တတိယအကြိမ် ဧရာဝတီတိုင်းဒေသကြီးလွှတ်တော် ဒုတိယပုံမှန်အစည်းအဝေး အဋ္ဌမနေ့ကို ယနေ့ ဇွန် ၁၅ ရက်ကကျင်းပရာ ဧရာဝတီတိုင်းရှိ ဧရာဝတီမြစ်ရေကာ တာနှင့် ငဝန်ရေကာတာတို့နှင့်ပတ်သက်၍ တိုင်းအစိုးရ အဖွဲ့ကိုတိုက်တွန်းသည့်အဆိုတင်သွင်းခဲ့ကြောင်း သိရသည်။
“ဧရာဝတီတိုင်းဒေသကြီးအတွင်း ဧရာဝတီမြစ်ရေကာ တာနှင့် ငဝန်ရေကာတာများကို မိုးရာသီရေကြီးမြင့်၍ ရေကာတာများမကျိုးပေါက်စေရေးအတွက် တာတမံများကြံ့ခိုင်မှုကောင်းမွန်စေရေး တိုင်းဒေသကြီးအစိုးရ အဖွဲ့အားတိုက်တွန်းကြောင်း”အဆိုကို ဦးကျော်ဝင်းနိုင် လေးမျက်နှာ(၁)လွှတ်တော်ကိုယ်စားလှယ်က တင်သွင်းခဲ့ခြင်းဖြစ်ကြောင်း သိရသည်။
၎င်း၏ အဆိုတင်သွင်းမှုကို လွှတ်တော်ကိုယ်စားလှယ်တစ်ဦးကထောက်ခံဆွေးနွေးပြီးနောက် ယင်း အဆိုနှင့်ပတ်သက်၍ လွှတ်တော်တွင်လက်ခံဆွေးနွေးရန် လွှတ်တော်၏သဘောထားရယူခြင်းနှင့် ဆွေးနွေးမည့်လွှတ်တော်ကိုယ်စားလှယ်များ အမည်စာရင်းပေးသွင်းနိုင်ခြင်းတို့ပြုလုပ်ခဲ့ကြောင်း သိရသည်။
ထို့ပြင် လွှတ်တော်ကိုယ်စားလှယ်များက ကြယ်ပွင့်ပြမေးခွန်း(၁၁)ခုဖြစ်သည့် အခြေခံစာသင်ကျောင်းများကိစ္စ၊ ဆရာဝန်လိုအပ်ချက်၊ ဒေသဖွံ့ဖြိုးရေးတို့ကိုမေးမြန်းဆွေးနွေးရာ သက်ဆိုင်ရာ တာဝန်ရှိသူများကပြန်လည်ဖြေကြားခဲ့ကြကြောင်း သိရသည်။