သူသည်တရုတ်သွေးနှောပါဟုပေတုံတန်ကတရုတ်ခရီးသွားများကိုပြောကြား

ထိုင်းနိုင်ငံသို့ လာရောက်လည်ပတ်ကြသည့် တရုတ်ခရီးသွားများအနေဖြင့် ဘေးကင်းလုံခြုံမှုကို စိုးရိမ်ပူပန်မှုများ လျော့ပါးစေရေးအတွက် ထိုင်းဝန်ကြီးချုပ် ပေတုံတန်က ယခုသီတင်းပတ်အတွင်း ပြောကြားခဲ့ရာ၌ သူသည်ပင်လျှင် တရုတ်သွေးနှောသူဖြစ်ကြောင်းနှင့် တရုတ်နိုင်ငံသားများ လုံခြုံဘေးကင်းရေးအတွက် လုံခြုံရေးဆိုင်ရာ လုပ်ငန်းစဉ်များကို ကိုယ်တိုင်ကိုယ်ကျ စစ်ဆေးကြည့်ရှု့ခဲ့သည်ဟု ဆိုသည်။

ပြီးခဲ့သည့်လက ထိုင်းနိုင်ငံသို့ သွားရောက်ခဲ့သော တရုတ်သရုပ်ဆောင်လူငယ်တစ်ဦး ကို မြန်မာဘက်ရှိ ငွေလိ-မ်ဂိုဏ်းတစ်ခုဆီမှ ပြန်လည်ကယ်တင်ခဲ့ရသည့် ဖြစ်စဉ်ပေါ်ပေါက်ခဲ့သည်။ ယင်းနောက်ပိုင်းမှစကာ ထိုင်းနိုင်ငံ၏ အဓိကပြည်ပခရီးသွားအုပ်စုဖြစ်သည့် တရုတ်နိုင်ငံသားများအတွက် ထိုင်းနိုင်ငံအတွင်း ဘေးကင်းလုံခြုံရေးမှာ ဆွေးနွေး ပြောဆိုစရာ ကိစ္စ တစ်ရပ်ဖြစ်နေခဲ့သည်။

“ထိုင်းလူမျိုးတွေက တရုတ်နိုင်ငံကို ကိုယ့်အိမ်လိုသဘောထားပြီး အမြဲလာကြတယ်၊ ဒီလိုပဲ တရုတ်လူမျိုးတွေလည်း ထိုင်းနိုင်ငံကို ကိုယ့်အိမ်ရာလို သဘောထားပြီး လာနိုင်ကြမယ်လို့ ကျွန်မ မျှော်လင့်ပါတယ်” ဟု မစ္စပေတုံတန်က ပေကျင်းတွင် နိုင်ငံပိုင် ချိုင်းနားဒေးလီးသတင်းဌာနသို့ ကြာသပတေးနေ့က ပြောကြားခဲ့သည်။

အခြေခံအဆောက်အဦ၊ လျှပ်စစ်ကားများနှင့် ဒစ်ဂျစ်တယ်စီးပွားရေးကဏ္ဍများတွင် တရုတ်နိုင်ငံနှင့် ပူးပေါင်းဆောင်ရွက်မှု အားကောင်းစေရေးအပြင် သူ၏ မွေးရပ်မြေသို့ လာရောက်သည့် တရုတ်ပြည်သူများကို ယုံကြည်စိတ်ချမှုပေးရေးမှာလည်း ထိပ်တန်းဦးစားပေးဖြစ်ပါသည်ဟု ဆိုခဲ့သည်။

ရာဇဝတ်ဂိုဏ်းများကို ထောက်ပံ့ ဖြန့်ဖြူးပေးထားသော လျှပ်စစ်နှင့် ရေကို ဖြတ်တောက်ခြင်းဖြင့် နိုင်ငံဖြတ်ကျော် ရာဇဝတ်မှုများကို နှိမ်နင်းရာတွင် ထိုင်းနိုင်ငံ၏ ကြိုးပမ်းအားထုတ်မှုများကို တရုတ်သမ္မတ ရှီကျင့်ဖျင်က ချီးကျူးခဲ့သည်ဟု ထိုင်းအစိုးရက ပြောသည်။

“ရှင်တို့သိမှာပါ၊ ထိုင်းဝန်ကြီးချုပ်ဖြစ်တဲ့ ကျွန်မက တရုတ်သွေးနှောဆိုတာကို” ဟု ပေတုံတန်က ပြောခဲ့ပြီး “တရုတ်ပြည်သူတွေအတွက် ဘေးကင်းလုံခြုံမှုကောင်းကောင်းပေးနိုင်တယ်လို့ ကျွန်မ အာမခံပါတယ်” ဟု ပြောကြားခဲ့သည်။

Ref: ဘန်ကောက်ပို့စ်