အမေရိကန်သမ္မတဟောင်း ဂျိုးဘိုင်ဒင်၏ ဆီးကျိတ်ကင်ဆာသည် သူ့ခန္ဓာကိုယ်၏ အခြားအစိတ်အပိုင်းများသို့ ပျံ့နှံ့သွားကြောင်းနှင့် သူသည် အများပြည်သူဆိုင်ရာ ကိစ္စရပ်များကို ထုတ်ဖော်ပြောဆိုနေဆဲဖြစ်သော်လည်း နာကျင်မှုဝေဒနာခံစားနေရကြောင်း သားဖြစ်သူ ဟန်တာဘိုင်ဒင်က အင်တာဗျူးတစ်ခုတွင် ပြောကြားခဲ့သည်။
သောကြာနေ့အနှောင်းပိုင်းက ဘီဘီစီသတင်းဌာနနှင့် အင်တာဗျူးတွင် ဖခင်၏ အခြေအနေကို ဆွေးနွေးရင်း စိတ်ခံစားမှုများ ပြင်းထန်လာသော ဟန်တာဘိုင်ဒင်က ဖခင်၏ အခြေအနေကို တွေ့မြင်ရသည်မှာ အလွန်ဝမ်းနည်းစရာကောင်းကြောင်း ပြောကြားခဲ့သည်။
“ကင်ဆာက ပျံ့သွားပြီး အရိုးတွေနဲ့ အခြားနေရာတွေထိ ရောက်သွားတယ်” ဟု သူက ပြောကြားခဲ့ပြီး “အရမ်းနာကျင်စေကာ ဘက်ပေါင်းစုံ အားနည်းစေပါတယ်” ဟု ဆိုခဲ့သည်။
အသက် ၈၃ နှစ်အရွယ် ဂျိုးဘိုင်ဒင်သည် အမေရိကန်သမ္မတအဖြစ် တာဝန်ထမ်းဆောင်ခဲ့သော အသက်အကြီးဆုံး အမျိုးသားဖြစ်သည်။ သူ၏ ရာထူးသက်တမ်း လေးနှစ်တာကာလအတွင်း သူ၏ အသက်အရွယ်သည် စိုးရိမ်စရာအကြောင်းအရင်းတစ်ခုဖြစ်သည်။ အထူးသဖြင့် သူ့နေရာကို ဆက်ခံသွားသူ သမ္မတထရမ့်ပ်နှင့် စကားစစ်ထိုးပွဲတစ်ခုတွင် အခြေမလှဖြစ်ခဲ့ပြီးနောက် ပြန်လည်ရွေးကောက်ခံမည့် သူ၏ ကြိုးပမ်းမှုကို စွန့်လွှတ်ခဲ့ရသည်။ သူခံစားနေရသည့် ရောဂါဝေဒနာများ၏ အတိုင်းအတာကို ဖုံးကွယ်ထားသည်ဟူသော စွပ်စွဲမှုများထွက်လာကာ သူနှင့် သူ၏ အိမ်ဖြူတော်အကြံပေးများသည် ပြင်းထန်သော ဝေဖန်မှုများနှင့် ရင်ဆိုင်ခဲ့ရသည်။
အိမ်ဖြူတော်မှ ထွက်ခွာပြီး လေးလမပြည့်မီ ပြီးခဲ့သည့်နှစ် မေလတွင် သူ ကင်ဆာရောဂါဖြစ်နေကြောင်း သမ္မတဟောင်းက ထုတ်ဖော်ပြောကြားခဲ့သည်။
သူ၏ ကင်ဆာရောဂါအခြေအနေသည် Gleason အမှတ် ၉ ကို ရောက်နေပြီဟု စစ်ဆေးတွေ့ရှိခဲ့ပြီး အပြင်းထန်ဆုံးအဆင့်ဖြစ်သည့် Grade Group 5 တွင် ထည့်သွင်းထားကြောင်း သူ၏ရုံးက ထိုအချိန်က ပြောကြားခဲ့သည်။
Ref: စီဘီအက်စ်နူးစ်