ပြည်ပအလုပ်အကိုင်လိမ်လည်မှုများသတိထား–တရုတ်အစိုးရကသတိပေး

ပေကျင်း၊ဇန်နဝါရီ ၁၅

နိုင်ငံဖြတ်ကျော်ရာဇဝတ်မှုခင်းများရှိလာသကဲ့သို့ နယ်စပ်အွန်လိုင်းလိမ်လည်မှုလုပ်ငန်းပြဿနာများ အဖြစ်များနေသဖြင့် ပြည်သူများအနေဖြင့် အဆိုပါလုပ်ငန်းများ၏သားကောင်ဘဝမရောက်ရေးအတွက် သတိရှိရှိနေထိုင်ကြရန် တရုတ်ပြည်သူ့လုံခြုံရေးဝန်ကြီးဌာနက သတိပေးချက်ထုတ်ပြန်ခဲ့ကြောင်းသိရသည်။

ယခုသတိပေးချက်သည် တယ်လီကွန်းလိမ်လည်မှုလုပ်ငန်းများနှင့် တရားမဝင်လုပ်ငန်းများအတွက် သားကောင်အဖြစ် လူကုန်ကူးခံရပြီးနောက် မိသားစုနှင့်အဆက်သွယ်ပြတ်တောက်ကာ ဖမ်းဆီးခံထားရသူများ၏ မိသားစုဝင်များက လာရောက်အကူအညီတောင်းခံမှုများ လာချိန်၌ ထုတ်ပြန်ကြေငြာခဲ့ခြင်းလည်းဖြစ်သည်။

ဆက်လက်၍ ဝန်ကြီးဌာနအနေဖြင့် အဆိုပါအမှုများကို စေ့စေ့စပ်စပ်ကိုင်တွယ်ဖြေရှင်းရန် ဒေသဆိုင်ရာ ပြည်သူ့လုံခြုံရေးအဖွဲ့အစည်းများကို ညွှန်ကြားထားပြီး ဖမ်းဆီးခံထားရပြီးသောင်တင်နေသူများကိုကယ်တင်ကာ ဘေးကင်းစွာအိမ်ပြန်နိုင်ရေးအတွက် ကြိုးပမ်းဆောင်ရွက်လျက်ရှိသည်ဟုလည်းပြောကြားခဲ့သည်။

တယ်လီကွန်းလိမ်လည်မှုနှင့် အခြားရာဇဝတ်လုပ်ငန်းများသည် မသိနားမလည်သူများကို ပြည်ပ၌ အလုပ်အကိုင်ကောင်းကောင်း၊လစာကောင်းကောင်းကို စားရိတ်ငြိမ်းရနိုင်မည်ဟုပြောဆိုစည်းရုံးကာ မက်လုံးပေးလေ့ရှိတတ်သဖြင့် ယင်းသို့အလိမ်မခံရစေရန်လည်း သတိထားဖို့လိုကြောင်း ထပ်မံသတိပေးထားသည်။

အဆိုပါဂိုဏ်းများသို့ရောက်ရှိသွားပါက ၎င်းတို့သည် တယ်လီကွန်းလိမ်လည်မှုနှင့် ရာဇဝတ်မှုလုပ်ငန်းများတွင် အတင်းအကြပ်ဖိအားပေးခိုင်းစေခံရနိုင်သည်ဟုလည်းသတိပေးစကားပြောကြားခဲ့သည်။ မိမိတို့၏ဆွေမျိုးမိသားစုဝင်များထဲတွင် အဆိုပါအဖြစ်မျိုးကြုံနေရသူရှိပါက သက်ဆိုင်ရာအဖွဲ့အစည်းများအားဆက်သွယ်အကူအညီတောင်းဖို့လည်း ညွှန်ကြားထားသည်။

ဆက်လက်၍ တာဝန်ရှိသူများအနေဖြင့်လည်း အဆိုပါလိမ်လည်မှုဂိုဏ်းများကို အရှိန်အဟုန်မြှင့်တိုက်ခိုက်သွားမည်ဖြစ်ပြီး အထူးသဖြင့် မြန်မာနိုင်ငံမြဝတီကဲ့သို့သောနေရာများရှိ အဆိုပါဂိုဏ်းများအား ပစ်မှတ်ထားချေမှုန်းသွားမည်ဟုလည်းဆိုသည်။

ဝန်ကြီးဌာနအနေဖြင့် နိုင်ငံတကာတရားဥပဒေစိုးမိုးရေးနှင့်ပူးပေါင်းဆောင်ရွက်မှုများ အားကောင်းလာစေရေးအတွက် ကြိုးပမ်းဆောင်ရွက်လျက်ရှိပြီး ပြည်သူများဘေးကင်းရေး၊ပိုင်ဆိုင်မှုနှင့်တရားဝင်အခွင့်အရေးများ၊အကျိုးစီးပွားများကို ပိုမိုကာကွယ်ပေးသွားမည်ဟုလည်း ကတိပြုပြောကြားခဲ့သည်။

Source : ရှင်းဟွာ