အရေးပေါ်ကယ်ဆယ်ရေးအဖွဲ့ကို ဆိုးလ်က နီပေါသို့ စေလွှတ်

နီပေါနိုင်ငံ ရာဆူဝါဒေသတွင် ရေကြီးရေလျှံခဲ့ပြီးနောက် ရှာဖွေကယ်ဆယ်ရေးလုပ်ငန်းများကို ပံ့ပိုးရန်အတွက် တောင်ကိုရီးယားနိုင်ငံက အဖွဲ့ဝင် ၄၄ ဦးပါ သော အရေးပေါ်ကယ်ဆယ်ရေးအဖွဲ့တစ်ဖွဲ့ကို နီပေါနိုင်ငံသို့ စေလွှတ်မည်ဖြစ်ကြောင်း တောင်ကိုရီးယားနိုင်ငံခြားရေးဝန်ကြီးဌာနက အင်္ဂါနေ့တွင် ပြောကြားသည်။

ရေဘေးသင့်ဒေသတွင် ရှာဖွေကယ်ဆယ်ရေးလုပ်ငန်းများ၌ အကူအညီပေးရန် နီပေါနိုင်ငံက တောင်းဆိုခဲ့ပြီးနောက် ယခုကဲ့သို့ စေလွှတ်ခြင်းဖြစ်ကြောင်း သတင်း ထုတ်ပြန်ချက်တွင် ဝန်ကြီးဌာနက ပြောကြားခဲ့သည်။

ဝန်ကြီးဌာနနှင့် မီးသတ်ဌာနမှ အရာရှိများအပါအဝင် ကယ်ဆယ်ရေးအဖွဲ့သည် အင်္ဂါနေ့တွင် စစ်ဘက်သယ်ယူပို့ဆောင်ရေးလေယာဉ်ဖြင့် နီပေါနိုင်ငံသို့ ထွက်ခွာမည်ဖြစ်ပြီး ၁၀ ရက်ခန့် လုပ်ငန်းဆောင်ရွက်သွားမည်ဖြစ်ကြောင်း ပြောကြားခဲ့သည်။

ပြီးခဲ့သည့် သီတင်းပတ်က ရေကြီးရေလျှံပြီးနောက်တွင် တောင်ကိုရီးယားနိုင်ငံသည် ရေအားလျှပ်စစ်စီမံကိန်းတစ်ခုတွင် ပျောက်ဆုံးလျက်ရှိသော တောင်ကိုရီးယားလုပ်သား ကိုးဦးကို ရှာဖွေရန် အရေးပေါ်တုန့်ပြန်ရေးအဖွဲ့တစ်ဖွဲ့ကို နီပေါနိုင်ငံသို့ စေလွှတ်ထားပြီးဖြစ်သည်။

နီပေါစစ်တပ်က ချမှတ်ထားသည့် လေယာဉ်ပျံသန်းမှုကန့်သတ်ချက်များကြောင့် ဘေးအန္တရာယ်ကျရောက်ရာနေရာသို့ သွားရောက်မည့် ထိုအဖွဲ့၏ ကနဦးကြိုးပမ်းမှုများမှာ ကြန့်ကြာခဲ့သည်။ ခွင့်ပြုချက်ရရှိပြီးနောက်တွင်မူ သြဂုတ်လ ၂၉ ရက်နေ့မှစ၍ အရေးပေါ်တုန့်ပြန်ရေးအဖွဲ့သည် သံသယဖြစ်ဖွယ်နေရာပေါ်တွင် လေကြောင်းရှာဖွေရေးမစ်ရှင်များကို ဆောင်ရွက်လျက်ရှိကြောင်း တောင်ကိုရီးယားမီဒီယာများက သတင်းဖော်ပြခဲ့သည်။

Ref: သယ်ပရင့်စ်