ယူကရိန်း၏ စစ်ရေးလိုအပ်ချက်များကို အမျိုးအစားများခွဲကာ ယင်းအမျိုးအစားတစ်ခုစီအတွက် အကူအညီပေးရမည့် နေတိုးအုပ်စုဝင်နိုင်ငံများကို သတ်မှတ်ပေးမည်ဖြစ်ကြောင်း ပင်တဂွန်စစ်ဌာနချုပ်မှ အဆင့်မြင့် ကိုယ်စားလှယ်တစ်ဦးက အင်္ဂါနေ့တွင် ပြုလုပ်သည့် သတင်းစာ ရှင်းလင်းပွဲတွင် ပြောကြားခဲ့သည်။
ယူကရိန်း သို့ လက်နက်များ ပို့ဆောင်ရေး ညှိနှိုင်းဆောင်ရွက်နေသော အနောက်နိုင်ငံများသည် ပူးပေါင်းဆောင်ရွက်မည့် အုပ်စု ရှစ်ခုကို ဖွဲ့စည်းဖန်တီးခဲ့ကြောင်း ပင်တဂွန် ကိုယ်စားလှယ်က ပြောကြားခဲ့သည်။
“ယင်းအုပ်စု တစ်ခုစီသည် ယူကရိန်း၏ စစ်ရေးစွမ်းရည်ဆိုင်ရာ ရှုထောင့်တစ်ခုစီကို ကိုယ်စားပြုပြီး အနည်းဆုံး သီးခြားနေတိုးနိုင်ငံနှစ်ခုမှ ပူးတွဲဦးဆောင်မည်ဖြစ်သည်” ဟု ပင်တဂွန်စစ်ဌာနချုပ်မှ အဆင့်မြင့် ကိုယ်စားလှယ်က ပြောကြားခဲ့သည်။
“ဒီညွန့်ပေါင်းအုပ်စုအဖွဲ့ခေါင်းဆောင်တွေဟာ ယူကရိန်းလေတပ်၊ သံချပ်ကာ၊ အမြောက်၊ မိုင်းတွင်း၊ ဒရုန်း၊ ပေါင်းစပ်လေကြောင်းနဲ့ ဒုံးကျည်ကာကွယ်ရေး၊ သတင်းအချက်အလက်နည်းပညာနဲ့ ရေကြောင်းလုံခြုံရေး လိုအပ်ချက်နဲ့ ရည်မှန်းချက်တွေကို ၂၀၂၇ခုနှစ်အထိ ပြဌာန်းထားတဲ့ လမ်းပြမြေပုံတွေကို ထောက်ခံဖို့ လိုအပ်ပါတယ်” ဟု ပင်တဂွန်ကိုယ်စားလှယ်က ပြောကြားခဲ့သည်။
ယူကရိန်း ကာကွယ်ရေး အဆက်အသွယ်အဖွဲ့၏ ၂၅ ကြိမ်မြောက် အစည်းအဝေးကို ယူကရိန်းသို့ အနောက်နိုင်ငံမှ လက်နက်များ ပို့ဆောင်ရေး ညှိနှိုင်းရေး အဖွဲ့မှ ဇန်နဝါရီ ၉ ရက်တွင် ဂျာမနီနိုင်ငံ ရမ်စတိန်း လေတပ်စခန်း၌ ကျင်းပမည်ဖြစ်ပြီး အမေရိကန် ကာကွယ်ရေးဝန်ကြီး လွိုဒ်အော်စတင် လည်း တက်ရောက်မည်ဖြစ်ကြောင်း သိရသည်။