ပြိုင်ဆိုင်မှုမြှင့်တင်ရန်အတွက် ရာသီကုန်ရပ်တည်မှုအလိုက် ထောက်ပံ့သည့် စနစ်သစ်ကို ကျင့်သုံးမည်
မြန်မာအမျိုးသမီးလိဂ် ၂၀၂၆-၂၇ ဘော လုံးရာသီ အကြို မိတ်ဖက်အဖွဲ့အစည်းများ လက်မှတ်ရေးထိုးခြင်း အခမ်းအနား (Official Partnership Signing Ceremony)ကို ယနေ့ ဇွန်လ (၁၁) ရက်နေ့ နံနက်ပိုင်းက ရန်ကုန်မြို့ရှိ နိုဗိုတယ်ဟို တယ်၌ ကျင်းပပြုလုပ်ခဲ့ကြောင်း သိရသည်။
ယခုရာသီတွင် မိတ်ဖက်ကုမ္ပဏီများနှင့် လက်တွဲမှုမှတစ်ဆင့် စုစုပေါင်း ငွေကျပ်သိန်းပေါင်း ၂၁,၅၀၀ နှင့် သိန်း ၂,၃၅၀ တန်ဖိုးရှိ ပစ္စည်းထောက်ပံ့မှုများကို လက်ခံရရှိထားသည်။
အဓိကပင်မပံ့ပိုးသူအဖြစ် Max Energy ကုမ္ပဏီက ငွေကျပ်သိန်း ၈,၀၀၀ ပံ့ပိုးပေးထားပြီး Shwe Li Yadanar Estate၊ BYD၊ AYA Pay အပါအဝင် အခြားမိတ်ဖက်ကုမ္ပဏီများကလည်း ကဏ္ဍအလိုက် အ သီးသီး ပါဝင်ပံ့ပိုးထားကြသည်။
ရရှိလာသည့် အလှူငွေများကို ပြိုင်ပွဲဝင်ကလပ်အသင်းများသို့ ပြန်လည်မျှဝေပေးသွားမည်ဖြစ်ကာ ကလပ်အသင်းတစ်သင်းလျှင် အခြေခံထောက်ပံ့ငွေ ကျပ်သိန်း ၅၀၀ စီ ရရှိမည်ဖြစ်ပြီး အိမ်ကွင်းပွဲစဉ်ကျင်းပစရိတ်များကို သီးခြားထောက်ပံ့မည်ဖြစ်သည်။
စံနှုန်းပြည့်မီသည့် အသင်းများအနေဖြင့် Club Development Subsidy အဖြစ် အများဆုံး ကျပ်သိန်း ၂၀၀ အထိ ထပ်မံရရှိနိုင်ကြောင်း အဖွဲ့ချုပ်က အသိပေးထားသည်။
ယခုနှစ်တွင် ပြိုင်ဆိုင်မှုမြှင့်တင်ရန်အတွက် ရာသီကုန်ရပ်တည်မှုအလိုက် ထောက်ပံ့သည့် စနစ်သစ်ကို ကျင့်သုံးမည်ဖြစ်ရာ ချန်ပီယံအသင်းသည် ကျပ်သိန်း ၁,၀၀၀၊ ဒုတိယအသင်းသည် ကျပ်သိန်း ၇၀၀ ရရှိမည်ဖြစ်ပြီး အဆင့် (၁၀) အထိ အဆင့်အလိုက် ငွေကြေးထောက်ပံ့မှုများ ရရှိမည်ဖြစ်သည်။
ပွဲစဉ်တစ်ပွဲချင်းစီ၏ အကောင်းဆုံးက စားသမားဆုအတွက် ဆုတံဆိပ်နှင့်အတူ AYA Pay မှ ငွေသားဆု ကျပ် ၅ သိန်း ချီးမြှင့်မည်ဖြစ်သည်။
မြန်မာအမျိုးသမီးလိဂ် ၂၀၂၆-၂၇ ရာသီကို ၂၀၂၆ ခုနှစ် ဇွန်လ (၁၅) ရက်နေ့မှ ၂၀၂၇ ခုနှစ် ဇန်နဝါရီလ (၃၀) ရက်နေ့အထိ ၈ လကြာ ကျင်းပသွားမည်ဖြစ် သည်။
ယခုနှစ်တွင် ရတနာပုံအက်ဖ်စီနှင့် ဇွဲကပင်ယူနိုက်တက်အက်ဖ်စီ အသင်းသစ်နှစ်သင်း အပါအဝင် စုစုပေါင်း ကလပ်အသင်း (၁၀) သင်းက ရန်ကုန်မြို့ရှိ သုဝဏ္ဏကွင်း၊ ပဒုမ္မာကွင်း၊ Y.U.S.C ကွင်းနှင့် ပုသိမ်မြို့ရှိ ကိုးသိန်းအားကစားကွင်းတို့တွင် လိဂ်ပွဲစဉ်ပေါင်း (၉၀) ယှဉ်ပြိုင်သွားကြမည်ဖြစ်သည်။
အဆိုပါ လိဂ်ပွဲစဉ်များအားလုံးကို Fore ver Group နှင့် ပူးပေါင်းကာ MRTV-4၊ Channel 7၊ Readers Channel ရုပ်သံလိုင်းများနှင့် Pyone Play Sports YouTube တို့မှ တိုက်ရိုက်ထုတ်လွှင့်ပြသသွားမည်ဖြစ်ကြောင်း သိရသည်။
အခမ်းအနားသို့ မြန်မာနိုင်ငံဘောလုံးအဖွဲ့ချုပ် နာယက ဒေါက်တာစိုင်းဆမ်ထွန်း၊ ဥက္ကဋ္ဌ ဦးဇော်ဇော်နှင့် တာဝန်ရှိသူများ၊ မိတ်ဖက်ကုမ္ပဏီများမှ ကိုယ်စားလှယ်များ၊ ကလပ်အသင်းများမှ နည်းပြများနှင့် ကစားသမားများ တက်ရောက်ခဲ့ကြသည်။