နိုင်ငံတကာပွဲများ ဝင်ရောက်ယှဉ်ပြိုင်မည့် မြန်မာ့လက်ရွေးစင်အမျိုးသမီးအသင်းတွင် အမေရိကန် ကောလိပ်ဘောလုံးအသင်းအဆင့်၌ ကစားနေသည့် မေထက်လူကို ရွေးချယ်ခေါ်ယူထားသည်ကို တွေ့ရသည်။
အမျိုးသမီးလက်ရွေးစင်ဘောလုံးအသင်း၏ လေ့ကျင့်ပြင်ဆင်နေသည့် ဓာတ်ပုံများကို မြန်မာနိုင်ငံဘောလုံးအဖွဲ့ချုပ်က အသိပေးထုတ်စဉ် ကျောနံပါတ် (၃၁)ကို ဝတ်စဉ်ထားသည့် မေထက်လူကို တွေ့မြင်ရခြင်းဖြစ်သည်။
၂၀၂၅ ခုနှစ်အတွင်း နိုင်ငံတကာပြိုင်ပွဲများနှင့် ခြေစမ်းပွဲစဉ်များဝင်ရောက်ယှဉ်ပြိုင်ရန် မြန်မာ့လက်ရွေးစင်အမျိုးသမီးအသင်းအနေဖြင့် ဒီဇင်ဘာ (၂၇)ရက်တွင် လေ့ကျင့်ပြင်ဆင်နေပြီဖြစ်သည်ဟု အဖွဲ့ချုပ်က ထုတ်ပြန်ထားသည်။
သူမသည် မြန်မာနိုင်ငံ၌ နေထိုင်စဉ်အချိန်က မြန်မာ့လက်ရွေးစင် ယူ-၁၆ နှင့် ယူ-၁၉ အသင်းတို့တွင် ရွေးချယ်ခံခဲ့ရဖူးသူတစ်ဦးဖြစ်ပြီး လက်ရှိတွင် ပညာရေးဖြင့် အမေရိကန်နိုင်ငံ၌ နေထိုင်လျက်ရှိကာ အမေရိကန်ကောလိပ်ဘော လုံးအသင်းတစ်ခုဖြစ်သည့် LA Pierce Women’s Soccer အသင်း၌ ဝင်ရောက် ကစားနေခြင်းဖြစ်သည်။
ယခု နှစ်ဘောလုံးရာသီတွင် အသင်းအတွက် ပွဲ(၂၀) ကစားထားသည့်အနက် (၁၀) ဂိုးသွင်းယူထားနိုင်ကာ ဂိုးဖန်တီးမှု(၇)ကြိမ် စွမ်းဆောင်ထားနိုင်ကြောင်း သိရသည်။
ပြီးခဲ့သည့်နှစ် ဘောလုံးရာသီအတွင်းကလည်း LA Pierce Women’s Soccer အသင်း၌ပင် ပါဝင်ကစားခဲ့ကာ (၅)ဂိုးသွင်းယူ၍ ဂိုးဖန်တီးမှု(၃)ကြိမ် လုပ်ဆောင်နိုင်ခဲ့ကြောင်း သိရသည်။
ဓာတ်ပုံ-MFF