ကမ္ဘာ့ရွှေဈေး ဆက်တိုက်ကျဆင်းလာမှုနှင့်အတူ ပြည်တွင်းအခေါက်ရွှေဈေးများလည်း လိုက်ပါကျဆင်းနေပြီး သုံးရက်အတွင်း ကျပ်ငါးသိန်းဝန်းကျင်အထိ ဈေးနှုန်းကျဆင်းခဲ့ကြောင်း ရွှေဈေးကွက်အတွင်းမှ သိရသည်။
ပြည်တွင်းရွှေဈေးကွက်အတွင်းလည်း အခေါက်ရွှေဈေးသည် ဇွန်လဆန်းပိုင်းမှစတင်ကာ ကျပ်သိန်း ၁၀၀ အောက်သို့ ဆက်တိုက်ကျဆင်းနေပြီး ရန်ကုန်တိုင်းရွှေအသင်းမှ ထုတ်ပြန်သည့် ရည်ညွှန်းဈေးများလည်း လျော့ကျလာသည်ကို တွေ့ရသည်။
ဇွန် ၁၂ ရက်နေ့တွင် ရွှေတစ်ကျပ်သား ရည်ညွှန်းဈေး ကျပ် ၆၉ သိန်းခွဲအဖြစ် သတ်မှတ်ထားကြောင်း သိရသည်။ ပြင်ပဈေးကွက်အတွင်း အခေါက်ရွှေတစ်ကျပ်သားလျှင် ကျပ် ၉၇၈၀၀၀၀ ခန့်ရှိနေကြောင်းလည်း ဈေးကွက်အတွင်းမှ သိရသည်။
ကမ္ဘာ့ရွှေဈေးသည် ဇွန် ၉ ရက်နေ့မှ ဇွန် ၁၂ ရက်နေ့ မနက်ပိုင်းအထိ တအောင်စလျှင် အမေရိကန်ဒေါ်လာ ၂၀၀ ကျော် ကျဆင်းခဲ့ပြီး လက်ရှိတွင် တအောင်စလျှင် ဒေါ်လာ ၄၁၀၃ ဝန်းကျင်အထိ ရောက်ရှိနေကြောင်း သိရသည်။ ယင်းမတိုင်မီ ဇွန် ၃ ရက်နေ့မှစတင်ကာ ကမ္ဘာ့ရွှေဈေးမှာ ဒေါ်လာ ၅၀၀၀ အောက်သို့ ဆင်းလာခဲ့ခြင်းဖြစ်သည်။
ဈေးကွက်ကျွမ်းကျင်သူများက လက်ရှိ အမေရိကန်နိုင်ငံ၏ လုပ်သားဈေးကွက် အခြေအနေမှာ မျှော်မှန်းထားသည်ထက် ပိုမိုကောင်းမွန်နေခြင်းကြောင့် အမေရိကန်ဗဟိုဘဏ် (Fed) အနေဖြင့် အတိုးနှုန်း ဆက်လက်မြှင့်တင်နိုင်ခြေရှိနေသဖြင့် ကမ္ဘာ့ရွှေဈေး ကျဆင်းလာခြင်းဖြစ်ကြောင်း သုံးသပ်ပြောဆိုထားသည်။
အမေရိကန်ဒေါ်လာဈေးမှာလည်း ပြင်ပဈေးကွက်အတွင်း တစ်ဒေါ်လာလျှင် ကျပ် ၃၉၀၀ မှ ၄၂၀၀ ကြား အရောင်းအဝယ်ဖြစ်ပေါ်နေပြီး ငွေလဲနှုန်းအပြောင်းအလဲမှာ အနည်းငယ်သာရှိနေကြောင်း သိရသည်။