သတ္တုတွင်းဦးစီးဌာနရုံးကို ယာယီပြောင်းရွှေ့ထားပြီး စစ်ဆေးချက်ရလဒ်အပေါ်မူတည်၍ ဘေးအန္တရာယ်ကာကွယ်ရေး ဆက်လက်ဆောင်ရွက်မည်
တောင်ကြီး၊ စက်တင်ဘာ ၂၃
တောင်ကြီးမြို့၊ သစ်တောရပ်ကွက်ရှိ သတ္တုတွင်းဦးစီးဌာနရုံးအဆောက်အအုံ ပျ-က်စီးခဲ့သည့် ဘုရားတောင် ကျောက်တုံးကြီးလိမ့်ကျမှုဖြစ်စဉ်အပြီး တောင်ထိပ်ရှိ ကျောက်သားများ ထပ်မံပြိုကျနိုင်ခြေရှိ၊ မရှိကို ဘူမိဗေဒပညာရှင်များနှင့် အင်ဂျင်နီယာများပါဝင်သည့် အထူးအဖွဲ့က ကွင်းဆင်းစစ်ဆေးလျက်ရှိကြောင်း ရှမ်းပြည်နယ်အစိုးရအဖွဲ့ထံမှ သိရသည်။
ကျောက်တုံးကြီးလိမ့်ကျမှုကြောင့် သတ္တုတွင်းဦးစီးဌာန ရုံးအဆောက်အအုံတစ်လုံး ပျ-က်စီးခဲ့ပြီး ထပ်မံပြိုကျလာနိုင်သည့် ဘေးအန္တရာယ်ကို ကြိုတင်ကာကွယ်နိုင်ရန် အဆိုပါရုံးကို အခြားနေရာသို့ ယာယီပြောင်းရွှေ့ထားပြီးဖြစ်သည်။
လက်ရှိတွင် တောင်ကြီး ဘူမိဗေဒဌာနမှ ဒုတိယညွှန်ကြားရေးမှူး၊ နေပြည်တော်မှ ညွှန်ကြားရေးမှူးနှင့် အင်ဂျင်နီယာများပါဝင်သည့် ပညာရှင်အဖွဲ့က ကျောက်တုံးပြိုကျခဲ့သည့်နေရာနှင့် တောင်ထိပ်ရှိ ကျောက်သားအခြေအနေများကို ကွင်းဆင်းစစ်ဆေးနေကြောင်း သိရသည်။
စစ်ဆေးဆန်းစစ်မှု အစီရင်ခံစာထွက်ရှိလာပါက ရှမ်းပြည်နယ်အစိုးရနှင့် ပြည်ထောင်စုအစိုးရထံ တင်ပြသွားမည်ဖြစ်ပြီး ရလဒ်အပေါ်မူတည်၍ ဘေးအန္တရာယ်ကာကွယ်ရေးဆိုင်ရာ နောက်ဆက်တွဲလုပ်ငန်းများကို အကောင်အထည်ဖော် ဆောင်ရွက်သွားမည်ဖြစ်သည်။
အဆိုပါ ဘုရားတောင်အနီးဝန်းကျင်တွင် ၂၀၂၅ ခုနှစ် မတ် ၂၈ ရက်က လှုပ်ခတ်ခဲ့သည့် စစ်ကိုင်းငလျင်ကြီး ဖြစ်ပွားစဉ်ကလည်း တောင်ပေါ်မှ ကျောက်တုံးကြီးများ ပြိုကျခဲ့ဖူးကြောင်း သိရသည်။
Photo credit- SSB Tgi TT