ယူရီးယားဓာတ်မြေဩဇာများ တောင်သူလက်ဝယ်အရောက် ဖြန့်ဖြူးမည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။
အရှေ့အလယ်ပိုင်း ပဋိပက္ခဖြစ်ပွားခြင်းကြောင့် ၂ဝ၂၆ ခုနှစ် မတ်လ နောက်ပိုင်း ဟော်မုဇ်ရေလက်ကြား (Strait of Hormuz) ပိတ်ဆို့မှုဖြစ်ပွားခဲ့ခြင်း သည် မြန်မာနိုင်ငံ၏ စိုက်ပျိုးရေးကဏ္ဍနှင့် ယူရီးယားဓာတ်မြေဩဇာ တင်သွင်းမှု အပေါ်ကြီးမားသော ရိုက်ခတ်မှုများ ဖြစ်ပေါ်စေခဲ့သည်။
သို့သော် တိုင်းဒေသကြီး နှင့် ပြည်နယ်အသီးသီးရှိ တောင်သူလက်ဝယ်သို့ ယူရီးယားဓာတ်မြေဩဇာများကို အချိန်မီ ဖြန့်ဖြူးရောက်ရှိနိုင်ရေး သက်ဆိုင်ရာဌာနများ၊ အသင်းအဖွဲ့များနှင့် ပူးပေါင်းဆောင်ရွက်ပေးလျက်ရှိကြောင်း သိရသည်။
ဟော်မုဇ်ရေလက်ကြား ပိတ်ဆို့သွားချိန်တွင် ယူရီးယားဓာတ်မြေဩဇာ သင်္ဘောများဖြတ်သန်းသွားလာရန် အခက်အခဲကြောင့် ယခင်ကဲ့သို့သင်္ဘော ကြီး/ငယ် ရွေးချယ်ဆောင်ရွက်နိုင်ခြင်း မရှိဘဲရေလက်ကြားရှိ သင်္ဘောများဖြင့်သာ ချိတ်ဆက်တင်သွင်းနိုင်ရေး ကြိုးစားဆောင်ရွက်ခဲ့ရပြီး ရေလက်ကြားမှ ကျော်ဖြတ်လာနိုင်သည့် ယူရီးယားဓာတ်မြေဩဇာတန်ချိန် ၅ဝဝဝဝ တင်ဆောင် လာသည့် သင်္ဘောဖြင့်ချိတ်ဆက်၍ မှာယူတင်သွင်း သယ်ဆောင်လာရာတွင် အဆိုပါ သင်္ဘော၏ ရေစူးမှာ ၁၂ ဒသမ ၃၅ မီတာရှိပြီး ရန်ကုန်မြို့ သီလဝါဆိပ် ကမ်းရေစူးမှာ ၁ဝ ဒသမ ၅ဝ မီတာသာရှိ၍ ဝင်ရောက်နိုင်ခြင်းမရှိသည့် အခက်အခဲ ကြုံတွေ့နေရသည်။
လိုအပ်သော ဓာတ်မြေဩဇာကို ပြည်တွင်း၌ ထုတ်လုပ်နေသည့်အပြင် ပြည်ပမှလည်း တင်သွင်းနေရပြီး အရှေ့အလယ်ပိုင်း (ပင်လယ်ကွေ့ဒေသ)မှ ဖြတ်သန်းတင်သွင်းမှုအပေါ် အဓိကမှီခိုနေရပြီး အဆိုပါ အခြေအနေများကြောင့် မော်လမြိုင်မြို့အနီးနှင့် တနင်္သာရီတိုင်းဒေသကြီးအတွင်းရှိ ကျွန်းတို့တွင် ပြောင်း ရွှေ့ ကျောက်ချရပ်နားခြင်း၊ ကုန်စည်လျှော့ချ၍ ဝင်ရောက်ဆိုက်ကပ်နိုင်ရေး ညှိနှိုင်းခြင်းတို့ကို ပြုလုပ်၍ ယူရီးယားဓာတ်မြေဩဇာ တန်ချိန် ၅ဝဝဝဝ အနက် တန်ချိန် ၉၆ဝဝ ခန့်ကို သင်္ဘောငယ်လေးစင်းဖြင့် Ship to Ship Operation ပြုလုပ် ပြီး ရန်ကုန်မြို့ရှိ ဆိပ်ကမ်းများသို့ တစ်ပေါင်းတည်း ဆိုက်ကပ်နိုင်ရန် ဆောင်ရွက် လျက်ရှိကြောင်း သိရသည်။
ယခုအခါ ရန်ကုန်ဆိပ်ကမ်းတွင် သင်္ဘောငါးစင်း ဆိုက်ကပ်၍ ကုန်ချမှု လုပ်ငန်းများ ဆောင်ရွက်လျက်ရှိပြီး ဩဂုတ် ၁၉ ရက်အထိ စုစုပေါင်း ယူရီးယား ဓာတ်မြေဩဇာ တန်ချိန် ၂၂၁၅၅ တန် ဆိပ်ကမ်းချပြီးဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။