မန္တလေးတိုင်း၊ ပြင်ဦးလွင်မြို့နယ်ရှိ မန္တလေး-လားရှိုးရထားလမ်းပိုင်း၌ မိုးသည်းထန်စွာရွာသွန်းမှုကြောင့် တွဲ(၂)တွဲပါ ဂုတ်ထိပ်-၁ အဆန် ပြင်ဦးလွင်-ဂုတ်ထိပ်ပြေးဆွဲပေးနေသော RBE ရထားလမ်းချော်ကျခဲ့မှု သြဂုတ် ၁ ရက်နံနက် ၈ နာရီ ၁၅ မိနစ်ကျော်ခန့်ကဖြစ်ပွားခဲ့ကြောင်း သိရသည်။
အဆိုပါ ရထားသည် ပြင်ဦးလွင်ဘူတာမှထွက်ခွာလာစဥ် ပြင်ဦးလွင်ဘူတာနှင့် ပွဲကောက်ဘူတာကြား၏ မိုင်တိုင်အမှတ် ၄၂၆/ ၃နှင့် ၄၂၆/ ၄ ကြား ပြင်ဦးလွင်မှ မိုးကြိုးပစ်ကျေးရွာသို့ဖောက်လုပ်ထားသော မြေသားလမ်းနှင့် ရထားသံလမ်းတရားမဝင်လမ်းကူးကိုဖြတ်သန်းစဉ် မိုးသည်းထန်စွာရွာသွန်းမှုကြောင့် ရထားသံလမ်းပေါ် သဲများနှင့် မြေသားများဖုံးလွှမ်းနေသဖြင့် ရထားတွဲဆိုင်းပါ ဦးဆောင်တွဲ RBE-30106 တစ်တွဲလမ်း ချော်ကျခဲ့ကြောင်း သိရသည်။
ဖြစ်စဥ်ကြောင့် ရထားဝန်ထမ်းများနှင့် လိုက်ပါလာသည့် ခရီးသည်များတွင်ထိခိုက်ဒ-ဏ်ရာရရှိမှုမရှိခဲ့ဘဲ ခရီးသည်များအား ပြင်ဦးလွင်ဘူတာသို့ အခြားရထားတစ်စင်းဖြင့်ပြန်လည်ခေါ်ဆောင်ပေးကာ လက်မှတ်ခငွေများကိုပြန်လည်ပေးအပ်ခဲ့ကြောင်း သိရသည်။
ထို့ပြင် မြန်မာ့မီးရထားမှ တာဝန်ရှိသူများနှင့် သံလမ်းတွဲလုပ်သားများက လမ်းချော်ကျခဲ့သည့် ရထားတွဲအား’ မ ‘တင်ခြင်းနှင့် ရထားလမ်းပြုပြင်ခြင်းတို့ကို ဆောင်ရွက်လျက်ရှိကြောင်း သိရသည်။