FDA Myanmar မှစားသုံးရန်မသင့်သည့် အစားအသောက် ၃၇ မျိုးစာရင်းအား အသိပေးထုတ်ပြန်

ကျန်းမာရေးဝန်ကြီးဌာန၊အစားအသောက်နှင့်ဆေးဝါးကွပ်ကဲရေးဦးစီးဌာန(FDA Myanmar)မှ စားသုံးရန်မသင့်သည့် အစားအသောက် ၃၇ မျိုးစာရင်းအား ဖေဖော်ဝါရီ ၁၈ ရက်က အသိပေးထုတ်ပြန်ခဲ့သည်။

FDA Myanmar မှထုတ်ပြန်ခဲ့သည့် စားသုံးရန်မသင့်သည့် အစားအသောက် ၃၇ မျိုးတွင် Benzoic acid ၊ Sodium Cyclamate ၊ Residual So2 ၊ Sodium Benzoate ၊ Potassium Sorbate ၊ Potassium Sorbate တို့အားသတ်မှတ်ပမာဏထက်ပိုမိုသုံးစွဲထားခြင်း၊ ခွင့်မပြုဆိုးဆေး Rhodamine B ၊ Orange ll ၊ Auramine O များပါဝင်ခြင်း၊အဏုဇီဝသတ်မှတ်ချက်ဖြင့် ကိုက်ညီမှုမရှိခြင်းတို့ကိုတွေ့ရှိခဲ့ရကြောင်း သိရသည်။

ယင်း အစားအသောက်များအား ရေရှည်စားသုံးမိပါက အစာအိမ်၊အသည်း၊ကျောက်ကပ်များပျက်စီးနိုင်ခြင်းနှင့်ကင်ဆာရောဂါများဖြစ်ပွားစေနိုင်၍ အသိပေးထုတ်ပြန်ခဲ့သည့် စားသုံးရန်မသင့်သော အစားအသောက် ၃၇ မျိုးအား နောက်ထပ်ကြေညာချက်ထုတ်ပြန်သည်အထိ စားသုံးခြင်းမပြုရန် အသိပေးခဲ့သည်။

ရွှေအုပ်တံဆိပ် မက်မန်းယို၊ ကောင်းဟိန်း တံဆိပ်ဇီးယို၊ ဘုရင်မ တံဆိပ်မက်မန်းသီး(အနီ)၊ ရုပ်ပုံပါ မန်ကျည်းဖလိတ်ပြား၊ 123 တံဆိပ်သရက်ယို၊ Hong Yuan တံဆိပ်ဇီးသီးယို၊ MK တံဆိပ်မက် မန်းသီး(အနီ)၊ ASA(Kisses You)တံဆိပ် Heart Jelly ၊ LANTERN တံဆိပ်(ပုလင်း)Bubble Gum ၊ Fruity တံဆိပ်(ပလတ်စတစ်ခွက်)အချိုရည် တို့ဖြစ်သည်။

ထို့ပြင် ဇမ္ဗူကျော် တံဆိပ်ရှောက်သီးတော်ဖီအစပ်၊ မမော် တံဆိပ်ဇယန်းလက်ဖက်အစို၊ အေးအေးအောင် တံဆိပ်သစ်သီးယိုစုံ၊ New Choice တံဆိပ်မက်မွန်သီးအနီ၊ ABC(rainbow) တံဆိပ်(ပလတ်စတစ်ပုလင်း)စတော်ဘယ်ရီအရသာအချိုရည်၊ ခြင်္သေ့မင်း တံဆိပ်ငရုတ်ဆီ၊ Lucky Tiger တံဆိပ်ငရုတ်ဆီ၊ Sun Light တံဆိပ်(ပလတ်စတစ်ပုလင်း)ကိုလာအရသာအချိုရည်၊ ဇယန်းရွှေတောင် တံဆိပ်ပဲကြီးလှော်၊ အက်ရှင် တံဆိပ်စံဂျူး၊ ကံသာရွှေဇီးလုံးကြီး တံဆိပ်ဇီးသီးပေါင်း၊ ဝါလေး တံဆိပ်မက်မန်းသီးအနီ၊ ဂွန်းဂွန်း တံဆိပ်ပုန်းရည်ကြီး၊ ရုပ်ပုံပါ ခေါက်မုန့်အနီ တို့လည်းပါဝင်သည်ဟု ထုတ်ပြန်ခဲ့သည်။

အရီးလေး တံဆိပ်အောင်လံပုန်းရည်ကြီး၊ မေပုလဲ တံဆိပ်မက်မန်းသီးအနီ၊ မေပုလဲ တံဆိပ်သစ်သီးယို၊ ရွှေဒင်္ဂါး တံဆိပ်သာကူချောင်း၊ ထူးရှယ် တံ ဆိပ်ငါးပိ၊ Thailand စာသားပါ(ပလတ်စတစ်ပုလင်း)ယိုးဒယားငါးပိရည်၊ Thailand စာသားပါ (ပလတ်စတစ်အိတ်)ကြက်ကြောလုံး၊ TP Food တံဆိပ်ကြက်ကြောလုံး၊ City Food Squid တံဆိပ် ရေဘဝဲချောင်း၊ Thailand စာသားပါ(ပလတ်စ တစ်အိတ်)ပုဇွန်လုံး၊ Shenglong တံဆိပ်ပုဇွန်လုံး၊တရုတ်စာသားပါ(ပလတ်စတစ်အိတ်)ပုဇွန်လုံးနှင့် Thailandစာသားပါ(ပလတ်စတစ်အိတ်)တို့ဟူးတို့ကိုလည်း စားသုံးရန်မသင့်ကြောင်း FDA Myanmar ကအသိပေးထုတ်ပြန်ခဲ့သည်။

အစားအသောက်ထုတ်လုပ်၊ဖြန့်ဖြူး၊ရောင်းချသူများသည် အစားအသောက်တွင် သုံးစွဲရန်ခွင့်မပြုသော ဆိုးဆေးများ၊ခွင့်မပြုတာရှည်ခံ ဓာတုပစ္စည်းများကို လုံးဝအသုံးမပြုရန်၊ ခွင့်ပြုအစားအသောက်ထပ်ဖြည့်ဓာတုပစ္စည်းများကို သတ်မှတ်ပမာဏအတွင်းသာ အသုံးပြုရန်တို့အား လိုက်နာခြင်းမရှိပါက အမျိုးသားအစားအသောက်ဥပဒေပုဒ်မ ၂၈(က)အရ အရေးယူခံရမည်ဟု အသိပေးထားသည်။