မြန်မာ–အိန္ဒိယ လမ်းပန်းဆက်သွယ်ရေး ပူးပေါင်းဆောင်ရွက်မှုများ ဆက်လက်အကောင်အထည်ဖော်ရန် ဆွေးနွေး

နေပြည်တော်၊ စက်တင်ဘာ ၁၂

မြန်မာ–အိန္ဒိယ နှစ်နိုင်ငံအကြား လမ်းပန်းဆက်သွယ်ရေးကဏ္ဍ ပူးပေါင်းဆောင်ရွက်မှုများ ဆက်လက်အကောင်အထည်ဖော်ရေးနှင့် နယ်စပ်ကုန်သွယ်မှု ပိုမိုဖွံ့ဖြိုးတိုးတက်ရေးအတွက် ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးမျိုးသန့်နှင့် မြန်မာနိုင်ငံဆိုင်ရာ အိန္ဒိယသံအမတ်ကြီး H.E. Mr. Abhay Thakur တို့ စက်တင်ဘာ ၁၁ ရက်က နေပြည်တော်၌ တွေ့ဆုံဆွေးနွေးခဲ့ကြသည်။

တွေ့ဆုံစဉ် နှစ်နိုင်ငံ ချစ်ကြည်ရင်းနှီးမှုအပေါ် အခြေခံ၍ ပူးပေါင်းဆောင်ရွက်နေသည့် လမ်းပန်းဆက်သွယ်ရေးလုပ်ငန်းများ ဆက်လက်အကောင်အထည်ဖော်ရေးနှင့် အိန္ဒိယနိုင်ငံ၏ အကူအညီဖြင့် ဆောင်ရွက်နေသည့် Quick Impact Project (QIP) စီမံကိန်းလုပ်ငန်းများနှင့်ပတ်သက်၍ အမြင်ချင်းဖလှယ်ခဲ့ကြသည်။

ထို့ပြင် မြန်မာ–အိန္ဒိယ နယ်စပ်ကုန်သွယ်မှုနှင့် ကုန်စည်စီးဆင်းမှု ပိုမိုမြန်ဆန်ချောမွေ့လာစေရေး၊ နယ်စပ်ဒေသပြည်သူများ၏ လူမှုစီးပွားဘဝ ဖွံ့ဖြိုးတိုးတက်ရေးနှင့် ဒေသတွင်းခရီးသွားလုပ်ငန်း ဖွံ့ဖြိုးရေးအတွက် လမ်း၊ တံတားများ အဆင့်မြှင့်တင်ရေးတို့တွင် သတ်မှတ်မူဘောင်များအတွင်း အိန္ဒိယနိုင်ငံဘက်မှ ကူညီပံ့ပိုးနိုင်ရေးကိုလည်း ဆွေးနွေးခဲ့ကြကြောင်း သိရသည်။