မြန်မာ-လာအို မဟာဗျူဟာမြောက် မိတ်ဖက်ဆက်ဆံရေး ပိုမိုခိုင်မာရေး သံရုံးနှင့် စစ်သံရုံးဝန်ထမ်းများ ကြိုးပမ်းဆောင်ရွက်ရန် နိုင်ငံတော်သမ္မတ ဦးမင်းအောင်လှိုင် မှာကြား

လာအိုနိုင်ငံသမ္မတ၏ ဖိတ်ကြားချက်အရ လာအိုနိုင်ငံသို့ တရားဝင်ချစ်ကြည်ရေးခရီးစဉ် ရောက်ရှိနေသော နိုင်ငံတော်သမ္မတ ဦးမင်းအောင်လှိုင်သည် ဇူလိုင် ၄ ရက် ညနေပိုင်းက လာအိုနိုင်ငံဆိုင်ရာ မြန်မာသံရုံး၊ စစ်သံရုံးမှ ဝန်ထမ်းမိသားစုများနှင့် ပညာတော်သင်သင်တန်းသားများအား တွေ့ဆုံ၍ မြန်မာ-လာအို နှစ်နိုင်ငံဆက်ဆံရေး ပိုမိုတိုးတက်ခိုင်မာစေရေးဆိုင်ရာ လမ်းညွှန်မှာကြားခဲ့သည်။ တွေ့ဆုံစဉ် နိုင်ငံတော်သမ္မတက မြန်မာနှင့် လာအိုနိုင်ငံတို့သည် ယုံကြည်စိတ်ချရသည့် အိမ်နီးချင်းကောင်းနိုင်ငံများ၊ မိတ်ဆွေကောင်းနိုင်ငံများဖြစ်ကြောင်း၊ အစဉ်အလာရှိသည့် ချစ်ကြည်ရင်းနှီးမှုနှင့် ဆက်ဆံရေးကောင်းမွန်မှုကို ဆက်လက်ထိန်းသိမ်းမြှင့်တင်သွားရမည်ဖြစ်ကြောင်း ပြောကြားခဲ့သည်။ ထို့ပြင် သံရုံးနှင့် စစ်သံရုံးတို့တွင် တာဝန်ထမ်းဆောင်နေသူများအနေဖြင့် တာဝန်ထမ်းဆောင်စဉ်ကာလအတွင်း နှစ်နိုင်ငံဆက်ဆံရေး ပိုမိုတိုးတက်ကောင်းမွန်လာစေရေးအတွက် အလေးထားဆောင်ရွက်ကြရန် မှာကြားခဲ့သည်။ နိုင်ငံတော်သမ္မတက မြန်မာနှင့် လာအိုနိုင်ငံတို့အကြား မဟာဗျူဟာမြောက် မိတ်ဖက်နိုင်ငံများအဖြစ် အဆင့်မြှင့်တင်နိုင်ရေး ဆောင်ရွက်လျက်ရှိကြောင်း၊ နှစ်နိုင်ငံ နိုင်ငံ့အကြီးအကဲများ၏ ချစ်ကြည်ရေးခရီးစဉ်များကိုလည်း အပြန်အလှန်တိုးမြှင့်ဆောင်ရွက်သွားမည်ဖြစ်ကြောင်း ပြောကြားခဲ့သည်။ ထို့အပြင် အာဆီယံနိုင်ငံများအနက် လာအိုနိုင်ငံသည် မြန်မာနိုင်ငံ၏ နိုင်ငံရေးဖြစ်ပေါ်ပြောင်းလဲမှုများကို နားလည်လက်ခံသည့် နိုင်ငံဖြစ်သဖြင့် နိုင်ငံတော်အဆင့် ချစ်ကြည်ရေးခရီးစဉ်အဖြစ် ဖိတ်ကြားခဲ့ခြင်းဖြစ်ကြောင်းလည်း နိုင်ငံတော်သမ္မတက ပြောကြားခဲ့သည်။ ယင်းနောက် နိုင်ငံတော်သမ္မတက လာအိုနိုင်ငံ၌ အကြောင်းအမျိုးမျိုးကြောင့် ရောက်ရှိနေသည့် မြန်မာနိုင်ငံသားများကို တတ်နိုင်သမျှ စောင့်ရှောက်ကူညီပေးကြရန်၊ စည်းလုံးညီညွတ်စွာ နေထိုင်ကြရန်နှင့် အင်္ဂလိပ်ဘာသာစကား၊ AI နည်းပညာနှင့် ကွန်ပျူတာနည်းပညာဆိုင်ရာ အသိပညာများကို အစဉ်တစိုက် လေ့လာမြှင့်တင်ကြရန်လည်း လမ်းညွှန်မှာကြားခဲ့သည်။