အင်ဒိုနီးရှားနိုင်ငံတွင် အာနက်ကရာကာတော မီးတောင်ပေါက်ကွဲမှုကြောင့် မီးတောင်ပြာများထွက်နေသဖြင့် ဆူကာနို-ဟတ်တာ နိုင်ငံတကာလေဆိပ်၏ လေယာဉ်ခရီးစဉ်များကို နာရီများစွာ ရပ်ဆိုင်းထားရကြောင်း ဂျကာတာ၏ အဓိကလေဆိပ်က အင်စတာဂရမ်တွင် ပို့စ်တင်ထုတ်ပြန်ခဲ့သည်။
ဒေသစံတော်ချိန် နံနက် ၉ နာရီခွဲမှ စတင်ရပ်ဆိုင်းထားမှုကို နောက်တစ်နေ့ နံနက် ၅ နာရီခွဲအထိ တိုးချဲ့ထားခြင်းကြောင့် နိုင်ငံတကာလေကြောင်းခရီးစဉ်များအပါအဝင် လေယာဉ်ခရီးစဉ် ၂၀၉ ခုကို ထိရောက်ခဲ့ကြောင်း အင်ဒိုနီးရှားသယ်ယူပို့ဆောင်ရေးဝန်ကြီးဌာနက ပြောကြားခဲ့သည်။
အာနက်ကရာကာတောမီးတောင်သည် သောကြာနေ့နှောင်းပိုင်းမှစ၍ ပေါက်ကွဲနေခဲ့ကာ တနင်္ဂနွေနေ့နံနက်ပိုင်းတွင် လေဆိပ်၌ မီးတောင်ပြာများကျရောက်မှုရှိခဲ့ကြောင်း ဝန်ကြီးဌာနက ထုတ်ပြန်ပြောကြားခဲ့သည်။
မီးတောင်ပြာများ ပျံ့နှံ့နေခြင်းကြောင့် အင်ဒိုနီးရှားနိုင်ငံ ဆူမားတြားကျွန်းပေါ်ရှိ လမ်ပန်ပြည်နယ်နှင့် ဂျာဗားကျွန်းပေါ်ရှိ ဘန်တန်ပြည်နယ်တို့တွင် နေ့စဉ်လှုပ်ရှားသွားလာမှုများကို အနှောင့်အယှက်ဖြစ်စေခဲ့ကြောင်း အင်ဒိုနီးရှား သဘာဝဘေးလျှော့ချရေးအေဂျင်စီ (BNPB) ၏ ပြောရေးဆိုခွင့်ရှိသူ ဘာတန် ပန်ဂျေတန်က ပြောကြားခဲ့သည်။
ပြည်သူလူထုအနေဖြင့် စိတ်အေးအေးထားကြရန်နှင့် ပိုမိုနိုးနိုးကြားကြားရှိကြရန် BNPB က တိုက်တွန်းကြောင်း ၎င်းက ပြောကြားခဲ့သည်။
စနေနေ့တွင် စာသင်ကျောင်းအတော်များများကို ပိတ်ခဲ့ပြီး မီးတောင်ပြာများကြောင့် ကျောင်းသားများနှင့် ဒေသခံများ မျက်လုံးယားယံသည့် ဝေဒနာခံစားခဲ့ရပြီး မီးတောင်ပေါက်ကွဲမှုကြောင့် ငါးဖမ်းသမားများသည် ၎င်းတို့၏ ငါးဖမ်းခရီးစဉ်များကို ဖျက်သိမ်းခဲ့ကြောင်း ဒေသခံမီဒီယာ Kompas က ဖော်ပြခဲ့သည်။
မီးတောင်ပေါက်ကွဲမှုဖြစ်စဉ်ကြောင့် ဆူနာမီရေလှိုင်းများဖြစ်ပေါ်လာနိုင်သည့် အန္တရာယ်မရှိကြောင်း သဘာဝဘေးအန္တရာယ်လျော့ပါးရေးအေဂျင်စီက စနေနေ့တွင် ပြောကြားခဲ့သည်။
Ref: အေဘီစီနူးစ်