လာမည့် မေလ ၁ ရက်နေ့တွင် ကျရောက်မည့် အပြည်ပြည်ဆိုင်ရာ အလုပ်သမားနေ့ကို ကြိုဆိုဂုဏ်ပြုသောအားဖြင့် အလုပ်သမားဝန်ကြီးဌာနမှ ဝန်ထမ်းများသည် လူ့အသက်ပေါင်းများစွာကို ကယ်တင်နိုင်မည့် စုပေါင်းသွေးလှူဒါန်းပွဲကို နေပြည်တော်၌ ခမ်းနားစွာ ကျင်းပခဲ့ကြသည်။ ဧပြီလ ၂၈ ရက် နံနက်ပိုင်းက နေပြည်တော် ပြည်သူ့ဆေးရုံကြီး (ခုတင်-၁၀၀၀) တွင် ပြုလုပ်သည့် ဤလှုပ်ရှားမှုတွင် ဝန်ထမ်းပေါင်း ၇၂ ဦးက စေတနာအပြည့်ဖြင့် ပါဝင်လှူဒါန်းခဲ့ကြခြင်း ဖြစ်သည်။
အဆိုပါ စုပေါင်းသွေးလှူဒါန်းပွဲသို့ ပြည်ထောင်စုဝန်ကြီး ဦးခင်မောင်စိုးနှင့် တာဝန်ရှိသူများ တက်ရောက်ကြည့်ရှု အားပေးခဲ့ကြပြီး သွေးလှူရှင်ဝန်ထမ်းများကို အားဆေးများနှင့် အာဟာရဖြည့်စွက်စာများ ပေးအပ်ခဲ့ကြသည်။ ထို့ပြင် ပြည်ထောင်စုဝန်ကြီးက ဆေးရုံကြီး၏ ကုသရေးလုပ်ငန်းများတွင် အသုံးပြုနိုင်ရန်အတွက် အလှူငွေကျပ် သိန်း ၃၀ ကိုလည်း ဆေးရုံအုပ်ကြီးထံ ပေးအပ်လှူဒါန်းခဲ့သည်။
သွေးလှူဒါန်းခြင်းသည် လူနာများအတွက် အသက်ဆက်နိုင်မည့် နည်းလမ်းဖြစ်သဖြင့် လက်ရှိတွင် မြန်မာနိုင်ငံ၌ သွေးလှူရှင်များအတွက် ပိုမိုလွယ်ကူစနစ်ကျစေမည့် သွေးလှူရှင်မှတ်တမ်းစနစ် (Blood Donor Database) နှင့် စမတ်ကတ်စနစ်များကို အသုံးပြုကာ စနစ်တကျ လက်ခံလျက်ရှိသည်။ သွေးအိတ်များကိုလည်း လိုအပ်သည့်နေရာတွင် ချက်ချင်းအသုံးပြုနိုင်ရန် သွေးအုပ်စုအလိုက် အအေးခန်းများတွင် စနစ်တကျ သိုလှောင်ထားသလို၊ အရေးပေါ်လိုအပ်ချက်ရှိလာပါက ချိတ်ဆက်နိုင်မည့် On-call သွေးလှူရှင်ကွန်ရက်များလည်းရှိသည်။