တောင်သူလယ်သမားများ လယ်ယာလုပ်ငန်းခွင်တွင် စိုက်ပျိုးရေးအထွက်နှုန်း တိုးတက်လာပြီး ဝင်ငွေပိုမိုရရှိစေရန် လိုအပ်သည့် ဓာတ်မြေဩဇာများကို ဈေးနှုန်းသက်သာစွာ ဝယ်ယူနိုင်ရေးအတွက် သမဝါယမစနစ်ဖြင့် စုပေါင်းဝယ်ယူကာ စုပေါင်းဖြန့်ဖြူးရောင်းချပေးလျက်ရှိကြောင်း သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ဒုတိယဝန်ကြီး ဦးသိုက်စိုးက ပြောကြားသည်။
အဆိုပါပြောကြားချက်ကို ဇူလိုင် ၃ ရက်က ကျင်းပသည့် တတိယအကြိမ် အမျိုးသားလွှတ်တော် ဒုတိယပုံမှန်အစည်းအဝေး (၁၂) ရက်မြောက်နေ့တွင် ကချင်ပြည်နယ် အမျိုးသားလွှတ်တော်ကိုယ်စားလှယ် အမှတ် (၁၁) ဦးစိန်လွင်ဦး၏ မေးခွန်းကို ပြန်လည်ဖြေကြားစဉ် ထည့်သွင်းပြောကြားခဲ့ခြင်းဖြစ်သည်။
မိုးညှင်းမြို့နယ်ရှိ တောင်သူလယ်သမားများ စပါးအထွက်နှုန်းတိုးတက်စေရေးနှင့် မြို့နယ်၏ စပါးအထွက်နှုန်း လျော့ကျမသွားစေရေးအတွက် ဓာတ်မြေဩဇာများကို အစိုးရ၏ သက်သာသည့်နှုန်းထားဖြင့် ရောင်းချပေးနိုင်ခြင်း ရှိ၊ မရှိနှင့်စပ်လျဉ်း၍ မေးမြန်းခဲ့ရာ ဒုတိယဝန်ကြီးက ယင်းကဲ့သို့ ဖြေကြားခဲ့ခြင်းဖြစ်သည်။
ဒုတိယဝန်ကြီး၏ ပြောကြားချက်အရ ယူရီးယားမြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီသည် ရန်ကုန်အထိုင် ရည်ညွှန်းဈေးကို အခြေခံကာ သယ်ယူပို့ဆောင်ရေးစရိတ်နှင့် တင်ချခများကို ထည့်သွင်းတွက်ချက်ပြီး သက်ဆိုင်ရာဒေသများအရောက် ဖြန့်ဖြူးရောင်းချပေးလျက်ရှိကြောင်း သိရသည်။
ထို့ပြင် ဦးဆောင်ကော်မတီအနေဖြင့် ဓာတ်မြေဩဇာများ၏ အရည်အသွေး မှန်ကန်မှု၊ သိုလှောင်ဈေးကစားမှု ရှိ၊ မရှိတို့ကိုလည်း အနီးကပ်ကြီးကြပ် ဆောင်ရွက်လျက်ရှိကြောင်း ဒုတိယဝန်ကြီး ဦးသိုက်စိုးက ပြောကြားခဲ့သည်။