တရုတ်-မြန်မာနယ်စပ် မူဆယ်မြို့မှ မြန်မာနိုင်ငံအလယ်ပိုင်းရှိကုန်သွယ်ရေးအချက်အချာဖြစ်သည့် မန္တလေးမြို့သို့ ချိတ်ဆက်ဖောက်လုပ်မည့် မန္တလေး-မူဆယ် မီးရထားလမ်းသည် တရုတ်နိုင်ငံတွင်ဆောက်လုပ်နေသော ပေကျင်း-ကူမင်း-ရွှေလီ အမြန်ရထားလမ်းပိုင်းနှင့် ချိတ်ဆက်မည်ဟု နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်က ပြောသည်။
တရုတ်နိုင်ငံသို့ အလုပ်သဘောခရီးစဥ်ရောက်ရှိနေသည့် နိုင်ငံတော်လုံခြုံရေးနှင့် အေးချမ်းသာယာရေးကော်မရှင်ဥက္ကဋ္ဌသည် သြဂုတ် ၃၁ ရက်နံနက်ပိုင်းက တရုတ်နိုင်ငံ၊ တီယန်ကျင်းမြို့ရှိ Tangle Hotel ၌ကျင်းပသော မြန်မာ-တရုတ် စီးပွားရေးပူးပေါင်းဆောင်ရွက်မှုမြှင့်တင်ရေးတွေ့ဆုံပွဲတွင် ပြောကြားခဲ့ခြင်းဖြစ်သည်။
တရုတ်နိုင်ငံအကူအညီဖြင့် မြန်မာနိုင်ငံ၏ လူမှုစီးပွားဖွံ့ဖြိုးတိုးတက်ရေးအတွက် ပညာရေးနှင့် ကျန်းမာရေးကဏ္ဍ၊ အခြေခံအဆောက်အအုံဖွံ့ဖြိုးတိုးတက်ရေးအတွက် လျှပ်စစ်နှင့်စွမ်းအင်၊ စိုက်ပျိုးရေး၊ စက်မှုနှင့်ပို့ဆောင်ဆက်သွယ်ရေးကဏ္ဍများ၊ ကျောက်ဖြူရေနက်ဆိပ်ကမ်းစီမံကိန်း၊ မြစ်ဆုံရေအားလျှပ်စစ်စီမံကိန်း၊ ရေနံနှင့်သဘာဝဓာတ်ငွေ့ပိုက်လိုင်းစီမံကိန်း၊ မူဆယ်-မန္တလေး မီးရထားလမ်းသစ်ဖောက်လုပ်ရေးစီမံကိန်း၊ မန္တလေး-ကျောက်ဖြူ မီးရထားလမ်းစီမံကိန်းများကို အကောင်အထည်ဖော်ဆောင်ရွက်လျက်ရှိသည်ဟု ပြောသည်။
” မန္တလေး-မူဆယ် မီးရထားလမ်းဟာ တရုတ်-မြန်မာနယ်စပ် မူဆယ်မြို့ကနေ မြန်မာနိုင်ငံအလယ်ပိုင်းက ကုန်သွယ်ရေးအချက်အချာဖြစ်တဲ့ မန္တလေးမြို့ကိုချိတ်ဆက်ဖောက်လုပ်မယ့် အမြန်ရထားလမ်းဖြစ်ပါတယ်။ တရုတ်နိုင်ငံကဆောက်လုပ်နေတဲ့ ပေကျင်း-ကူမင်း-ရွှေလီ အမြန်ရထားလမ်းပိုင်းနဲ့ ချိတ်ဆက်မှာပါ”ဟု ဗိုလ်ချုပ်မှူးကြီး မင်းအောင်လှိုင်က ပြောသည်။
မူဆယ်မြို့သည် တရုတ်-မြန်မာကုန်သွယ်ရေးတွင် အရေးပါဆုံးသော နယ်စပ်ဂိတ်တည်ရှိပြီး ၂၀၂၃ -၂၀၂၄ ဘဏ္ဍာရေးနှစ်အတွင်း တရုတ်-မြန်မာ နယ်စပ်ကုန်သွယ်ရေးမှ အမေရိကန်ဒေါ်လာသန်း (၃,၂၀၀)ကျော်အနက် သန်း(၂,၀၀၀)ကျော်သည် မူဆယ်-ရွှေလီ နယ်စပ်ဂိတ်မှကုန်စည်စီးဆင်းမှုများကြောင့်ရရှိခြင်းဖြစ်၍ ယင်း မီးရထားလမ်းစီမံကိန်းသည် တရုတ်နိုင်ငံ၏ ကုန်းတွင်းပိုင်းရှိ ပင်လယ်ထွက်ပေါက်မရှိသည့် တောင်ပိုင်းပြည်နယ်များကို မြန်မာနိုင်ငံမှတစ်ဆင့် ပင်လယ်ထွက်ပေါက်ရရှိစေနိုင်သော အခွင့်အလမ်းကောင်းတစ်ရပ်ဖြစ်သည်ဟု ပြောသည်။
ယင်း မီးရထားလမ်းစီမံကိန်းများအောင်မြင်စွာဆောင်ရွက်၍ကုန်သွယ်နိုင်မည်ဆိုပါက မြန်မာ-တရုတ်နှစ်နိုင်ငံလုံးနှင့်ဆက်ဆံရေးကောင်းမွန်သည့် ရု ရှားနိုင်ငံအထိ ကုန်သွယ်မှုပြုလုပ်နိုင်မည့် အလားအလာကောင်းများရှိသည်ကိုတွေ့ရှိရကာ တရုတ်နိုင်ငံသည် မြန်မာနိုင်ငံနှင့်ရုရှားနိုင်ငံတို့အလယ်တွင်တည်ရှိရာ မြန်မာ-တရုတ်-ရုရှား သုံးနိုင်ငံပူးပေါင်းပြီး ကုန်သွယ်ရေးကဏ္ဍကို တိုးချဲ့ဆောင်ရွက်နိုင်ပါက ဒေသတွင်းကုန်စည်စီးဆင်းမှုကို များစွာအထောက်အကူပြုနိုင်သည့် အခွင့်အလမ်းကောင်းများထွက်ပေါ်လာနိုင်သည်ဟုလည်း ပြောကြားခဲ့သည်။