အစိုးရက ထိန်းချုပ်မှုများ လုပ်ဆောင်ပြီးနောက် တစ်ပတ်ကျော်ကြာချိန်တွင် ဒေါ်လာစျေး ၃၄၉၀ အထိပြန်ဆင်းလာ
ဈေးကွက်အတွင်း ဒေါ်လာဈေးနှုန်း စံချိန်တင် မြင့်တက်ခဲ့မှုကို အစိုးရက ထိန်းချုပ်လိုက်သည့်နောက် တစ်ပတ်ကျော် ကြာပြီးနောက် ဒေါ်လာဈေးနှုန်းမှာ ၃၅၀၀ ပတ်ဝန်းကျင်တွင် အရောင်းအဝယ်ဖြစ်နေကြောင်း ဒေါ်လာအရောင်းအဝယ် ပြုလုပ်သူများထံမှ သိရသည်။
ပြီးခဲ့သည့် ဩဂုတ်လကုန်ပိုင်းက ပြည်တွင်းဈေးကွက်တွင် အမေရိကန် (၁) ဒေါ်လာကို မြန်မာငွေ (၄၅၀၀) ကျပ်အထိ စံချိန်တင်မြင့်တက်ခဲ့ရာက လက်ရှိအချိန်ထိ (၃၅၀၀) ပတ်ဝန်းကျင်တွင် ဈေးပေါက်နေခြင်း ဖြစ်သည်။
” (၁) ဒေါ်လာ (၃၄၉၀) ကျပ် အရောင်းအဝယ် လုပ်ပါတယ်” ဟု ပြည်တွင်းနိုင်ငံခြားငွေ ငွေလဲကောင်တာတစ်ခုမှ တာဝန်ရှိသူတစ်ဦးက ပေါ်ပြူလာနယူးစ်သို့ ပြောသည်။
ဩဂုတ်လ နောက်ဆုံးပတ်အတွင်းက အခြေအနေဆိုးရွာစွာ ဈေးကစားမှုများနှင့် ပြည်တွင်း သွင်းကုန်လုပ်ငန်းရှင်များ၏ နိုင်ငံခြားငွေ လိုအပ်ချက်မြင့်မားမှုကြောင့် ဈေး ကွက်အတွင်း ဒေါ်လာဈေး စံချိန်တင်မြင့်တက်မှုနှင့် ကြုံ တွေ့ခဲ့ရခြင်း ဖြစ်သည်။
အစိုးရက အဆိုပါ လိုအပ်ချက်ကို ထိန်းချုပ်သည့်အနေ ဖြင့် အမေရိကန်ဒေါ်လာ သန်း ၂၀၀ ကျော် ဈေးကွက်အတွင်း ထုတ်ချေးပေးခဲ့ရာက တစ်ရက်အတွင်း ကျပ်(၁၀၀၀) ဝန်းကျင် ဈေးပြုတ်ကျခဲ့ပြီးနောက် လက်ရှိအချိန်တွင် ၃၄၉၀ ဝန်းကျင်ဖြင့် အရောင်းအဝယ်ပြုလုပ်ပြီး စျေးကွက်အနေအထား အေးလျက်ရှိသည်။
အဆိုပါ ကန်ဒေါ်လာ သန်း ၂၀၀ ကျော်ကို အစိုးရက ပြည် တွင်းရှိ နိုင်ငံခြားငွေ အများဆုံး လိုအပ်သည့် စက်သုံးဆီနှင့် စားသုံဆီ တင်သွင်းသူများကို ထုတ်ချေးပေးခဲ့ခြင်း ဖြစ်ပြီး ယင်းသို့လုပ်ဆောင်မှုကြောင့် ဒေါ်လာဈေးမြင့်တက်မှုကို ထိန်းချုပ်နိုင်မည်ဟု အစိုးရက မျှော်မှန်းထားခြင်း ဖြစ်သည်။
ထို့အပြင် စက်သုံးဆီနှင့် စားသုံးဆီ တင်သွင်းသူများအနေဖြင့် ဒေါ်လာငွေ လိုအပ်ချက် ရှိပါက ထပ်မံထုတ်ချေးပေးသွားမည့်အပြင် ဒေါ်လာဈေးနှုန်း မြင့်တက်စေရန် ရည်ရွည်ချက်ရှိရှိ ဈေးကစားနေသူများနှင့် မီဒီယာများကို ထိရောက်စွာ အရေးယူဆောင်ရွက်သွားမည်ဖြစ်ကြောင်းလည်း ဗဟိုဘဏ်က ပြောကြားထားသည်။
လက်ရှိတွင် ဗဟိုဘဏ်ရည်ညွှန်းဈေးမှာ (၁) ဒေါ်လာ (၂၁၀၀) ကျပ် သတ်မှတ်ထားပြီး ပြင်ပ ဈေးကွက်တွင် (၁) ဒေါ်လာ (၃၅၀၀) ဝန်းကျင်ဈေးပေါက်လျက်ရှိကြောင်းလည်း ဒေါ်လာအရောင်းအဝယ်ဈေးကွက်အတွင်းမှ သိရသည်။