နေပြည်တော်၊သြဂုတ်-၄
ရန်ကုန်-မန္တလေး အမြန်လမ်းမကြီး မိုင်တိုင် ၁၄၃/၆ အနီးတွင် ယနေ့ (ဩဂုတ် ၄ ရက်) နံနက်ပိုင်းက မော်တော်ယာဉ်တစ်စီး အင်ဂျင်ခန်းမှ မီးစတင်လောင်ကျွမ်းမှုဖြစ်ပွားခဲ့ပြီး ယာဉ်တစ်စီးလုံး မီးလောင်ပျက်စီးသွားခဲ့ကြောင်း အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့ထံမှ သိရသည်။
ဖြစ်စဉ်မှာ ယနေ့ နံနက် ၆ နာရီခွဲခန့်တွင် ရန်ကုန်မှ နေပြည်တော်သို့ မောင်းနှင်လာသည့် Toyota Alphard အဖြူရောင်ယာဉ်သည် မိုင်တိုင် ၁၄၃/၆ အနီးအရောက်၌ ယာဉ်၏ အချက်ပြမီး လင်းလာသဖြင့် လမ်းဘေးရပ်တန့်ကာ ရှေ့စက်ဖုံး ဖွင့်ကြည့်စဉ် အင်ဂျင်ခန်းအတွင်းမှ မီးစတင်လောင်ကျွမ်းခဲ့ခြင်းဖြစ်သည်။
အဆိုပါ မီးလောင်မှုကြောင့် ယာဉ်တစ်စီးလုံး ပျက်စီးသွားခဲ့သော်လည်း ယာဉ်ပေါ်ပါလာသည့် ယာဉ်မောင်းအပါအဝင် အမျိုးသား ၅ ဦးစလုံး ထိခိုက်ဒဏ်ရာရရှိခြင်းမရှိဘဲ ဘေးကင်းစွာ ထွက်ခွာနိုင်ခဲ့ကြောင်း သိရသည်။
ဖြစ်စဉ်နှင့်ပတ်သက်၍ အမြန်လမ်းမကြီး ထိန်းသိမ်းပြုပြင်ရေးနှင့် ကြီးကြပ်ရေးအဖွဲ့က အမြန်လမ်းအသုံးပြုသူ ယာဉ်မောင်းများအနေဖြင့် ခရီးမထွက်မီ မိမိတို့၏ ယာဉ်ကြံ့ခိုင်မှုကို စနစ်တကျ စစ်ဆေးကြရန်နှင့် သတ်မှတ်အရှိန်နှုန်းများဖြစ်သည့် အိမ်စီးယာဉ်များအတွက် ၁ နာရီလျှင် ကီလိုမီတာ ၁၀၀ (100 km/h) ထက်မပိုရေး၊ ကုန်တင်နှင့် ပစ်ကပ်ယာဉ်များအတွက် ၁ နာရီလျှင် ကီလိုမီတာ ၆၀ (60 km/h) ထက်မပိုဘဲ မောင်းနှင်ကြရန် အထူးသတိပေးထားသည်။
