ကွာလာလမ်ပူ၊ စက်တင်ဘာ ၁၄
မလေးရှားနိုင်ငံ ကွာလာလမ်ပူမြို့ရှိ မြန်မာသံရုံး၌ PJ အမျိုးအစား နိုင်ငံကူးလက်မှတ် သက်တမ်းတိုးရန် ရက်ချိန်းလျှောက်ထားမှုများအနက် မမှန်မကန်နှင့် လိမ်လည်လျှောက်ထားမှုများ စိစစ်တွေ့ရှိနေရသဖြင့် ရက်ချိန်းစိစစ်ရွေးချယ်ရာတွင် နှောင့်နှေးကြန့်ကြာမှုများ ဖြစ်ပေါ်နေကြောင်း သံရုံးက စက်တင်ဘာ ၁၄ ရက်တွင် အသိပေးထားသည်။
သံရုံးအနေဖြင့် WhatsApp နှင့် အီးမေးလ်မှတစ်ဆင့် ရက်ချိန်းလျှောက်ထားသူများအနက် Work Permit နှင့် Special Pass သက်တမ်းကုန်ဆုံးရက် နီးကပ်နေသူများကို ဦးစားပေးစိစစ်ရွေးချယ်ကာ ရက်ချိန်းပေး၍ PJ နိုင်ငံကူးလက်မှတ် သက်တမ်းတိုးခြင်းကို နေ့ချင်းပြီး ဆောင်ရွက်ပေးလျက်ရှိသည်။
သို့သော် လျှောက်ထားသူအချို့က WhatsApp နှင့် အီးမေးလ်သို့ ထပ်ခါတလဲလဲ ပေးပို့ခြင်း၊ ဖုန်းနံပါတ်အမျိုးမျိုး အသုံးပြုလျှောက်ထားခြင်း၊ ဖုန်းခေါ်ဆိုခြင်းနှင့် Voice Message များ ပေးပို့ခြင်းအပြင် နိုင်ငံကူးလက်မှတ်သက်တမ်းတိုးခြင်းနှင့် မသက်ဆိုင်သည့် အကြောင်းအရာများ ပေးပို့ခြင်းတို့ ပြုလုပ်နေကြောင်း သံရုံးက ဆိုသည်။
ထို့ပြင် Work Permit သက်တမ်းကုန်ဆုံးရက်ကို မမှန်မကန်ဖော်ပြ၍ လျှောက်ထားခြင်းနှင့် နိုင်ငံကူးလက်မှတ် ပျောက်ဆုံးခြင်းမရှိဘဲ ပျောက်ဆုံးသည်ဟု လိမ်လည်လျှောက်ထားခြင်းများလည်း စိစစ်တွေ့ရှိထားကြောင်း သိရသည်။
ယင်းသို့ မမှန်မကန်လျှောက်ထားမှုကို ပထမအကြိမ် စိစစ်တွေ့ရှိပါက ရက်ချိန်းကို နောက်သို့ရွှေ့ဆိုင်းမည်ဖြစ်ပြီး ထပ်မံတွေ့ရှိပါက ရက်ချိန်းလျှောက်ထားမှုကို ထည့်သွင်းစဉ်းစားမည်မဟုတ်သည့်အပြင် လျှောက်ထားသည့် ဖုန်းနံပါတ်များကိုလည်း ပိတ်ပင် (Block) သွားမည်ဖြစ်ကြောင်း သံရုံးက သတိပေးထားသည်။
Work Permit သက်တမ်းကုန်ဆုံးရန် သုံးလအလိုမှသာ သံရုံး၏ WhatsApp မှတစ်ဆင့် ရက်ချိန်းလျှောက်ထားရန်နှင့် အီးမေးလ်မှ လျှောက်ထားရာတွင် သက်ဆိုင်ရာကုမ္ပဏီများက အဖွဲ့လိုက် (Group) လျှောက်ထားရန်လည်း အသိပေးထားသည်။ အီးမေးလ်မှ တစ်ဦးချင်းလျှောက်ထားမှုများကို ထည့်သွင်းစဉ်းစားပေးမည်မဟုတ်ကြောင်း သိရသည်။