ပိုလန်တွင် မြန်မာ့ဆန်တန်ချိန် ၂၅၀ ၌ ပိုးမွှားအသေတွေ့ရှိမှုသတင်းအပေါ် ဆန်စပါးအသင်းချုပ် ရှင်းလင်း

ရန်ကုန်၊ စက်တင်ဘာ ၁၂

ပိုလန်နိုင်ငံ Gdansk ဆိပ်ကမ်းသို့ ရောက်ရှိလာသည့် မြန်မာ့ဆန်တန်ချိန် ၂၅၀ အတွင်း ပိုးမွှားအသေများနှင့် ပိုးမွှားအကြွင်းအကျန်များ တွေ့ရှိခဲ့သည်ဆိုသည့် သတင်းနှင့်ပတ်သက်၍ မြန်မာနိုင်ငံဆန်စပါးအသင်းချုပ်က စက်တင်ဘာ ၁၁ ရက်တွင် ရှင်းလင်းချက် ထုတ်ပြန်ခဲ့သည်။

TVP News ၏ ဖော်ပြချက်တွင် မြန်မာ့ဆန်တန်ချိန် ၂၅၀ အတွင်း ပိုးမွှားအသေ (Dead Insect) နှင့် ပိုးမွှားအကြွင်းအကျန်များ တွေ့ရှိခဲ့ကြောင်း ဖော်ပြထားသော်လည်း အဆိုပါဆန်ကို မည်သည့်ကုမ္ပဏီက တင်သွင်းခဲ့သည်၊ Gdansk ဆိပ်ကမ်းသို့ မည်သည့်နေ့တွင် ရောက်ရှိခဲ့သည်နှင့် မည်သည့်ကုမ္ပဏီက ဖြန့်ဖြူးရောင်းချသည်ဆိုသည့် အချက်အလက်များကို ဖော်ပြထားခြင်းမရှိကြောင်း အသင်းချုပ်က ဆိုသည်။

ပိုလန်နိုင်ငံသည် မြန်မာ့ဆန်ဖြူနှင့် ပေါင်းဆန်ကို ပုံမှန်ဝယ်ယူသည့် ဥရောပဈေးကွက်တစ်ခုဖြစ်ပြီး ၂၀၂၄-၂၀၂၅ ဘဏ္ဍာနှစ်တွင် တန်ချိန် ၇၉,၄၃၂၊ ၂၀၂၅-၂၀၂၆ ဘဏ္ဍာနှစ်တွင် တန်ချိန် ၆၄,၇၅၂ နှင့် ၂၀၂၆-၂၀၂၇ ဘဏ္ဍာနှစ်တွင် တန်ချိန် ၃၇,၃၄၃ တင်ပို့ထားကြောင်း သိရသည်။ အဆိုပါကာလအတွင်း ပိုလန်သို့ မြန်မာ့ဆန် စုစုပေါင်းတန်ချိန် ၁၈၁,၅၂၇ တင်ပို့ထားပြီး ကုမ္ပဏီ ၈၇ ခု ပါဝင်တင်ပို့ခဲ့ကြောင်း ထုတ်ပြန်ချက်တွင် ဖော်ပြထားသည်။

မြန်မာနိုင်ငံမှ ပိုလန်အပါအဝင် ဥရောပနိုင်ငံများသို့ ဆန်တင်ပို့ရာတွင် သင်္ဘောမတင်မီ Pre-shipment Inspection ပြုလုပ်ရသည့်အပြင် Microbiological Requirements၊ Phytosanitary၊ GMO Free၊ Fumigation၊ Heavy Metals၊ Mycotoxins၊ အခြားအဆိပ်အတောက်များနှင့် Pesticides Residue စသည့် အရည်အသွေးဆိုင်ရာ သတ်မှတ်ချက်များကို တတိယအဖွဲ့အစည်းများဖြင့် စစ်ဆေးရကြောင်း အသင်းချုပ်က ရှင်းလင်းထားသည်။

မြန်မာ့ဆန်ပို့ကုန်ကုမ္ပဏီများအနေဖြင့် နိုင်ငံတကာကုန်သွယ်မှုလုပ်ထုံးလုပ်နည်းများနှင့်အညီ FOB စနစ်ဖြင့် တင်ပို့ခြင်းဖြစ်ပြီး သင်္ဘောတင်ပြီးချိန်အထိ ကုန်တင်ပို့သူ (Seller) က တာဝန်ယူရကာ ယင်းနောက်ပိုင်း အရည်အသွေးဆိုင်ရာတာဝန်များမှာ စာချုပ်ပါသတ်မှတ်ချက်များအရ ဝယ်ယူသူ (Buyer) နှင့် အရည်အသွေးစစ်ဆေးသည့် တတိယအဖွဲ့အစည်းများနှင့် သက်ဆိုင်ကြောင်း ဖော်ပြထားသည်။

သင်္ဘောခရီးကွာဝေး၍ ကြာမြင့်ခြင်း၊ Buyer ဘက်မှ သင်္ဘောစီစဉ်မှုနှင့် ကုန်သေတ္တာထုတ်ယူမှု ကြာမြင့်ခြင်းစသည့် အခြေအနေများ ဖြစ်ပေါ်နိုင်သဖြင့် မြန်မာ့ဆန်တင်ပို့သူများအနေဖြင့် အရည်အသွေးစီမံခန့်ခွဲမှုစနစ်များကို ပိုမိုဂရုပြု လိုက်နာဆောင်ရွက်ရန်လည်း အသင်းချုပ်က အသိပေးထားသည်။

ထို့ပြင် ဥရောပနိုင်ငံများနှင့် အခြားဆန်ဝယ်ယူသည့်နိုင်ငံများရှိ Buyer များနှင့် မြန်မာနိုင်ငံရှိ Seller-Exporter များအကြား စာချုပ်များ ခိုင်မာစွာချုပ်ဆိုကာ အရည်အသွေးပိုင်းဆိုင်ရာ တာဝန်ယူမှုနှင့် တာဝန်ခံမှုများကို ရှင်းလင်းတိကျစွာ ထည့်သွင်းသတ်မှတ်ရန် ပို့ကုန်ကုမ္ပဏီများကို တိုက်တွန်းထားသည်။

အဆိုပါဖြစ်စဉ်ကို ဆက်လက်လေ့လာသုံးသပ်၍ လိုအပ်သည့် ပြင်ဆင်ဆောင်ရွက်မှုများကို သက်ဆိုင်ရာဝန်ကြီးဌာနများထံ တင်ပြကာ လမ်းညွှန်မှုရယူ ဆောင်ရွက်သွားမည်ဖြစ်ကြောင်း မြန်မာနိုင်ငံဆန်စပါးအသင်းချုပ်က ထုတ်ပြန်ထားသည်။