ရုရှားနဲ့ တိုက်ပွဲမှာ အသုံးပြုဖို့အတွက် အမေရိကန်က ယူကရိန်းကို တာဝေးပစ်ဒုံးကျည်တွေ တိတ်တဆိတ် တင်ပို့ပေးခဲ့ကြောင်းနဲ့ ယူကရိန်းက ယင်းဒုံးကျည်တွေကို နှစ်ကြိမ်တိုင် အသုံးပြုခဲ့ပြီးဖြစ်ကြောင်း အမေရိကန်အရာရှိတစ်ဦးက ဧပြီ ၂၄ ရက်မှာ ပြောဆိုပါတယ်။
ယင်းဒုံးကျည်တွေဟာ မတ် ၁၂ ရက်မှာ အမေရိကန်သမ္မတ ဂျိုးဘိုင်ဒင် အတည်ပြုပေးခဲ့တဲ့ ယူကရိန်းအတွက် စစ်ရေးအကူအညီ ကန်ဒေါ်လာ သန်း ၃၀၀ အစီအစဉ်မှာ ပါဝင်ကြောင်း အမည်မဖော်လိုတဲ့ အမေရိကန် အရာရှိက ပြောဆိုခဲ့ပါတယ်။ ဒုံးကျည်ဘယ်လောက်များများ ပေးပို့ခဲ့သလဲဆိုတာကိုတော့ ယင်းအရာရှိက ပြောဆိုခဲ့ခြင်း မရှိပါဘူး။
ယင်းဒုံးကျည်တွေကို ဧပြီ ၁၇ ရက် အစောပိုင်းက ယူကရိန်းရှေ့တန်းစစ်မြေပြင်မှ ၁၆၅ ကီလိုမီတာအကွာ ခရိုင်းမီးယားရှိ ရုရှားလေယာဉ်ကွင်းတစ်ခုကို တိုက်ခိုက်ခဲ့ရာမှာ ပထမဆုံးအကြိမ် အသုံးပြုခဲ့တယ်လို့ အရာရှိက ပြောပါတယ်။ ဒုတိယအကြိမ်ကတော့ ယူကရိန်းအရှေ့တောင်ပိုင်းရှိ ရုရှားတပ်တွေကို ညပိုင်းတိုက်ခိုက်ရာမှာ ယင်းလက်နက်တွေကို အသုံးပြုခဲ့တာဖြစ်တယ်လို့ ၎င်းက ဆက်လက် ပြောဆိုပါတယ်။
အကွာအဝေး ၃၀၀ ကီလိုမီတာအထိ ရောက်ရှိနိုင်တဲ့ စစ်တပ်နည်းဗျူဟာ ဒုံးကျည်စနစ် (ATACMS) ကို ပေးပို့မှုလုပ်မလုပ်ဟာ ဘိုင်ဒင်အစိုးရအဖွဲ့အတွင်း လအတော်ကြာ အငြင်းအခုံဖြစ်ခဲ့တဲ့ အကြောင်းအရာဖြစ်ပါတယ်။ တာလတ်ပစ် ATACMS ဒုံးကျည်တွေကိုတော့ ၂၀၂၃ ခုနှစ် စက်တင်ဘာလကတည်းက ထောက်ပံ့ပေးထားခဲ့တာဖြစ်ပါတယ်။
အမေရိကန် လက်နက်တိုက်တွေမှာ ယင်းဒုံးကျည်အမျိုးအစားတွေ လျော့ကျသွားပြီး အမေရိကန်စစ်တပ်ရဲ့ စစ်ရေးအသင့်ဖြစ်မှုကို ထိခိုက်လာနိုင်တာကြောင့် ပင်တဂွန်က ကနဦးမှာ တာဝေးပစ်ဒုံးကျည်တွေ တပ်ဖြန့်မှုကို ကန့်ကွက်ခဲ့ပါတယ်။ ဒါ့အပြင် ယူကရိန်းအနေနဲ့ ယင်းဒုံးကျည်တွေကို ရုရှားအတွင်းပိုင်း ပစ်မှတ်တွေကို တိုက်ခိုက်ရာမှာ အသုံးပြုလာနိုင်တဲ့အရေးအတွက်လည်း ပင်တဂွန်က စိုးရိမ်မှုရှိခဲ့ပါတယ်။
ရုရှားဟာ ဒီဇင်ဘာနဲ့ ဇန်နဝါရီလက မြောက်ကိုရီးယား ထောက်ပံ့ထားတဲ့ တာဝေးပစ် ပဲ့ထိန်းဒုံးကျည်တွေသုံးကာ ယူကရိန်းကို တိုက်ခိုက်ခဲ့ပါတယ်။ အမေရိကန်က လူသိရှင်ကြားနဲ့ရော လျှို့ဝှက်သတိပေးမှုတွေပါလုပ်ပြီး ဒီလက်နက်တွေသုံးမတိုက်ဖို့ ပြောခဲ့ပေမယ့် အသုံးပြုခဲ့ခြင်းဖြစ်တယ်လို့လည်း အမေရိကန်အရာရှိက ပြောဆိုခဲ့ပါတယ်။
Ref: The Straits Times
