အိုးလ်ထရက်ဖို့ဒ်ကွင်း၌ ယမန်နေ့ညက ယှဉ်ပြိုင်ခဲ့သည့် မန်ချက်စတာဒါဘီပွဲတွင် မန်ချက်စတာစီးတီးက အိမ်ရှင် မန်ချက်စတာယူနိုက်တက်ကို ၁-၀ ဂိုးဖြင့် အနိုင်ရခဲ့ရာ အဆုံးအဖြတ်အနိုင်ဂိုးနှင့်ပတ်သက်၍ ဒိုင်လူကြီးများဘက်က မှားယွင်းဆုံးဖြတ်ခဲ့ကြောင်း အင်္ဂလန်ဒိုင်လူကြီးအဖွဲ့အစည်းက ပွဲအပြီးတွင် ဝန်ခံတောင်းပန်ခဲ့ကြောင်း သိရသည်။
ပွဲချိန် ၂၃ မိနစ်တွင် မန်စီးတီးကွင်းလယ်ကစားသမား ဖီးလ်ဖိုဒန်သည် မန်ယူအသင်းခေါင်းဆောင် ဘရူနိုဖာနန်ဒက်စ်အပေါ် ကြမ်းတမ်းစွာ ပြုမူခဲ့သဖြင့် တိုက်ရိုက်အနီကတ်ဖြင့် ထုတ်ပယ်ခံခဲ့ရပြီး မန်စီးတီးသည် ပွဲချိန်အများစုကို ၁၀ ယောက်တည်းဖြင့် ကစားခဲ့ရသည်။
သို့သော် မန်ယူအသင်းက လူအင်အားအသာစီးကို အသုံးမချနိုင်ခဲ့ဘဲ ပွဲချိန် မိနစ် ၆၀ တွင် ဂျိုစကိုဂါဗာဒီယို၏ ဖြတ်တင်ဘောမှတစ်ဆင့် အားလင်းဟာလန်းက မန်စီးတီးအတွက် အနိုင်ဂိုး သွင်းယူခဲ့သည်။
အဆိုပါဂိုးကို ကွင်းလယ်ဒိုင် မိုက်ကယ်အိုလီဗာက အစပိုင်းတွင် လူကျွံဘောအဖြစ် သတ်မှတ်ခဲ့သော်လည်း VAR ပြန်လည်စစ်ဆေးပြီးနောက် ဟာလန်း လူကျွံနေခြင်းမရှိကြောင်း ဆုံးဖြတ်ကာ ဂိုးအဖြစ် အတည်ပြုခဲ့သည်။
သို့ရာတွင် ဖြတ်တင်ဘောပေးပို့ချိန်၌ လူကျွံအနေအထားတွင် ရှိနေသည့် မန်စီးတီးကစားသမားတစ်ဦးက ဘောလုံးဆီသို့ ဝင်ရောက်အားထုတ်ခဲ့ခြင်းကြောင့် မန်ယူနောက်ခံလူ လီဆန်ဒရိုမာတီနက်ဇ်၏ ဖျက်ထုတ်မှုကို အနှောင့်အယှက်ဖြစ်စေခဲ့သဖြင့် လူကျွံဘောအဖြစ် သတ်မှတ်သင့်ခဲ့ကြောင်း ဒိုင်လူကြီးအဖွဲ့က နောက်ပိုင်းတွင် သုံးသပ်ခဲ့ခြင်းဖြစ်သည်။
ယင်းဆုံးဖြတ်ချက်အမှားနှင့်ပတ်သက်၍ မန်ချက်စတာယူနိုက်တက်အသင်းထံ တရားဝင်ဆက်သွယ်တောင်းပန်ခဲ့ကြောင်းလည်း သိရသည်။
ဒိုင်လူကြီး၏ ဆုံးဖြတ်ချက်အမှားက ပွဲရလဒ်အပေါ် သက်ရောက်မှုရှိခဲ့သော်လည်း မန်ယူအသင်းသည် လူအင်အားအသာစီးဖြင့် အချိန်ကြာမြင့်စွာ ကစားခဲ့ရသည့်တိုင် ဂိုးပေါက်တည့်ကန်ချက် သုံးကြိမ်သာ ပြုလုပ်နိုင်ခဲ့ပြီး မန်စီးတီးခံစစ်ကို ထိရောက်စွာ ထိုးဖောက်နိုင်ခြင်းမရှိခဲ့ကြောင်း ဘောလုံးသုံးသပ်သူများက ထောက်ပြခဲ့သည်။
ယခုရှုံးပွဲကြောင့် မန်ယူအသင်းသည် လေးပွဲကစား ရမှတ်လေးမှတ်ဖြင့် အမှတ်ပေးဇယား အဆင့် ၁၃ နေရာတွင် ရပ်တည်နေပြီး မန်စီးတီးက လေးပွဲစလုံး အနိုင်ရကာ ရမှတ် ၁၂ မှတ်ဖြင့် အာဆင်နယ်နှင့် ရမှတ်တူ၊ ဂိုးကွာခြားချက်အရ ဒုတိယနေရာတွင် ရပ်တည်နေကြောင်း သိရသည်။