မြန်မာနိုင်ငံအနေဖြင့် တရုတ်နိုင်ငံ၊ အကောက်ခွန်အ ထွေထွေအုပ်ချုပ်မှုအာဏာပိုင်အဖွဲ့(GACC)မှခွင့်ပြုထားသော ဆန်၊ ကော်ဖီ၊ ရော်ဘာနှင့် ပင်လယ်စာစသည့် အရည်အသွေးမြင့်ထုတ်ကုန်များတင်ပို့ရန်အ သင့်ရှိနေသည်ဟု နန်နင်းမြို့ မြန်မာကောင်စစ်ဝန်ချုပ်ဒေါ်ခိုင်စုလင်းက ပြောကြားခဲ့ကြောင်း သိရသည်။
နန်နင်းမြို့၊ မြန်မာကောင်စစ်ဝန်ချုပ်ရုံးကကြီးမှူး၍ နှစ်နိုင်ငံကုန်သွယ်မှုနှင့် ရင်းနှီးမြှုပ်နှံမှုများတိုးချဲ့မြှင့်တင်နိုင်ရေးအတွက် “တရုတ်(ကွမ်ရှီး)-မြန်မာကုန်သွယ်မှုနှင့်ရင်းနှီးမြှုပ်နှံမှုမြှင့်တင်ရေးပွဲနှင့် စီးပွားရေးလုပ်ငန်းများ ချိတ်ဆက်ခြင်း ၂၀၂၆”အား ဇွန် ၉ ရက်တွင် နန်နင်း အပြည်ပြည်ဆိုင်ရာကွန်ဗင်းရှင်းနှင့် ပြပွဲဗဟိုဌာန(NICEC) ၌ ကျင်းပစဥ် ပြောကြားခဲ့ခြင်းဖြစ်ကြောင်း သိရသည်။
မြန်မာနိုင်ငံအစိုးရသစ်သည် ဦးစားပေးပို့ကုန်များကို နှစ်ဆတိုးမြှင့်ရန်ရည်မှန်းထားပြီး တရုတ်နိုင်ငံနှင့် ကုန်သွယ်ရေးနှင့် ရင်းနှီးမြှုပ်နှံမှုများတိုးချဲ့လိုကာ ပြန်လည်ပြည့်ဖြိုးမြဲစွမ်းအင်၊ သတ္တုတူးဖော်ရေး၊ စက်မှုဇုန်များ၊ e-bike တပ်ဆင်ထုတ်လုပ်ရေး၊ ဆောက်လုပ်ရေးပစ္စည်းများနှင့် ဉာဏ်ရည်တု(AI)ကဏ္ဍများ၌ ရင်းနှီးမြှုပ်နှံမှုအခွင့်အလမ်းများကို ဖိတ်ခေါ်လျက်ရှိသည်ဟု ပြောကြားခဲ့သည်။
ထို့ကြောင့် အသေးစား၊ အငယ်စားနှင့် အလတ်စား စီး ပွားရေးလုပ်ငန်းများ(MSMEs)နှင့် လယ်ယာစိုက်ပျိုးရေးကိုကိုယ်စားပြုသော ကိုယ်စားလှယ်များအနေဖြင့် မိမိတို့၏ ထုတ်ကုန်များကို ယုံကြည်မှုရှိရှိတင်ပြရန်နှင့် ပူးပေါင်းဆောင်ရွက်မှုများအတွက် တံခါးဖွင့်ထားကြရန် မြန်မာကောင်စစ်ဝန်ရုံးမှလည်း အပြည့်အဝပံ့ပိုးကူညီသွားမည်ဟုလည်း ပြောကြားခဲ့သည်။
ထို့ပြင် မြန်မာကောင်စစ်ဝန်ချုပ်ရုံးမှ စီးပွားရေးသံမှူးက မြန်မာနိုင်ငံ၏လက်ရှိ ရင်းနှီးမြှုပ်နှံမှုအခွင့်အလမ်းများ၊ မြန်မာစီးပွားရေးလုပ်ငန်းရှင်များနှင့် တရုတ်စီးပွားရေးလုပ်ငန်းရှင်များက ၎င်းတို့၏ထုတ်ကုန်ပစ္စည်းများ၊ စီမံကိန်းများနှင့် ရင်းနှီးမြှုပ်နှံလိုသည်များ၊ နန်နင်းအကောက်ခွန်ဌာနက နှစ်နိုင်ငံကုန်သွယ်မှုအတွက် အရေးပါသော ကုန်သွယ်မှုလွယ်ကူချောမွေ့စေရေး၊ ဈေးကွက်ဝင်ရောက်ခွင့်နှင့် အကောက်ခွန်စည်းမျဉ်းစည်းကမ်းပိုင်းဆိုင်ရာများကိုရှင်းလင်းပြောကြားခဲ့ကြပြီးနောက် စီးပွားရေးလုပ်ငန်းအချင်းချင်း(B2B)ချိတ် ဆက်မှုအဖြစ် နှစ်နိုင်ငံမှ စီးပွားရေးလုပ်ငန်းရှင်များက တိုက်ရိုက်ဆွေးနွေးမှုများပြုလုပ်ခဲ့ကြကြောင်း သိရသည်။