၂၀၂၃ ယခုနှစ်ဟာ ကမ္ဘာကြီးကိုပြောင်းလဲစေမည့် AI နည်းပညာရဲ့စွမ်းဆောင်ရည်ကြောင့် အမှတ်ရစရာတွေကျန်ရစ်စေမည့်နှစ်တစ်နှစ်ဖြစ်လာပါလိမ့်မယ်။ သင့်အနေနဲ့ ChatGPT ကိုသုံးပြီးရင် အရင်နဲ့တူတော့မှာမဟုတ်ဘူးဆိုတဲ့စကားကို OpenAI ကုမ္ပဏီရဲ့ ChatGPT chatbot ကသက်သေပြနိုင်ခဲ့ပါပြီ။
ယနေ့ခေတ်ရဲ့နည်းပညာအပြောင်း အလဲတစ်ရပ်ကို မိမိတို့အနေနဲ့မြင်တွေ့ခွင့်ရနေပြီဖြစ်ပါတယ်။ မနှစ်က OpenAI ကုမ္ပဏီအနေနဲ့ Dall-E2 Image generator ကိုပွဲထုတ်ပြသပြီးတဲ့နောက် 2022 ခုနှစ်၊နိုဝင်ဘာလမှာတော့ လူတွေရဲ့လက်ထဲကို ChatGPT chatbot ထည့်ပေးနိုင်ခဲ့ပါပြီ။
အဲ့လိုထည့်ပေးပြီးတဲ့ နောက်မှာတော့ ChatGPT အသုံးပြုသူဦးရေဟာ တောမီးလောင်ကျွမ်းသွားလိုပဲ နှစ်လ အတွင်း သန်း ၁၀၀ ကျော်ချက်ချင်း ပျံ့နှံ့သွားခဲ့ပါတယ်။ နှစ်လအတွင်း အခုလို သန်းတစ်ရာ ကျော်အသုံးပြုသူဦးရေတိုးတက်လာခြင်းဟာ သမိုင်းဝင်စေခဲ့ပြီး တစ်နှစ်တာအတွက် အကောင်းဆုံး Chatbot တစ်မျိုးဖြစ်လာစေခဲ့ပါတယ်။
ယခင်က AI Chatbot ပေါင်းများစွာရှိခဲ့ပေမည့် အခုလို ChatGPT ရဲ့စွမ်းဆောင်ရည်လို မျိုးတော့ မရှိခဲ့ကြပါဘူး။ ChatGPT ရဲ့အရှည်ကောက်ကတော့ Chat Generative Pre-trained Transformer ပဲဖြစ်ပါတယ်။
ChatGPT ဆိုတာ အသိဉာဏ်တု AI ကိုစကားလုံး ပေါင်း ဘီလျံနဲ့ချီမှတ်သားထားနိုင်ဖို့ လေ့ကျင့်ပေးထားတဲ့ chatbot တစ်မျိုးပဲဖြစ်ပါတယ်။ ChatGPT ဟာ စာအုပ်ပေါင်း ဘီလျံချီပြီးဖတ်ထားတယ်၊ ဘီလျံနဲ့ချီတဲ့ အင်တာနက် စာမျက်နှာပေါင်းများစွာကစာတွေကိုလည်းဖတ်ထားတယ်၊ ဝီကီပီးဒီးယားမှာရှိတဲ့ ဘီလျံချီ တဲ့အချက် အလက်တွေကိုလည်းမှတ်သားထားတယ်။ ဘယ်လောက်အထိတောင် မှတ်သား ထားလဲဆိုရင် 2021 ခုနှစ်၊ ဇွန်လအထိ အင်တာနက်မှာရှိသမျှ သိမှတ်ဖွယ်အကုန်လုံးကို အသေးစိတ်ကျယ်ကျယ်ပြန့်ပြန့် မှတ်သားထားပြီးဖြစ်တယ်။ ဒီလိုအချက်အလက်တွေ မှတ်သားဖို့ကို GPT 3.5 model ကိုလေ့ကျင့်ပေးထားတယ်။
အခုလိုအဖိုးတန်ပညာဗဟုသုတရတနာသိုက်ကြီးကို အခကြေးငွေမယူဘဲ လူတွေရဲ့ လက်ထဲကိုထည့်ပေးပြီးတဲ့နောက်မှာလည်း ChatGPT ကို အသုံးပြုသူပေါင်းများစွာနဲ့ အပြန်အလှန်ဆက်သွယ်ပြောဆိုနိုင်ဖို့ လေ့ကျင့်ပေးထားသလို သူ့ရဲ့အရည်အသွေးတွေ တိုးတက်လာစေဖို့ လူသားတွေရဲ့ကြီးကြပ်မှုနဲ့အတူ ထိန်းကျောင်းပေးထားတယ်။
ChatGPT အသုံးပြုခြင်းရဲ့အကျိုးရလဒ်ကတော့ အံ့ဩဖွယ်ပါပဲ။ ChatGPT ရဲ့စာရေး စွမ်းရည်ဟာ လူသားအများစုထက်တောင်ပိုကောင်းနေတာတွေ့ရတယ်။ ဘယ်လို အကြောင်းအရာမျိုးကိုမဆို မီလီစက္ကန့်ပိုင်းအတွင်း ခလုပ်လေးတစ်ချက်နှိပ်လိုက်ယုံနဲ့တင် ရေးသားပေးနိုင်စွမ်းရှိပြီး လူသားစာရေးဆရာတစ်ဦးကရေးထားတာလားလို့ခွဲရခက်၊ ခန့်မှန်းရခက်လောက်အောင်ကောင်းမွန်တဲ့ အရေးအသားပုံစံမျိုးကို ChatGPT ကပေးစွမ်း နိုင်ပါတယ်။ ကျိုးကြောင်းဆီလျော်တဲ့ဆွေးနွေးချက်တွေကို ထုတ်ပေးနိုင် ယုံတင်မကဘဲ အကြောင်းအရာနိဂုံးချုပ်ဖို့အတွက် အဓိကအချက်အလက်တွေကိုတောင် ရေးပေးနိုင်စွမ်း ရှိပါတယ်။ သူ့ရဲ့စာသားတည်ဆောက်ထားတာတွေ၊ ဆက်စပ်တွေးခေါ်ရေးသားထားတာ တွေဟာ လူသားတွေကတောင်ပြန်ပြီး လေးစားဖွယ်ပါပဲ။
သင်ပြောဆိုလိုက်တဲ့စကားတွေကို မှတ်မိနေယုံတင်မကဘဲ သင်မေးလိုက်တဲ့မေးခွန်းနဲ့ ပတ်သက်ပြီး အသေးစိတ်ချဲ့ထွင်ကာ ပြန်ဖြေပေးပါတယ်။ ကိုယ်ရေးခိုင်းလိုက်လို့ ထွက်လာတဲ့ အကြောင်းအရာနဲ့ပတ်သက်ပြီး စိတ်ထဲမှာ ကျေနပ်မှုမရှိသေးရင် ပြန်ပြင်ပြီး ရေးခိုင်းတာမျိုး၊ ပိုကောင်းအောင်ရေးဖို့ကိုလည်း ခိုင်းနိုင်ပါသေးတယ်။
ChatGPT ရဲ့ စွမ်းဆောင်ရည်တွေကို ဆက်လက်ပြီး ဖော်ပြပေးသွားပါမယ်။
ဥာဏ်ဝေ
