နေပြည်တော်၊ ဇူလိုင် ၁၇
အသစ်ဖွဲ့စည်းထားသည့် အမျိုးသမီးရေးရာဝန်ကြီးဌာန၏ ရည်မှန်းချက်များ၊ ရှေ့လုပ်ငန်းစဉ်များနှင့် လာမည့် (၅) နှစ်အတွင်း အကောင်အထည်ဖော်မည့် လုပ်ငန်းအစီအစဉ်များကို ပြည်သူများသိရှိနိုင်ရေး ဆောင်ရွက်မည့်အစီအမံများနှင့် ပတ်သက်၍ တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၂၄) ရက်မြောက်နေ့တွင် လှိုင်သာယာ (အရှေ့ပိုင်း) မဲဆန္ဒနယ်မှ ကိုယ်စားလှယ် ဦးအေးချမ်းက မေးမြန်းခဲ့သည်။
ထို့ပြင် ရန်ကုန်မြို့အပါအဝင် မြို့ကြီးများတွင် လိင်ပိုင်းဆိုင်ရာလုပ်ငန်းဖြင့် အသက်မွေးဝမ်းကျောင်းပြုနေသည့် အမျိုးသမီးများ၏ အရေအတွက်ကို လာမည့် (၅) နှစ်အတွင်း လျှော့ချနိုင်ရေးအတွက် အစီအစဉ်များရှိ၊ မရှိနှင့် လူကုန်ကူးမှု၊ လိ-င်ပိုင်းဆိုင်ရာအကြမ်းဖက်မှုများ လျော့နည်းစေရေး၊ KTV နှင့် မာဆတ်လုပ်ငန်းများတွင် ခေါင်းပုံဖြတ်ခံနေရသည့် အမျိုးသမီးများနှင့် စားဝတ်နေရေးအခက်အခဲကြောင့် ရုန်းကန်နေရသည့် အမျိုးသမီးများ၏ လူမှုစီးပွားဘဝနှင့် လုပ်ငန်းခွင်လုံခြုံရေးအတွက် ဝန်ကြီးဌာန၏ ကာကွယ်စောင့်ရှောက်ရေးနှင့် ဘဝမြှင့်တင်ရေးအစီအစဉ်များကိုလည်း သိရှိလိုကြောင်း မေးမြန်းခဲ့သည်။
ယင်းမေးခွန်းများကို အမျိုးသမီးရေးရာဝန်ကြီးဌာန ဒုတိယဝန်ကြီး ဒေါ်စန်းစန်းနွယ်က ပြန်လည်ဖြေကြားခဲ့သည်။
ဒုတိယဝန်ကြီးက အမျိုးသမီးရေးရာဝန်ကြီးဌာနသည် ကုလသမဂ္ဂ၏ စဉ်ဆက်မပြတ်ဖွံ့ဖြိုးမှုပန်းတိုင် (SDG-5) ဖြစ်သည့် ကျား/မ တန်းတူညီမျှရေးနှင့် အမျိုးသမီးများ၊ အမျိုးသမီးငယ်များ၏ စွမ်းပကားမြှင့်တင်ရေးကို အကောင်အထည်ဖော်ဆောင်ရွက်လျက်ရှိကြောင်း ပြောကြားသည်။
ထို့အပြင် အမျိုးသမီးများနှင့် အမျိုးသမီးငယ်များ၏ စွမ်းပကားမြှင့်တင်ရေး၊ ကာကွယ်စောင့်ရှောက်ရေး၊ လူမှုရေးဝန်ဆောင်မှုများ လက်လှမ်းမီရေး၊ ငြိမ်းချမ်းရေးနှင့် ဖွံ့ဖြိုးတိုးတက်ရေးလုပ်ငန်းစဉ်များတွင် အဓိပ္ပာယ်ရှိစွာ ပါဝင်နိုင်ရေး၊ ကျား/မ တန်းတူညီမျှရေး၊ အမျိုးသမီးများအပေါ် အကြမ်းဖက်မှုများ တားဆီးကာကွယ်ရေးနှင့် ထိရောက်စွာ တုံ့ပြန်ဆောင်ရွက်ရေးတို့ကို ဦးစားပေးလုပ်ငန်းစဉ်များအဖြစ် ဆောင်ရွက်လျက်ရှိကြောင်း ရှင်းလင်းပြောကြားခဲ့သည်။
မြန်မာနိုင်ငံအနေဖြင့် လိ-င်ပိုင်းဆိုင်ရာအကြမ်းဖက်မှုများကို လုံးဝလက်မခံသည့် မူဝါဒဖြင့် ဆောင်ရွက်လျက်ရှိပြီး ပဋိပက္ခအတွင်း လိ-င်ပိုင်းဆိုင်ရာအကြမ်းဖက်မှုများကို ကြိုတင်ကာကွယ်ရေး၊ ကာကွယ်စောင့်ရှောက်ရေး၊ စုံစမ်းစစ်ဆေးရေးနှင့် တုံ့ပြန်ဆောင်ရွက်ရေးတို့အတွက် အမျိုးသားအဆင့် လုပ်ငန်းစီမံချက်ကို ရေးဆွဲအကောင်အထည်ဖော်လျက်ရှိကြောင်းလည်း ပြောကြားခဲ့သည်။
ထို့ပြင် အဆိုပါ လုပ်ငန်းစီမံချက်၏ အကောင်အထည်ဖော်မှု တိုးတက်မှုများကို ကုလသမဂ္ဂ လိ-င်ပိုင်းဆိုင်ရာအကြမ်းဖက်မှုဆိုင်ရာ အထူးကိုယ်စားလှယ်ရုံးသို့ နိုင်ငံခြားရေးဝန်ကြီးဌာနမှတစ်ဆင့် (၆) လတစ်ကြိမ် ပုံမှန်အစီရင်ခံတင်ပြလျက်ရှိကြောင်း ဒုတိယဝန်ကြီးက ဖြေကြားခဲ့ကြောင်း သိရသည်။
