အားကောင်းသောမုန်တိုင်းငယ် မြန်မာနိုင်ငံဘက် ဦးတည်ခြင်းမရှိ၊

စက်တင်ဘာ ၂၅ ရက်အထိ ဒေသအချို့ မိုးဆက်ရွာမည် မြန်မာ့ကမ်းရိုးတန်းနှင့် ပင်လယ်ပြင်တွင် လှိုင်းကြီးနိုင်၍ ရေကြောင်းနှင့် ရေလုပ်ငန်းများ သတိပြုရန် မိုးဇလအသိပေး နေပြည်တော်၊ စက်တင်ဘာ ၂၃ ဘင်္ဂလားပင်လယ်အော်အတွင်း ဖြစ်ပေါ်နေသည့် အားကောင်းသောမုန်တိုင်းငယ်သည် မြန်မာနိုင်ငံဘက်သို့ ဦးတည်ရွေ့လျားမည့် အခြေအနေမရှိဘဲ အိန္ဒိယနိုင်ငံကမ်းခြေဘက်သို့ ဦးတည်ရွေ့လျားနေကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ သိရသည်။ အဆိုပါ အားကောင်းသောမုန်တိုင်းငယ်သည် မြန်မာနိုင်ငံဘက်သို့ ဦးတည်ရွေ့လျားမည့် အခြေအနေမရှိသဖြင့် အဝါရောင်အဆင့် သတ်မှတ်ထားပြီး အနောက်နှင့် အနောက်မြောက်ဘက်သို့ ဆက်လက်ရွေ့လျားကာ အိန္ဒိယနိုင်ငံ အန္ဓရပရာဒေ့ရှ်မြောက်ပိုင်းနှင့် ဩရိဿပြည်နယ်တောင်ပိုင်း ကမ်းခြေတို့ကို ဖြတ်ကျော်နိုင်ကြောင်း ခန့်မှန်းထားသည်။ သို့သော် မုန်တိုင်းငယ်၏ အရှိန်ကြောင့် စက်တင်ဘာ ၂၅ ရက်အတွင်း စစ်ကိုင်း၊ ကချင်၊ ရှမ်း၊ ရန်ကုန်၊ မန္တလေး၊ ဧရာဝတီနှင့် ရခိုင်အပါအဝင် တိုင်းဒေသကြီးနှင့် ပြည်နယ်အချို့တွင် မိုးထစ်ချုန်းရွာသွန်းမှုများ ဆက်လက်ဖြစ်ပေါ်နိုင်ကြောင်း သိရသည်။ ထို့ပြင် မြန်မာ့ကမ်းရိုးတန်းနှင့် ပင်လယ်ပြင်တို့တွင် လှိုင်းကြီးနိုင်သဖြင့် လေကြောင်း၊ ရေကြောင်းနှင့် ရေလုပ်ငန်းများအနေဖြင့် ကြိုတင်သတိပြုကြရန် မိုးဇလက အသိပေးထားသည်။