“မိုခါ”မုန်တိုင်းဒဏ်သင့် မြန်မာနိုင်ငံသားများ၏ ပြန်လည်ထူထောင်ရေး လုပ်ငန်းများတွင် အသုံးပြုနိုင်ရန် အိန္ဒိယနိုင်ငံရှိ Indo-Myanmar Friendship Association မှ ဇွန် (၁၁) ရက်က အလှူငွေများ လှူဒါန်းခဲ့ကြကြောင်း သိရသည်။
အိန္ဒိယနိုင်ငံ၊ ချန်နိုင်းမြို့အခြေစိုက် မြန်မာနိုင်ငံဆိုင်ရာ ဂုဏ်ထူးဆောင် ကောင်စစ်ဝန် Prof. Mr. Ranganathan.J (Indo-Myanmar Friendship Association Chennai Chapter)က အမေရိကန်ဒေါ်လာ(၂၀၀၀)၊ Adv. Mohanrao N. Pimple (Indo-Myanmar Friendship Association Mumbai Chapter)မှ အမေရိကန်ဒေါ်လာ(၂၃၀၀) တို့အားပေးအပ်လှူဒါန်းခဲ့ခြင်း ဖြစ်သည်။
ပေးအပ်လှူဒါန်းသည့် အလှူငွေများအား နယူးဒေလီမြို့၊မြန်မာသံရုံးမှ မြန်မာသံအမတ်ကြီး ဦးမိုးကျော်အောင်က လက်ခံရယူကာ ကျေးဇူးတင်လွှာ ပြန်လည်ပေးအပ်ခဲ့ကြောင်း သိရသည်။
မုန်တိုင်းဒဏ်သင့် ပြည်သူများအတွက် လိုအပ်ချက်များကို ပံ့ပိုးကူညီပေး၍ မြန်မာအစိုးရ ကိုယ်စား ကျေးဇူးတင်ကာ အလှူငွေများကို မြန်မာနိုင်ငံသို့ ဆက်လက်လွှဲပြောင်းပေးသွားမည်ဟု မြန်မာသံအမတ်ကြီးက ပြောကြားခဲ့ကြောင်း သိရသည်။
