ပါကစ္စတန်နိုင်ငံ ဆိပ်ကမ်းမြို့ ကရာချိမှာ သောကြာနေ့က ဂျပန်နိုင်ငံသား ကားထုတ်လုပ်ရေးလုပ်သားတွေ တင်ဆောင်လာတဲ့ ဗင်ကားအနီးမှာ အေ-သခံဗုံးခွဲသမားတစ်ဦးက သူ့ရဲ့ ဖောက်ခွဲရေးပစ္စည်းဝတ်စုံကို ဖောက်ခွဲပစ်ခဲ့ပေမယ့် ဂျပန်လုပ်သားတွေ ကံသီစွာ အသက်ဘေးလွတ်ခဲ့ပြီး လမ်းပေါ်သွားလာနေသူ သုံးဦး ထိခိုက်ဒဏ်ရာရမှုဖြစ်ခဲ့တယ်လို့ ရဲတပ်ဖွဲ့က ပြောဆိုပါတယ်။
ဂျပန်လုပ်သား ငါးဦး ပါဝင်တဲ့ကားဟာ ၎င်းတို့အလုပ်လုပ်တဲ့ Pakistan Suzuki Motors ရှိရာ စက်မှုဇုံဧရိယာကို ဦးတည်သွားရောက်နေစဉ် တိုက်ခိုက်ခံခဲ့ရတာဖြစ်တယ်လို့ ဒေသဆိုင်ရာရဲချုပ် အာရှတ် အေဝမ်က ပြောဆိုပါတယ်။ တိုက်ခိုက်ခံရချိန်မှာ ဂျပန်လုပ်သားတွေကို စောင့်ရှောက်လိုက်ပါလာတဲ့ ရဲတပ်ဖွဲ့က တုန့်ပြန်ပစ်ခတ်ခဲ့တာကြောင့် အေ-သခံဗုံးခွဲသမားရဲ့ အပေါင်းအပါတစ်ဦး ေ-သဆုံးခဲ့ပြီး ဗုံးခွဲသမားရဲ့ ကြွင်းကျန်ရုပ်အလေ-ာင်းကိုလည်း အခင်းဖြစ်နေရာကနေ တွေ့ရှိခဲ့တယ်လို့ ဆိုပါတယ်။
တိုက်ခိုက်မှုမှာ ပစ်မှတ်ထားခံရတဲ့ ဂျပန်နိုင်ငံသားအားလုံး လုံခြုံဘေးကင်းခဲ့တယ်လို့ ရဲချုပ်က ဆက်လက် ပြောဆိုခဲ့ပါတယ်။
ဂျပန်နိုင်ငံသားတွေကို တိုက်ခိုက်ခဲ့တာနဲ့ ပတ်သက်ပြီး ပါကစ္စတန်သမ္မတ အဆစ်အလီ ဇာဒါရီနဲ့ ဝန်ကြီးချုပ် ရှာရှ်ဘတ်ဇ် ရှရစ်ဖ်တို့က ရှုတ်ချခဲ့ကြပါတယ်။
တိုက်ခိုက်မှုအပေါ် အလျင်အမြန် တုန့်ပြန်ဆောင်ရွက်ကာ တိုက်ခိုက်မှု မအောင်မြင်အောင် ဟန့်တားနိုင်ခဲ့တဲ့ ရဲတပ်ဖွဲ့ကိုလည်း ၎င်းတို့က သီးခြားထုတ်ပြန်ချက်တွေမှာ ချီးကျူးခဲ့ကြပါတယ်။ ဒါ့အပြင် အကြမ်းဖက်ဝါဒကို ချေမှုန်းပစ်မယ်လို့ ၎င်းတို့က ကတိပြုခဲ့ပြီး ဒဏ်ရာရသူတွေ အမြန်ဆုံးသက်သာလာစေဖို့ ဆုတောင်းခဲ့ကြပါတယ်။
ပါကစ္စတန်နိုင်ငံရှိ တရုတ်ငွေကြေးထည့်ဝင်လုပ်ငန်းအမျိုးမျိုးနဲ့ အခြားစီမံကိန်းများရှိ နိုင်ငံခြားသားတွေကို တိုက်ခိုက်မှုဖြစ်လာနိုင်တယ်ဆိုတဲ့ သတင်းတွေရရှိပြီးနောက် ရဲတပ်ဖွဲ့က ဗင်ကားကို စောင့်ရှောက်လိုက်ပါပေးခဲ့တာဖြစ်တယ်လို့ အကြီးတန်းရဲအရာရှိ Tariq Mastoi က ပြောဆိုပါတယ်။ ရဲတပ်ဖွဲ့၊ အစောင့်တွေဟာ တိုက်ခိုက်မှုအပေါ် အချိန်ကိုက် လျင်မြန်စွာ တုန့်ပြန်ကာ ကျရှုံးမှုဖြစ်စေခဲ့ပြီး တိုက်ခိုက်သူနှစ်ဦးလုံးကို သုတ်သင်နိုင်ခဲ့တယ်လို့ ၎င်းက ပြောဆိုခဲ့ပါတယ်။
လတ်တလောမှာ တိုက်ခိုက်မှုကို ဘယ်အဖွဲ့အစည်းက လုပ်ဆောင်တယ်ဆိုတာ မသိရကြောင်း သတင်းမှာ ဖော်ပြပါတယ်။
Ref: ဝါရှင်တန်ပို့စ်
