အကယ်၍ဒေါ်နယ်ထရမ့်ပ်သာ အမေရိကန်ပြည်ထောင်စု၏ သမ္မတအဖြစ် ရွေးကောက်ခံရလျှင် ဥရောပသည် စစ်ပွဲဝန်ထုပ်ဝန်ပိုးကို တစ်ကိုယ်တည်းထမ်းနိုင်မည် မဟုတ်သောကြောင့် ယူကရိန်းကို ဥရောပ၏ ကူညီပံ့ပိုးမှုများအား ပြန်စဉ်းစားရန် လိုအပ်မည်ဖြစ်သည်ဟု ဟန်ဂေရီဝန်ကြီးချုပ် ဗစ်တာ အော်ဘန်က တနင်္ဂနွေနေ့တွင် ပြောကြားလိုက်သည်။
အော်ဘန်သည် ယူကရိန်းကို စစ်ရေးအကူအညီပေးမှုကို ဆန့်ကျင်သူဖြစ်ကာ သူနှင့်ထရမ့်ပ်က အမြင်တူပြီး ယူကရိန်း ငြိမ်းချမ်းရေးအတွက် ညှိနှိုင်းလိမ့်မည်ဟု သူထင်ကြောင်း ပြောကြားသည်။
သူသည် ရီပတ်ဗလီကန် သမ္မတလောင်းဖြစ်သည့် သမ္မတဟောင်းထရမ့်ပ်ကို ထောက်ခံသူဖြစ်ပြီး အင်္ဂါနေ့ အမေရိကန်သမ္မတ ရွေးကောက်ပွဲတွင် ထရမ့်ပ်က ဒီမိုကရက်တစ် သမ္မတလောင်း ကမ်မလာ ဟဲရစ်ကို အနိုင်ယူမည်ဟု ဆိုထားသည်။
အမေရိကမှာသာ ငြိမ်းချမ်းရေးလိုလားသူ သမ္မတဖြစ်လာပါက မိမိတို့ ဥရောပဒေသအနေဖြင့် နားလည်သဘောပေါက်ထားရမည်မှာ ဥရောပသည် စစ်ပွဲထောက်ခံသူအဖြစ် ဆက်ရှိနိုင်တော့မည်မဟုတ်ကြောင်း အော်ဘန်က ပြောကြားခဲ့သည်။
လာမည့်သီတင်းပတ်တွင် ဘူဒါပက်စ်၌ ဥရောပခေါင်းဆောင်များနှင့် တွေ့ဆုံသည့် အစီအစဉ်တွင် ယူကရိန်းအရေးသည် ပိုမိုအရေးကြီးလာလိမ့်မည်ဟု ဥရောပနိုင်ငံရေးအသိုက်အဝန်းအစည်းအဝေးနှင့် အီးယူခေါင်းဆောင်များ၏ အလွတ်သဘောအစည်းအဝေးများကို ရည်ညွှန်းကာ အော်ဘန်က ပြောဆိုသည်။
“ဥရောပက စစ်ပွဲ ဝန်ထုပ်ဝန်ပိုးကို တစ်ကိုယ်တည်း ထမ်းလို့မရနိုင်ဘူး၊ အမေရိကန်တွေသာ ငြိမ်းချမ်းရေးဘက်ပြောင်းရင် ငါတို့လည်း လိုက်လျောညီထွေဖြစ်ဖို့လိုတယ်၊ ဒါက ဘူဒါပက်စ်မှာ ဆွေးနွေးရမယ့် အရာပဲ” ဟု အော်ဘန်က ဆိုခဲ့သည်။
အမေရိကန်သမ္မတ ရွေးကောက်ပွဲရလဒ်သည် ယူကရိန်းစစ်ပွဲနှင့် ဥရောပတိုက် ၏ လုံခြုံရေးအပေါ် အကျိုးသက်ရောက်လာနိုင်သည့် အခြေအနေအတွက် ဥရောပသည် ခြောက်ခြားနေရသည်။ Ref: ယူအက်စ်နူးစ်