ရန်ကုန်၊ စက်တင်ဘာ ၁၁
ရန်ကုန်တိုင်းဒေသကြီး၊ လှည်းကူးမြို့နယ်အတွင်းရှိ ရေလှောင်တမံများ၏ လက်ရှိရေသိုလှောင်ထားရှိမှုအခြေအနေအရ ရာသီဥတု အလွန်အမင်းဖောက်ပြန်မှုမဖြစ်ပါက တမံများမှတစ်ဆင့် ရေကြီးရေလျှံမှုမဖြစ်ပေါ်စေရန် ထိန်းချုပ်နိုင်မည်ဖြစ်ပြီး လာမည့်နွေရာသီအတွက်လည်း ရေလုံလောက်စွာ သိုလှောင်ထားနိုင်ပြီဖြစ်ကြောင်း တမံတာဝန်ရှိသူများထံမှ သိရသည်။
စက်တင်ဘာ ၁၁ ရက် နံနက် ၆ နာရီ တိုင်းထွာချက်များအရ ငမိုးရိပ်တမံတွင် ရေပိုလွှဲမှ ၂ ဒသမ ၁၀ ပေ၊ မဟူရာတမံတွင် ရေပိုလွှဲမှ ၁ ဒသမ ၃၀ ပေ၊ လဂွမ်းပြင်တမံတွင် ရေပိုလွှဲမှ ၀ ဒသမ ၇၅ ပေနှင့် ကလီထော်တမံတွင် ရေပိုလွှဲမှ ၁ ဒသမ ၇၀ ပေ ကျော်လွန်နေကြောင်း သိရသည်။
ပေါင်းလင်းတမံမှာမူ ရေပြည့်မှတ်ရောက်ရှိရန် ၂ ဒသမ ၅၀ ပေ လိုအပ်နေသေးကြောင်း အသိပေးထားသည်။
လက်ရှိတွင် နေ့စဉ်မိုးရွာသွန်းနေသော်လည်း မိုးသည်းထန်စွာ ရွာသွန်းမှုမရှိသဖြင့် တမံများအတွင်း ဝင်ရေနှင့် ထွက်ရေ မျှတလျက်ရှိကြောင်း သိရသည်။ အနိမ့်ပိုင်းနေရာများနှင့် ရေစီးရေလာမကောင်းသည့် နေရာများမှအပ ရေပြန်လည်ကျဆင်းနေပြီဖြစ်သော်လည်း ရေထရက်ဖြစ်နေသဖြင့် အနိမ့်ပိုင်းဒေသများတွင် ရေအကျနှေးနိုင်ကြောင်း သိရသည်။
ငမိုးရိပ်တမံ၌ ယခုနှစ်အတွင်း စက်တင်ဘာ ၁၁ ရက်အထိ မိုးရေချိန် ၈၇ ဒသမ ၀၅ လက်မ ရွာသွန်းထားပြီး နှစ်စဉ်ပျမ်းမျှ မိုးရေချိန် လက်မ ၁၀၀ ပြည့်မီရန် ၁၃ လက်မခန့်သာ လိုအပ်တော့ကြောင်း သိရသည်။
Photo:Ngamoeyeik ID