာ လာအိုအသင်းနှင့်ပွဲစဥ်အတွက် သေချာပြင်ဆင်ထားကာ လက်ရှိအချိန်တွင် မြန်မာ့လက်ရွေးစင်အသင်း၌ ဒဏ်ရာရကစားသမားများမရှိသည့်အပြင် တိုက်စစ်ပိုင်းမှ ဂိုးရရှိရန်ခက်ခဲနေခြင်းကိုလည်းပြင်ဆင်ထားသည်ဟု ပြောသည်။
” ဝင်းနိုင်ထွန်း အသင်းနဲ့လာရောက်ပူးပေါင်းတာက အသင်းအတွက်ခွန်အားတစ်ရပ်ဖြစ်စေပါတယ်။ လာအိုအသင်းက ခြေစွမ်းပိုင်းတိုးတက်လာတဲ့ အသင်းဖြစ်လို့ မနက်ဖြန်ပွဲက ခက်ခဲမှာပါ။ ပရိသတ်တွေအနေနဲ့ အင်ဒိုနီးရှားနဲ့က ပွဲလိုပဲ မနက်ဖြန်ပွဲမှာ လာရောက်အားပေးကြည့်ရှုမယ်လို့ မျှော်လင့်ပါတယ်”ဟု နည်းပြချုပ်ဦးမျိုးလှိုင်ဝင်းကပြောသည်။
ထို့ပြင် လာအိုအသင်းနည်းပြချုပ် ဟာဟေးဂျွန်မှ မနက်ဖြန်ပွဲရလဒ်ကောင်းရရှိရန် စနစ်တကျပြင် ဆင်ထားကာ မြန်မာအသင်းသည် အသင်းကောင်းတစ်သင်းဖြစ်၍ ပရိသတ်များအကြိုက် ပွဲကောင်းတစ်ပွဲဖြစ်လာမည်ဖြစ်ပြီး မနက်ဖြန်ပွဲ၌ အကောင်းဆုံးကြိးစားသွားမည်ဟု ပြောကြားခဲ့သည်။
မြန်မာ့လက်ရွေးစင်ဘောလုံးအသင်းနှင့် လာအိုဘောလုံးအသင်းတို့သည် မနက်ဖြန် ဒီဇင်ဘာ ၁၉ ရက်ညနေ ၅ နာရီ၌ သုဝဏ္ဏဘောလုံးကွင်းတွင် ယှဥ်ပြိုင်ကစားသွားမည်ဖြစ်သည်။
