ယခုရက်သတ္တပတ်အတွင်း ရန်ကုန်မြို့၌ လျှပ်စစ်မီးမပျက်သလောက်ဖြစ်သည်အထိ မီးရချိန် ပိုတိုးလာကာ အချိန်ပြည့်နီးပါး လျှပ်စစ်မီးရရှိလာကြောင်း ရန်ကုန်မြို့ခံများက ပြောသည်။
“မီးမပြတ်တာကြာပြီ။ သူတို့ break downဖြစ်တဲ့ခဏပဲ ပြတ်တယ်။ ပြတ်ရင်လည်း ခဏပဲ။ ပြီးရင် ပြန်ပေးထားတယ်”ဟု သာကေတမြို့နယ်နေသူတစ်ဦးက ပေါ်ပြူလာနယူးစ်ကို ပြောသည်။
နွေရာသီကာလအတွင်း၌မူ အပူချိန်မြင့်တက်သည့်ကာလဖြစ်သည်နှင့်အညီ လျှပ်စစ်ဓာတ်အား အသုံးပြုမှုများခဲ့ခြင်းကြောင့် ဓာတ်အားမလုံလောက်မှုဖြစ်ပြီး လျှပ်စစ်မီးပုံမှန်ပေးနိုင်ရန် အခက်အခဲများရှိခဲ့သည်ဟု ရန်ကုန်လျှပ်စစ်ဓာတ်အားပေးရေးကော်ပိုရေးရှင်းနှင့် နီးစပ်သူတစ်ဦးကလည်း ပြောသည်။
ယခုနောက်ပိုင်းတွင် အပူချိန်အနည်းငယ်လျော့ကျလာခြင်း၊ လျှပ်စစ်ဝန်အား သုံးစွဲမှု လျော့နည်းခြင်းတို့ကြောင့် ဓာတ်အား ဖြန့်ဝေမှုပိုင်းတွင် ရန်ကုန်မြို့၌ လိုင်းအပြစ်ဖြစ်သည်မှလွှဲ၍ ဓာတ်အားကို ပုံမှန်ပေးပို့လျက်ရှိသည်ဟုလည်း သိရသည်။
“ဒီကြားထဲမှာတော့ Load Flowအရ မြို့နယ်တချို့မှာ Plan Load Shedဆောင်ရွက်ထားရတာလေးတွေရှိရင်တော့ ခဏပျက်တာတွေရှိမယ်၊ အတတ်နိုင်ဆုံးတော့ ကြိုးစားပြီး ဖြန့်ဖြူးပေးနေတယ်” ဟု ၄င်းက ဆိုသည်။
မေလ ၁၄ရက်နေ့ နောက်ဆုံးထုတ်ပြန်ချက်တွင်မူ လျှပ်စစ်ဓာတ်အား ထုတ်လုပ်မှုသည် ယင်းတနေ့တာအတွက် ၇၁၄၃၄.၁ မဂ္ဂါဝပ်နာရီ ရှိခဲ့သည်။
ထို့ကြောင့် ပြည်သူများအနေဖြင့်လည်း လိုအပ်သည့် လျှပ်စစ်ဓာတ်အားဝန်အားကိုသာ သုံးစွဲခြင်း၊ မီးလုံးအပိုများကို ပိတ်ခြင်း၊ စနစ်တကျချွေတာပါက တဖက်တလမ်းမှ ကူညီပေးရာရောက်မည်ဟုလည်း အကြံပြုပြောထားသည်။
