စစ်ကိုင်းတိုင်းဒေသကြီး၊ မုံရွာမြို့ မြို့တော်ခန်းမတွင် ကမ္ဘာ့ကာကွယ်ဆေးထိုးနှံတိုက်ကျွေးရေး ရက်သတ္တပတ်(၂၀၂၆) အထိမ်းအမှတ် အခမ်းအနားကို ဧပြီလ (၂၈) ရက်က ကျင်းပခဲ့သည်။
“ကာကွယ်ဆေး ထိုးနှံတိုက်ကျွေးတဲ့လုပ်ငန်းဟာ နှစ်စဉ်အသက်ပေါင်းများစွာကို ကယ်တင်ပေးလျက်ရှိပြီး တစ်ကမ္ဘာလုံးမှာ ကျန်းမာရေးစောင့်ရှောက်မှုနဲ့ပတ်သက်တဲ့ ဖွံ့ဖြိုးတိုးတက်လာမှုတွေရဲ့ အောင်မြင်မှု ပြယုဂ်တစ်ခုဖြစ်ပါတယ်။ ကာကွယ်ဆေးထိုးနှံတိုက်ကျွေးတဲ့ လုပ်ငန်းတွေအရှိန် အဟုန်မြှင့် ဆောင်ရွက်တဲ့နေရာမှာ ကျန်းမာရေးဝန်ထမ်းတွေရဲ့အရည်အသွေးပြည့်ဝမှုရှိစေဖို့ စွမ်းဆောင်ရည်မြှင့်တင်သင်တန်းတွေကိုအရေးပါတဲ့ အခန်းကဏ္ဍ တစ်ခုဖြစ်ပါတယ်။ စစ်ကိုင်းတိုင်းဒေသကြီးအနေနဲ့ ဒေသနဲ့ လိုက်လျောညီထွေရှိတဲ့ ကာကွယ်ဆေးထိုးနှံတိုက်ကျွေးတဲ့ လုပ်ငန်းတွေကို စနစ်တကျ အကောင်းအထည်ဖော်ဆောင်ရွက်ပြီး အရည်အသွေးပြည့်မီတဲ့ ကာကွယ်ဆေးတွေကို သက်ဆိုင်ရာ ဦးတည်အုပ်စုတွေကို အချိန်မီထိုးနှံတိုက်ကျွေးပေးသွားကြဖို့ တာဝန်ရှိသူတွေကို ဝိုင်းဝန်းပူးပေါင်း ဆောင်ရွက်ပေးသွားကြဖို့ လိုအပ်ပါတယ်”ဟု စစ်ကိုင်းတိုင်းဒေသကြီး ဝန်ကြီးချုပ် ဦးကိုလေးက ပြောကြားသည်။
အခမ်းအနားသို့ စစ်ကိုင်းတိုင်းဒေသကြီးဝန်ကြီးချုပ် ဦးကိုလေးနှင့်ဇနီး၊ တိုင်းဒေသကြီး လွှတ်တော် ဥက္ကဋ္ဌ၊ ဒုတိယဥက္ကဋ္ဌ၊ တိုင်းဒေသကြီး အစိုးရအဖွဲ့ဝင်များနှင့်ဇနီးများ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ ပြည်သူ့ကျန်းမာရေးဦးစီးဌာနမှ ဝန်ထမ်းများနှင့် တာဝန်ရှိသူများ တက်ရောက်ခဲ့ကြသည်။
စစ်ကိုင်းတိုင်းဒေသကြီး ဝန်ကြီးချုပ်က ကာကွယ်ဆေးထိုးလုပ်ငန်းနှင့်အတူ မိခင်နှင့်ကလေးများအတွက် အခြားကျန်းမာရေးစောင့်ရှောက်မှုများ ပူးပေါင်းဆောင်ရွက်နိုင်မှု စွမ်းဆောင်ရည်အကောင်းဆုံးဆုရမြို့နယ် (၃) မြို့နယ်ကို ဆုတံဆိပ်များပေးအပ်ချီးမြှင့်ခဲ့ကြောင်း သိရသည်။