ဖွင့်လှစ်သင်ကြားနိုင်ခြင်းမရှိသည့် စာသင်ကျောင်းများမှ ကျောင်းသား/သူများ၏ ပညာရေးမပြတ်တောက်စေရေးအတွက် Placement Test စာမေးပွဲ ဖြေဆိုစေပြီး သက်ဆိုင်ရာအတန်းများတွင် ဆက်လက်ပညာသင်ယူနိုင်ရန် စီစဉ်ဆောင်ရွက်ပေးလျက်ရှိကြောင်း ပဲခူးတိုင်းဒေသကြီးအစိုးရအဖွဲ့က ပြောကြားသည်။
တတိယအကြိမ် ပဲခူးတိုင်းဒေသကြီးလွှတ်တော် ဒုတိယပုံမှန်အစည်းအဝေးတွင် ဇီးကုန်းမြို့နယ် မဲဆန္ဒနယ်အမှတ်(၁)မှ လွှတ်တော်ကိုယ်စားလှယ် ဦးဉာဏ်ဝင်း၏ ပညာရေးကဏ္ဍဆိုင်ရာ ကြယ်ပွင့်မပြမေးခွန်းကို ပြန်လည်ဖြေကြားရာတွင် တိုင်းဒေသကြီးအစိုးရအဖွဲ့၏ သက်ဆိုင်ရာတာဝန်ရှိသူက အထက်ပါအတိုင်း ထည့်သွင်းပြောကြားခဲ့ခြင်းဖြစ်သည်။
တာဝန်ရှိသူက ၂၀၂၁-၂၀၂၂ ပညာသင်နှစ်မှစတင်၍ အကြောင်းအမျိုးမျိုးကြောင့် ကျောင်းပြင်ပရောက်ရှိနေသည့် အခြေခံပညာကျောင်းများ၊ ကိုယ်ပိုင်/ပုဂ္ဂလိကကျောင်းများနှင့် ဘုန်းတော်ကြီးသင်ပညာရေးကျောင်းများမှ ကျောင်းနေအရွယ်ကလေးများအား အသက်အရွယ်နှင့် ကိုက်ညီသည့် အတန်းများတွင် ပြန်လည်ပညာသင်ယူနိုင်ရန် ပညာရေးဝန်ကြီးဌာန၏ လမ်းညွှန်ချက်နှင့်အညီ အထူးအစီအစဉ်တစ်ရပ်အဖြစ် ဆောင်ရွက်ပေးခဲ့ကြောင်း ပြောကြားသည်။
အဆိုပါအစီအစဉ်အရ Grade-2 မှ Grade-9 အထိ ကျောင်းသား/သူများအား ဇွန် ၁၅ ရက်မှ ဇွန် ၂၀ ရက်အထိ မြို့နယ်အသီးသီးတွင် Placement Test စာမေးပွဲများ ဖြေဆိုစေခဲ့ပြီး ဖွင့်လှစ်သင်ကြားနိုင်ခြင်းမရှိသည့် ကျောင်းများမှ ကျောင်းသား/သူများ၏ ပညာရေးခရီးစဉ်ကို ဆက်လက်သင်ယူနိုင်ရန် စီစဉ်ဆောင်ရွက်ပေးလျက်ရှိကြောင်း ပြောကြားသည်။
ထို့ပြင် ဖွင့်လှစ်သင်ကြားနိုင်ခြင်းမရှိသည့် စာသင်ကျောင်းများမှ ဆရာ/ဆရာမများအနက် လက်ရှိရာထူးတွင် လုပ်သက် (၂) နှစ်ပြည့်သူများကို အပြောင်းအရွှေ့နှင့် ရာထူးတိုးလျှောက်ထားခွင့်ပြုထားပြီး လုပ်သက်မပြည့်သေးသူများကို ဖွင့်လှစ်သင်ကြားလျက်ရှိသည့် စာသင်ကျောင်းများတွင် ယာယီတွဲဖက်တာဝန်များ ထမ်းဆောင်စေလျက်ရှိကြောင်းလည်း ရှင်းလင်းဖြေကြားခဲ့သည်။