ပြီးခဲ့သည့် ဩဂုတ်လ (၇) ရက် နောက်ပိုင်း မိုးသည်း၍ ဖြစ်ပေါ်နေသည့် လမ်းခရီးခက်ခဲမှုများကြောင့် မြဝတီ – ရန်ကုန် ကားခနှစ်ဆကျော် မြင့်တက်လာခဲ့ကြောင်းမြဝတီမြို့တွင်နေထိုင်သူ တစ်ဦးကပြောသည်။
ဩဂုတ်လ (၇) ရက် နံနက်ပိုင်းက ကော့ကရိတ် – မြဝတီ တောင်တက်လမ်းပိုင်း လမ်းပြိုကျပျက်ဆီးမှုဖြစ်ပေါ်ခဲ့ပြီးနောက်ပိုင်းတွင် မြဝတီ – ရန်ကုန် ခရီးသည်တင် Express ယာဉ်ကြီးများ ပြေးဆွဲနိုင်ခြင်း မရှိတော့ဘဲ ယာဉ်ငယ်များဖြင့်သာ ပြေးဆွဲနေကြခြင်းဖြစ်ကြောင်း သိရသ ည်။
ယခင် အာရှလမ်းပိုင်းမပျက်စီးမီက မြဝတီ – ရန်ကုန် ယာဉ်စီးခသည် ကျပ်နှစ်သောင်းခွဲကျပ်ဖြစ်ပြီး လမ်းပျက်စီးပြီးနောက် ကားကြီးများ မသွားနိုင်သဖြင့် ကားလေးများဖြင့်သာ သွားလာနေရသည့်အတွက် ယာဉ်စီးခမှာ ၆၀၀၀၀ ကျပ်မှ ၇၀၀၀၀ ကျပ်အထိ မြင့်တက်သွားကြောင်း သိရသည်။
“ကားခက ၇၀၀၀၀ ဖြစ်သွားပြီ။ လမ်းပန်းဆက်သွယ်ရေးတွေက ခက်ခဲတာရယ်၊ ဆီဈေးတတ်တာရယ်၊ အဲဒါကြောင့်ပါ” ဟု မြဝတီ – ရန်ကုန်ပြေးဆွဲပေးနေသည့် လူစီးယာဉ်ငယ်လိုင်းတစ်ခုမှ တာဝန်ရှိသူတစ်ဦးက ပြောသည်။
လက်ရှိတွင် မြဝတီ – ရန်ကုန် ခရီးသည်ပို့ဆောင်ရေးလမ်းကြောင်းကို ဒေါနတောင်လမ်းဟောင်းမှ ရန်ကုန်သို့သွားလာကြသည့် ယာဉ်လိုင်းများရှိသလို မြဝတီမှ ကော့ကရိတ်မြို့အထိ ကားလေးများဖြင့် သွားရောက်ကာကော့ ကရိတ်မှတဆင့် ကားကြီးပြောင်းစီး၍ သွားလာနေကြရခြင်းဖြစ်ကြောင်း သိရသည်။
ပြီးခဲ့သည့် ဩဂုတ်လ (၇) ရက် နံနက်ပိုင်းက အာရှလမ်းသစ်၊ နတ်စင်ကွေ့၊ တောနော်ရေတံခွန်အနီးတွင် လမ်းပြိုကျမှု ဖြစ်ပွားခဲ့ပြီး မည်သည့်ကားမှ ဖြတ်သန်းသွားလာ၍ မရတော့သည့်အပြင် ထိုင်း-မြန်မာ နယ်စပ်ကုန်သွယ်ရေးထိုလမ်းကြောင်းမှအသုံးပြု၍မရ ဖြစ်နေသေးသည်။
အဆိုပါ ပျက်စီးသွားသော အာရှလမ်းပိုင်းကို ဘေလီသံပေါင်တံတားထိုးရန် သက်ဆိုင်ရာမှ စီစဉ်နေပြီး မြဝတီ ကုန်သွယ်ရေးဇုန်နှင့် ကုန်သွယ်နေသည့် ပို့ကုန်/သွင်းကုန် လုပ်ငန်းရှင်များကိုလည်း ကုန်သွယ်မှုနှောင့်နှေးကြန့်ကြာမှုမရှိစေရန်အတွက် အခြားသော နယ်စပ်ကုန်သွယ်ရေးစခန်းများမှ ကုန်သွယ်ခွင့်ပြုထားကြောင်း သိရသည်။
Photo -စော OK
