၂၀၂၅-၂၀၂၆ ပညာသင်နှစ် တက္ကသိုလ်ဝင်စာမေးပွဲတွင် အင်းစိန်ဗဟိုအကျဉ်းထောင်မှ အကျဉ်းသား ၃၆ ဦး ဖြေဆိုအောင်မြင်ခဲ့ပြီး ရာနှုန်းပြည့်အောင်မြင်မှုကို (၅) နှစ်ဆက်တိုက် ရရှိခဲ့ကြောင်း မြန်မာနိုင်ငံအမျိုးသားလူ့အခွင့်အရေးကော်မရှင်၏ ထုတ်ပြန်ချက်အရ သိရသည်။
၂၀၂၅-၂၀၂၆ ပညာသင်နှစ် တက္ကသိုလ်ဝင်စာမေးပွဲအောင်စာရင်းများကို ၂၀၂၆ ခုနှစ် ဇွန် ၂၈ ရက်တွင် ထုတ်ပြန်ကြေညာခဲ့ရာ နိုင်ငံတစ်ဝန်း စာမေးပွဲအောင်ချက်ရာခိုင်နှုန်းမှာ ၅၂ ဒသမ ၃၇ ရာခိုင်နှုန်းရှိခဲ့ပြီး အကျဉ်းဦးစီးဌာနလက်အောက်ရှိ အင်းစိန်ဗဟိုအကျဉ်းထောင်မှ ဖြေဆိုသူ အကျဉ်းသား ၃၆ ဦးစလုံး အောင်မြင်ခဲ့ကြောင်း သိရသည်။
ထို့ပြင် မန္တလေးဗဟိုအကျဉ်းထောင်မှ အကျဉ်းသား ၁၀ ဦးလည်း တက္ကသိုလ်ဝင်စာမေးပွဲ အောင်မြင်ခဲ့သဖြင့် အကျဉ်းဦးစီးဌာနလက်အောက်ရှိ အကျဉ်းထောင်များမှ စုစုပေါင်း အကျဉ်းသား ၄၆ ဦး အောင်မြင်ခဲ့ကြောင်း ထုတ်ပြန်ချက်တွင် ဖော်ပြထားသည်။
မြန်မာနိုင်ငံအမျိုးသားလူ့အခွင့်အရေးကော်မရှင်က ပညာရေးတွင် ရင်းနှီးမြှုပ်နှံခြင်းသည် လူတစ်ဦးချင်းစီ၏ အနာဂတ်ကိုသာမက နိုင်ငံ၏ ယှဉ်ပြိုင်နိုင်စွမ်းနှင့် ရေရှည်ဖွံ့ဖြိုးတိုးတက်ရေးအတွက်လည်း မရှိမဖြစ်အရေးပါသည့် ရင်းနှီးမြှုပ်နှံမှုတစ်ရပ်ဖြစ်ကြောင်း ထုတ်ပြန်ခဲ့သည်။
ထို့အပြင် ၂၀၂၅-၂၀၂၆ ပညာသင်နှစ် တက္ကသိုလ်ဝင်စာမေးပွဲ အောင်မြင်ခဲ့ကြသည့် ကျောင်းသား၊ ကျောင်းသူများအားလုံးကို ဂုဏ်ယူဝမ်းမြောက်ကြောင်းနှင့် အကျဉ်းထောင်များရှိ အကျဉ်းသား၊ အကျဉ်းသူများ၊ လူငယ်သင်တန်းကျောင်းများရှိ ကလေးသူငယ်များနှင့် မသန်စွမ်းကျောင်းများမှ သင်ယူသူများ ပညာသင်ယူခွင့်များ ဆက်လက်ရရှိနိုင်ရေးကို အားပေးပံ့ပိုးဆောင်ရွက်ပေးသွားမည်ဟု ယုံကြည်မျှော်လင့်ကြောင်းလည်း ကော်မရှင်က အသိပေးထုတ်ပြန်ထားသည်။
