တရုတ်နဲ့ ရုရှားတို့လိုပဲ အမေရိကန်ရဲ့ မဟာမိတ်နှစ်နိုင်ငံဟာ ရွှေ့ပြောင်းအခြေချတွေကို လက်မခံလိုတဲ့ နိုင်ငံခြားသားကြောက် အယူအဆရှိနိုင်ငံတွေဖြစ်တယ်ဆိုတဲ့ အမေရိကန်သမ္မတ ဂျိုးဘိုင်ဒင်ရဲ့ ပြောဆိုချက်ကို အိန္ဒိယနဲ့ ဂျပန်နိုင်ငံတို့က ပယ်ချခဲ့ကြပါတယ်။
အိန္ဒိယနိုင်ငံဟာ ရွှေ့ပြောင်းဝင်ရောက်သူတွေအတွက် သမိုင်းကြောင်းအရ ပွင့်လင်းမြင်သာတဲ့နိုင်ငံဖြစ်ပြီး စီးပွားရေးဟာလည်း အားကောင်းနေတယ်လို့ အိန္ဒိယနိုင်ငံခြားရေးဝန်ကြီး ဆူဘရာမန်ယမ် ဂျေးရှန်ကာက ပြောဆိုတယ်လို့ Economic Times သတင်းစာက စနေနေ့မှာ သတင်းဖော်ပြပါတယ်။
ဒီလေးနိုင်ငံဟာ ရွှေ့ပြောင်းအခြေချမှုရဲ့ စီးပွားရေးအကျိုးအမြတ်တွေအပေါ် အရင်းအနှီးစိုက်ထည့်ဖို့ ပျက်ကွက်ခဲ့တယ်လို့ ပြောဆိုခဲ့ပြီး ဂျေးရှန်ကာကတော့ မိမိတို့ရဲ့ စီးပွားရေးဟာ မတည်မငြိမ်ဖြစ်နေတာမျိုး မရှိဘူးလို့ သောကြာနေ့က Economic Times နဲ့ အင်တာဗျူးမှာ တုန့်ပြန်ခဲ့ပါတယ်။
ဂျီ-၇ အုပ်စုနိုင်ငံတွေထဲမှာ ရွှေ့ပြောင်းအခြေချသူဦးရေ အနိမ့်ဆုံးဖြစ်ပြီး ၂ ရာခိုင်နှုန်းအောက်သာရှိတဲ့ ဂျပန်နိုင်ငံကလည်း အမေရိသမ္မတရဲ့ မှတ်ချက်တွေအပေါ် လက်မခံပယ်ချပါတယ်။ ဒီပြောဆိုမှုအတွက် စိတ်မကောင်းဖြစ်ရကြောင်းနဲ့ ဒါဟာ ဂျပန်နိုင်ငံရဲ့ မူဝါဒတွေကို တိကျစွာ နားလည်မှုမရှိခြင်းကနေ အခြေခံကြောင်း ဝါရှင်တန်ဒီစီရှိ ဂျပန်သံရုံးက ထုတ်ပြန်ခဲ့ပါတယ်။
မကြာသေးမီက မဲဆွယ်စည်းရုံးရေးရန်ပုံငွေပွဲတစ်ခုမှာ ရွှေ့ပြောင်းနေထိုင်သူဦးရေ နည်းပါးတဲ့နိုင်ငံတွေကို ဘိုင်ဒင်က ပြစ်တင်ဝေဖန်ခဲ့ပြီး ရွှေ့ပြောင်းနေထိုင်သူတွေကြောင့် အမေရိကန်ရဲ့ စီးပွားရေးကို အားကောင်းစေခဲ့တယ်လို့ ထောက်ပြပြောဆိုသွားခဲ့ပါတယ်။
တရုတ်နိုင်ငံရဲ့ စီးပွားရေးဆိုးဝါးနေခြင်း၊ ဂျပန်စီးပွားရေး ပြဿနာတွေရှိနေခြင်းနဲ့ ရုရှား၊ အိန္ဒိယတို့မှလည်း အလားတူကိစ္စတွေဖြစ်နေခြင်းဟာ သူတို့ရဲ့ နိုင်ငံခြားသားကြောက်အယူအဆကြောင့်ဖြစ်ပြီး သူတို့ဟာ ရွှေ့ပြောင်းနေထိုင်သူတွေကို မလိုလားကြဘူးလို့ ဘိုင်ဒင်က ပြောဆိုခဲ့ပါတယ်။
ဘိုင်ဒင်ဟာ၂၀၂၁ ခုနှစ်က သမ္မတရာထူး စတင်ထမ်းဆောင်ချိန်မှစကာ အိန္ဒိယ၊ ဂျပန် နှစ်နိုင်ငံနဲ့ ဆက်ဆံရေးအားကောင်းစေဖို့ အဓိကထားလုပ်ဆောင်လာခဲ့တာဖြစ်ပြီး သူ့ရဲ့ ယခုပြောဆိုချက်ကြောင့် အံ့အားသင့်စရာဖြစ်ခဲ့ပါတယ်။
Ref: အယ်ဂျာဇီးယား
