ရှမ်းပြည်မြောက်ပိုင်း၊ လားရှိုးမြို့တွင် ဇူလိုင် (၁၀)ရက်ညမှ စတင်ကာ အချို့ရပ်ကွက်ကြီးများတွင် အင်တာနက်လိုင်းပြတ်တောက်မှုများ ဖြစ်ပေါ်လာကြောင်း မြို့ခံများက ပြောသည်။
“ရပ်ကွက် (၁၀)မှာဆို Mytel WiFi တွေမရတော့ဘူး၊ စက်နီနေတာ၊ မိုဘိုင်းဒေတာရောပဲ” ဟု လားရှိုးမြို့တွင် လက်ရှိအချိန်ထိရှိနေသူ မြို့ခံအမျိုးသမီးက ပေါ်ပြူလာနယူးသို့ပြောသည်။
ထို့ပြင် မြို့ပေါ်နေရာအများစု၌ အင်တာနက်လိုင်းများချိတ်ဆက်မရမှု၊ ပြတ်တောက်မှုများလည်း ဖြစ်ပေါ်နေကြောင်း သူမကပင် ပြောသည်။
နှစ်ဘက်တိုက်ပွဲများသည်လည်း ဆက်လက်ဖြစ်ပွားနေဆဲဖြစ်ပြီး ဆက်သွယ်ရန်အတွက် ဖုန်းလိုင်းများပါ ပြတ်တောက်မည်ကို မြို့ခံများက စိုးရိမ်နေကြသည်။
လက်ရှိတွင် လားရှိုးမြို့ဆေးရုံကြီးတွင် စစ်ရှောင်နေရသည့် ဆရာဝန်များလည်းရှိနေသောကြောင့် ဆရာဝန်အင်အားလုံလောက်မှုမရှိခြင်းကိုလည်း ရင်ဆိုင်နေရသည်။
မြို့ခံများ၏ အဆိုအရ အရေးပေါ်လူနာများမှလွဲ၍ ကျန်လူနာများကို စိုးရိမ်ရသည့် အခြေအနေတွင်မရှိပါက လိုအပ်သည့် စစ်ဆေးမှုများ ပြုလုပ်ပေးကာ နေအိမ်သို့သာ ပြန်လွှဲပေးနေရကြောင်း သိရသည်။
ထို့နည်းတူ လားရှိုးမြို့ပေါ်၌ မြို့တွင်းအသွားအလာနည်းပါးနေကာ စက်သုံးဆီစျေးမြင့်တက်မှုနှင့်အတူ ကုန်စျေးနှုန်းကြီးမြင့်သည့်ဒဏ်ကိုပါ မြို့နေပြည်သူများ ခံစားနေရကြော င်း သိရသည်။