ပေကျင်း၊ ဇူလိုင် ၂၈
တရုတ်နိုင်ငံက အရပ်ဘက်အသုံးပြုရန် ရည်ရွယ်ထုတ်လုပ်ထားသည့် ပထမဆုံး တန်ချိန်အဆင့် ဝေးလံခရီးသွား မောင်းသူမဲ့လေယာဉ် (UAV) TP200 ကို ပထမဆုံးအကြိမ် အောင်မြင်စွာ စမ်းသပ်ပျံသန်းနိုင်ခဲ့ကြောင်း တရုတ်မီဒီယာများက ဇူလိုင် ၂၈ ရက်တွင် ဖော်ပြခဲ့သည်။
Yitong UAV System က တီထွင်ထုတ်လုပ်သည့် TP200 သည် တရုတ်နိုင်ငံ၏ လေကြောင်းပျံသန်းမှု အရည်အသွေးစံချိန်စံညွှန်းများနှင့်အညီ တည်ဆောက်ထားပြီး ပင်လယ်ပြင်ကင်းလှည့်ခြင်း၊ ကျွန်းများသို့ ထောက်ပံ့ပစ္စည်းပို့ဆောင်ခြင်း၊ မြေတိုင်းတာရေးနှင့် အခြားအရပ်ဘက်လုပ်ငန်းများတွင် အသုံးပြုနိုင်ရန် ရည်ရွယ်ထားကြောင်း သိရသည်။
တရုတ်၏ Science and Technology Daily သတင်းစာ၏ ဖော်ပြချက်အရ TP200 သည် ဝန်အပြည့်တင်ဆောင်ထားသည့်အခြေအနေတွင် ၂၄ နာရီဆက်တိုက် ပျံသန်းနိုင်ပြီး ကီလိုမီတာ ၃,၀၀၀ အထိ ပျံသန်းနိုင်စွမ်း ရှိသည်။
ထို့ပြင် အဆိုပါဒရုန်းကို ပင်လယ်ပြင်ကင်းလှည့်ခြင်း၊ ကမ်းလွန်ရှာဖွေရေးနှင့် ကယ်ဆယ်ရေးလုပ်ငန်းများ၊ ကမ်းရိုးတန်းစောင့်ကြည့်ရေး၊ ဝေးလံခေါင်ဖျားသော တောင်တန်းနှင့် ကျွန်းဒေသများသို့ အရေးပေါ်ထောက်ပံ့ရေးပစ္စည်းများ ပို့ဆောင်ရေးတို့တွင် အသုံးပြုနိုင်ကြောင်း ဖော်ပြထားသည်။
TP200 သည် အစိတ်အပိုင်းများကို လိုအပ်သလို လဲလှယ်တပ်ဆင်နိုင်သည့် ဒီဇိုင်းဖြင့် ထုတ်လုပ်ထားသဖြင့် မိုးခေါင်ရေရှားမှု စောင့်ကြည့်ရေး၊ တောမီးနှင့် မြက်ခင်းပြင်မီးလေ-ာင်မှု ငြှိမ်းသတ်ရေး၊ မြေပုံရေးဆွဲခြင်း၊ သစ်တောနှင့် ဂေဟစနစ်တိုင်းတာရေးလုပ်ငန်းများတွင်လည်း အသုံးပြုနိုင်ကြောင်း သိရသည်။
ကုမ္ပဏီ၏ ထုတ်ပြန်ချက်အရ TP200 သည် အမြင့် ၇,၆၀၀ မီတာအထိ ပျံသန်းနိုင်ပြီး အမြင့်ဆုံးအမြန်နှုန်းမှာ တစ်နာရီလျှင် ၂၀၀ ကီလိုမီတာ ဖြစ်သည်။ လောင်စာဆီအသုံးပြု အဆိုပါ မောင်းသူမဲ့လေယာဉ်တွင် တည်ငြိမ်စွာ ပျံသန်းနိုင်စေရန် လေစုတ်ပေါက်များ၊ အမြီးပိုင်းပရိုပယ်လာနှင့် ဒေါင်လိုက်တည်ငြိမ်ထိန်းစက်များကို တပ်ဆင်ထားကြောင်း သိရသည်။
Ref: South China Morning Post