ဗိုလ်ချုပ်ရာပြည့် ဦးဆောင်သည့် NSPNC အဖွဲ့နှင့် မြောက်ပိုင်းမဟာမိတ်အဖွဲ့ (၃) ဖွဲ့တို့ ယမန်နေ့ ဇွန်လ (၁) ရက်က စတင်ကာ ရှမ်းပြည်အထူးဒေသ(၄) မိုင်းလားမြို့တွင် တွေ့ဆုံဆွေးနွေးနေပြီး မတရားအသင်းအဖြစ်မှ ပယ်ဖျက်ရေးအပါအဝင် ငြိမ်းချမ်းရေးကိစ္စများ ဆွေးနွေးခဲ့ကြောင်း သိရသည်။
တရုတ်၏ ကြားဝင်ညှိနှိုင်းမှုမှတဆင့် ဖြစ်ပေါ်လာသည့် ယခုတွေ့ဆုံဆွေးနွေးမှုတွင် မြန်မာ အမျိုးသား ဒီမိုကရက်တစ်မဟာမိတ်တပ်မတော် (MNDAA)၊ တအာင်းအမျိုးသားလွတ်မြောက်ရေးတပ်မတော် (TNLA) နှင့် ရက္ခိုင့်တပ်တော်(AA) တို့ တက်ရောက်ဆွေးနွေးနေခြင်းဖြစ်ပြီး ယင်း အဖွဲ့ (၃) ဖွဲ့လုံးသည် အပစ်ရပ် လက်မှတ်ရေးထိုးထားခြင်း မရှိသည့် တိုင်းရင်းသားလက်နက်ကိုင်အဖွဲ့များဖြစ်သည်။
ဇွန် (၁) ရက် ဆွေးနွေးပွဲ ပထမနေ့တွင် NSPNC နှင့် ညီနောင်မဟာမိတ် (၃) ဖွဲ့တို့အကြား တိုင်းရင်းသားလက်နက်ကိုင်အဖွဲ့များနှင့် ယုံကြည်မှုတည်ဆောက်ရေး၊ ဖမ်းဆီးထားသူများ ပြန်လည်လွတ်မြောက်ရေး၊ မတရားအသင်းမှ ပယ်ဖျက်ရေးနှင့်”မိုခါ”မုန်တိုင်းဒဏ်သင့်ပြည်သူများထံ လူသားချင်းစာနာထောက်ထားမှုဆိုင်ရာအကူအညီများ အမြန်ဆုံးအဆင်ပြေချောမွေ့စွာ ရောက်ရှိနိုင်ရေးတို့ကိုလည်းဆွေးနွေးခဲ့ကြကြောင်း သိရသည်။
ထို့အပြင် ပါတီစုံဒီမိုကရေစီနိုင်ငံရေးစနစ် ခိုင်မာစေရေး၊ ဖက်ဒရယ် ပြည်ထောင်စု တည်ဆောက်ရေး၊ ပြည်ထောင်စု ငြိမ်းချမ်းရေးနှင့် ဖွံ့ဖြိုးတိုးတက်ရေးအတွက် လက်တွဲပူးပေါင်း အကောင်အထည်ဖော်နိုင်ရေးတို့ကိုလည်း ဆွေးနွေးခဲ့ကြကြောင်း သိရသည်။
ဆွေးနွေးပွဲသို့ အစိုးရ ကိုယ်စားလှယ်အဖွဲ့အနေဖြင့် ဒု – ဗိုလ်ချုပ်ကြီးရာပြည့်၊ ဒု-ဗိုလ်ချုပ်ကြီး ဝင်းဗိုလ်ရှိန်၊ ဒု – ဗိုလ်ချုပ်ကြီး ခင်ဇော်ဦး(ငြိမ်း)၊ တြိဂံဒေသတိုင်း စစ်ဌာနချုပ် ဒု-တိုင်းမှူး ဗိုလ်မှူးချုပ်ထွန်းမြတ်ရွှေနှင့် တာဝန်ရှိသူများတက်ရောက်ခဲ့ပြီး ညီနောင်မဟာမိတ် (၃) ဖွဲ့မှ ထိပ်ပိုင်းခေါင်းဆောင်များ တက်ရောက်ခဲ့ကြောင်း သိရသည်။
လက်ရှိ ဆွေးနွေးဖွဲ့သို့ တရုတ်နိုင်ငံ ယူနန်ပြည်နယ်နိုင်ငံခြားရေးရာ အထူးသံတမန်လည်း တက်ရောက်နေပြီး ယနေ့ ဇွန်လ (၂) ရက်တွင် ဆွေးနွေးပွဲကို ဆက်လက်လုပ်ဆောင်သွားမည်ဖြစ်ကြောင်း သိရသည်။